បុរសកូរ៉េខាងត្បូងម្នាក់ស្លាប់ដោយសាររ៉ូបូតច្រឡំមនុស្សថាជាប្រអប់អីវ៉ាន់

ទីភ្នាក់ងារសារព័ត៌មានយ៉ុនហាប់ (Yonhap) បានរាយការណ៍នៅថ្ងៃពុធ ទី៨ ខែវិច្ឆិកា ឆ្នាំ២០២៣ ថា បុរសម្នាក់ត្រូវបានមនុស្សយន្ត (Robot) កិនស្លាប់នៅប្រទេសកូរ៉េខាងត្បូង បន្ទាប់ពីម៉ាស៊ីនរ៉ូបូតបរាជ័យក្នុងការធ្វើការ ដោយយល់ច្រឡំមនុស្សថាជាប្រអប់អីវ៉ាន់។

ជនរងគ្រោះជាបុគ្គលិកក្រុមហ៊ុនមនុស្សយន្ត ដែលមានអាយុ៤០ឆ្នាំ កំពុងត្រួតពិនិត្យប្រតិបត្តិការឧបករណ៍ចាប់សញ្ញារបស់មនុស្សយន្ត នៅមជ្ឈមណ្ឌលចែកចាយផលិតផលកសិកម្ម ក្នុងខេត្ត South Gyeongsang ប្រទេសកូរ៉េខាងត្បូង។

សារព័ត៌មានយ៉ុនហាប់ បានរាយការណ៍ដោយដកស្រង់សម្តីប៉ូលិសថា គ្រោះថ្នាក់កើតឡើងពេលមនុស្សយន្តកំពុងលើកប្រអប់ម្ទេស ហើយដាក់វានៅលើក្តារបន្ទះ ប៉ុន្តែភ្លាមៗវាហាក់ដូចជាមានបញ្ហា ហើយបែរជាកំណត់អត្តសញ្ញាណជនរងគ្រោះថាជាប្រអប់។ ពេលនោះដៃមនុស្សយន្តបានរុញរាងកាយផ្នែកខាងលើរបស់ជនរងគ្រោះចុះមកទល់នឹងខ្សែក្រវាត់ដឹកជញ្ជូន ដោយបានបុកមុខ និងទ្រូងរបស់គាត់។ ជនរងគ្រោះ​ត្រូវ​បាន​បញ្ជូន​ទៅ​មន្ទីរពេទ្យ ប៉ុន្តែ​មិនអាចសង្រ្គោះបានឡើយ៕

ប្រែសម្រួល៖ សន្យា

ប្រភព៖ CNA

ចុចអាន៖ ព្រលានយន្តហោះតម្លៃ ១៧៥ លានដុល្លារក្នុងខេត្តមួយរបស់ ឡាវ ត្រៀមបើក​ទទួលទេសចរ ចិន