ព័ត៌មានអន្ដរជាតិ

លោក Medvedev៖ ភាពតានតឹងនៅ Greenland គ្រាន់តែជាការចាប់ផ្តើម សម្រាប់ EU

បានផុស

៥ ខែ មុន

នៅ

ថ្ងៃសៅរ៍ ៧ កុម្ភៈ ២០២៦

ដោយ

អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev កាលពីថ្ងៃទី៦ ខែកុម្ភៈបានព្រមានថា ការបដិសេធប្រភពថាមពលរុស្ស៊ី នឹងធ្វើឲ្យអឺរ៉ុបរុញខ្លួនចូលទៅក្នុងអន្ទាក់ដ៏គួរឲ្យភ័យខ្លាច ដោយធ្លាក់ចូលទៅក្នុងការពឹងផ្អែកយ៉ាងធ្ងន់ធ្ងរលើឧស្ម័នរបស់អាមេរិក។ ដូច្នេះ អឺរ៉ុបនឹងត្រូវធ្វើច្រើនតាមដែលទីក្រុងវ៉ាស៊ីនតោនតម្រូវ ហើយនេះគ្រាន់តែជាការចាប់ផ្តើមសម្រាប់សហភាពអឺរ៉ុប (EU) ប៉ុណ្ណោះ ។

**លោក Dmitry Medvedev (រូបភាព៖Ruetures)**

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមភ្នាក់ងារ tass អនុប្រធានក្រុមប្រឹក្សាសន្តិសុខរុស្ស៊ីបានចង្អុលបង្ហាញថា EU នឹងបង់ថ្លៃជាមួយនឹងអធិបតេយ្យភាពដែលនៅសល់ ហើយកោះ Greenland គ្រាន់តែជាការចាប់ផ្តើមមួយសម្រាប់ពួកគេ។ លោកហៅការសម្រេចចិត្តរបស់សហភាពអឺរ៉ុបក្នុងការដាក់បម្រាមទាំងស្រុង លើការនាំចូលឧស្ម័នធម្មជាតិរាវ (LNG) ពីប្រទេសរុស្ស៊ី ក៏ដូចជាឧស្ម័នរុស្ស៊ីដែលដឹកជញ្ជូនតាមបំពង់បង្ហូរប្រេងថាជាចលនា «ល្ងង់ខ្លៅបំផុត»។

នៅក្នុងនោះដែរ លោក Medvedev បានបញ្ជាក់ជាថ្មីថា យោងតាមការប៉ាន់ប្រមាណរបស់អ្នកជំនាញ ការបោះបង់ចោលឧស្ម័នរុស្ស៊ី នឹងធ្វើឲ្យសហភាពអឺរ៉ុបខាតបង់ប្រហែល ១៧% នៃការនាំចូលឧស្ម័នបច្ចុប្បន្នរបស់ខ្លួន។ អ្នកនយោបាយរុស្ស៊ីរូបនេះបានបន្ថែមថា រដ្ឋជាសមាជិកសហភាពអឺរ៉ុប កំពុងរៀបចំផែនការដើម្បីធ្វើពិពិធកម្មការផ្គត់ផ្គង់ឧស្ម័នមុនថ្ងៃទី ១ ខែមីនា តែវានៅតែមិនទាន់ច្បាស់ថា តើសហភាពអឺរ៉ុបនឹងផ្តល់សំណងសម្រាប់ការខ្វះខាតនេះនៅឯណា ហើយថា តើដំណោះស្រាយដែលអាចទទួលយកបាននឹងលេចចេញជារូបរាងឬអត់ វានៅតែជាអាថ៌កំបាំងដដែល។

លោកក៏បានកត់សម្គាល់អំពីការហាមឃាត់ការនាំចូលថាមពលរបស់រុស្ស៊ី ត្រូវបានអនុម័តដោយសហភាពអឺរ៉ុបនៅក្នុងបរិបទរដូវរងាដ៏អាក្រក់ នៅពេលដែលទុនបម្រុងឧស្ម័នដែលនៅសល់ក្នុងការផ្ទុកក្រោមដីរបស់អឺរ៉ុបមានតិចជាង ៤០%។ លោកលើកឡើងពីទិន្នន័យដែលបង្ហាញពីទុនបម្រុងឧស្ម័នក្រោម ២៥% នៅក្នុងប្រទេសហូឡង់ ក្រោម ៣០% នៅប្រទេសបារាំង និង ៣២% នៅក្នុងប្រទេសអាល្លឺម៉ង់។

ការសម្រេចចិត្តជាបន្តបន្ទាប់នេះ បណ្តាលឲ្យមានភាពជាប់គាំងនៅក្នុងសេដ្ឋកិច្ចឈានមុខគេនៅអឺរ៉ុប ក៏ដូចជាការថយចុះផលិតកម្មឧស្សាហកម្ម និងការងារ។ ជាលទ្ធផល ប្រាក់ចំណូល និងការប្រើប្រាស់បានថយចុះ ដែលនាំឲ្យមានស្ថានភាពមួយដែលជនជាតិអឺរ៉ុបត្រូវសន្សំអ្វីៗគ្រប់យ៉ាងទាំងអស់៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖