ព្រលានយន្តហោះតម្លៃ ១៧៥ លានដុល្លារក្នុងខេត្តមួយរបស់ ឡាវ ត្រៀមបើក​ទទួលទេសចរ ចិន

ព្រលាន​យន្តហោះ​អន្តរជាតិ​ថ្មី​ស្រឡាង​មួយ​ក្នុង​ខេត្ត​បរកែវ​នៃប្រទេសឡាវ ដែល​ចំណាយលុយសាងសង់អស់ ​១៧៥ ​លាន​ដុល្លារ​អាមេរិក នឹង​ចាប់ផ្តើមបើកដំណើរការ​នៅ​ចុងឆ្នាំ​ ២០២៣ នេះ ​។

ព្រលានយន្តហោះក្នុងខេត្តបរកែវនេះ ត្រូវបានផ្តល់ហិរញ្ញប្បទានដោយក្រុមហ៊ុនចិន Greater Bay Area Investment and Development Limited ហើយផ្តើមសាងសង់តាំងតែពីខែកញ្ញា ឆ្នាំ២០២០ មកម្ល៉េះ ខណៈបច្ចុប្បន្ន ព្រលាននេះកំពុងផ្តោតសំខាន់លើការតុបតែងផ្នែកខាងក្នុង និងការដំឡើងគ្រឿងបរិក្ខារសំខាន់ៗជាដើម ។

ទន្ទឹមនោះ ព្រលានយន្តហោះថ្មីនេះ ត្រូវបានសាងសង់ឡើងនៅលើទីតាំងយុទ្ធសាស្ត្រ ជិតតំបន់សេដ្ឋកិច្ចពិសេសត្រីកោណមាសក្នុងគោលបំណងទាក់ទាញភ្ញៀវទេសចរបន្ថែមទៀត ជាពិសេសគឺផ្ដោតលើទេសចរមកពីប្រទេសចិនតែម្ដង ។

ស្របពេលជាមួយគ្នានេះ ព្រលានយន្តហោះថ្មីនេះ​ត្រូវបានរចនាឡើងជាមួយនឹងសមត្ថភាពអាចផ្ទុកយន្តហោះធន់ធ្ងន់ដូចជា Boeing 747 និង Airbus 320 ខណៈគម្រោងនេះស្ថិតនៅក្រោមទម្រង់វិនិយោគសាងសង់-ប្រតិបត្តិការ-ផ្ទេរ (BOT) ជាមួយរយៈពេលវិនិយោគចំនួន ៥០ ឆ្នាំ ។

គួរបញ្ជាក់ថា ព្រលានយន្តហោះខេត្តបរកែវដែលនឹងបញ្ចប់ការសាងសង់រួចរាល់ជាស្ថាពរនាពេលខាងមុខនេះ នឹងក្លាយជាការបោះជំហានឆ្ពោះ​ទៅមុខ​ដ៏​សំខាន់​មួយ​សម្រាប់​ខេត្ត​ភាគខាងជើងមួយនេះ ជាពិសេសគឺការបើកទ្វារ​ដល់​ការពង្រឹង ក៏ដូចជាការតភ្ជាប់​នៅទូទាំង​តំបន់ និងនៅក្រៅ​តំបន់ផងដែរ ៕

ប្រែសម្រួល៖ នាង រតនៈ

ប្រភព៖ Laotian Times

ចុចអាន៖​ រយៈពេល ៩ ខែ ឡាវ មានទេសចរបរទេសមកកម្សាន្តជាង ២.៤ លាននាក់ កើន ២៨៥ ភាគរយ