អាមេរិក បាញ់សម្លាប់មេទ័ពក្រុម ហេសបូឡា ២រូប ពេលកំពុងជិះរថយន្ត

តាមការចុះផ្សាយរបស់ CNN, សហរដ្ឋអាមេរិក បានបើកការវាយប្រហារដោយយន្តហោះគ្មានមនុស្សបើកនៅក្នុងរដ្ឋធានីអ៊ីរ៉ាក់ កាលពីយប់ថ្ងៃពុធទី៧ខែកុម្ភៈ ដោយបានសម្លាប់មេទ័ពកងជីវពល ហេសបូឡា ២រូបនិងសមាជិកក្រុមម្នាក់ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាមេរិក បានវាយប្រហារលើរថយន្ត​មួយ​គ្រឿង ​ដែល​អ្នក​ទាំង​បី​កំពុង​ធ្វើ​ដំណើរ​ក្នុង​សង្កាត់ Mashtal នៃទី​ក្រុង​បាកដាដ វេលា​ម៉ោង​ប្រហែល ៩ និង ៣០ នាទី​យប់។

ពីរនាក់ក្នុងចំណោមអ្នកស្លាប់ ត្រូវបានគេស្គាល់ថាមានឈ្មោះ Haj Arkhan Al-Alawi និង Wissam Mohammed ‘Abu Bakr’ al-Saadi ដែលទទួលបន្ទុកប្រតិបត្តិការរបស់ក្រុម ហេសបូឡា ក្នុងប្រទេសស៊ីរី។

ក្រោយការវាយប្រហារ បណ្តាញផ្សព្វផ្សាយជាច្រើន បានបញ្ចេញរូបថតដែលបង្ហាញពីសម្បកគ្រាប់ ហាក់ដូចជាមីស៊ីល Hellfire ដែលជាទូទៅត្រូវបានប្រើប្រាស់ដោយយន្តហោះគ្មានមនុស្សបើករបស់សហរដ្ឋអាមេរិក។

នៅក្នុងសេចក្តីថ្លែងការណ៍ដែលបង្ហោះលើបណ្តាញសង្គម X, ទីបញ្ជាការកណ្តាលរបស់ទីក្រុងវ៉ាស៊ីនតោន (CENTCOM) និយាយថា ខ្លួនបានបើកប្រតិបត្តិការ នៅក្នុងប្រទេសអ៊ីរ៉ាក់ ដើម្បីឆ្លើយតបទៅនឹងការវាយប្រហារលើយោធារបស់សហរដ្ឋអាមេរិក ដោយបានសម្លាប់មេបញ្ជាការក្រុម ហេសបូឡា ដែលជាអ្នកទទួលខុសត្រូវ ចំពោះការរៀបចំផែនការដោយផ្ទាល់ និងចូលរួមការវាយប្រហារលើកងកម្លាំងសហរដ្ឋអាមេរិកក្នុងតំបន់។

ពាក់ព័ន្ធរឿងនោះ សហរដ្ឋអាមេរិក បានស្តីបន្ទោសក្រុម ហេសបូឡា សម្រាប់ការវាយប្រហារកាលពីខែមុន ដែលបានសម្លាប់ទាហានខ្លួនបីនាក់ នៅឯមូលដ្ឋានមួយជាប់ព្រំដែនស៊ីរី-ហ្ស៊កដានី-អ៊ីរ៉ាក់។

សូមបញ្ជាក់ថា Al-Saadi គឺជាសមាជិកក្រុម ហេសបូឡា ជាន់ខ្ពស់បំផុត ដែលត្រូវបានសម្លាប់ក្នុងប្រទេសអ៊ីរ៉ាក់ ចាប់តាំងពីការវាយប្រហារដោយយន្តហោះគ្មានមនុស្សបើកកាលពីខែមករាឆ្នាំ២០២០ ដែលបានសម្លាប់លោក Abu Mahdi al-Muhandis និងឧត្តមសេនីយ៍អ៊ីរ៉ង់ Qassem Soleimani។ ឆ្លើយតបទៅនឹងការធ្វើឃាតនោះ ទីក្រុងតេហេរ៉ង់ បានទម្លាក់គ្រាប់បែកលើមូលដ្ឋានទ័ពអាមេរិក ដោយមិនខ្លាចរអា៕

អត្ថបទ៖ សុខ សុវណ្ណ

ចុចអាន៖ ក្រុមហេសបូឡា ព្រមាន អ៊ីស្រាអែល ប្រយ័ត្នស៊ីកំផ្លៀង បើស្ថានការណ៍តំបន់​ព្រំដែន លីបង់ នៅតែដុតរោល