ក្រុមហេសបូឡា ព្រមាន អ៊ីស្រាអែល ប្រយ័ត្នស៊ីកំផ្លៀង បើស្ថានការណ៍តំបន់​ព្រំដែន លីបង់ នៅតែដុតរោល

អ៊ីស្រាអែលនឹងស៊ីកំផ្លៀងរបស់ក្រុមប្រដាប់អាវុធហេសបូឡា ប្រសិនបើការបាញ់បោះគ្នានៅតាមតំបន់ព្រំដែន លីបង់-អ៊ីស្រាអែល នៅតែបន្តបែកផ្កាភ្លើងដូចសព្វថ្ងៃ ។ នេះបើយោងតាមការចុះផ្សាយដោយសារព័ត៌មាន Al Jazeera នៅថ្ងៃទី២០ ខែមករានេះ ។

លោក Naim Qassem ដែលជាមេបញ្ជាការទី ២ របស់ក្រុមប្រដាប់អាវុធហេសបូឡាបាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រថា សន្តិភាពនៅតំបន់ព្រំដែននឹងមិនវិលត្រលប់ទៅដូចដើមឡើយ ប្រសិនបើកងកម្លាំងអ៊ីស្រាអែលមិនបញ្ចប់ការសង្គ្រឺតវាយសន្ធាប់របស់ខ្លួននៅតំបន់ហ្គាហ្សាទេនោះ ។

លោក Qassem បានលើកឡើងទៀតថា “សត្រូវត្រូវតែដឹងភាគីខាងយើងប្រុងជើងការរួចជាស្រេច ហើយក៏កំពុងរៀបជើងព្រួលចំពោះភ្លើងសង្គ្រាមដែលផ្ទុះឆេះឡើងមិនចេះមិនចេះហើយផងដែរ ព្រោះឆន្ទៈរបស់យើងគឺដុតបញ្ឆេះបន្ថែមឲ្យមានការលុកលុយគ្មានដែនកំណត់” ។

ការកត់សម្គាល់នេះកើតមានឡើង បន្ទាប់ពីកាសែត Washington Post ចុះផ្សាយដោយដកស្រង់ប្រភពចេញពីអ្នកការទូតលោកខាងលិច និងមន្ត្រីលីបង់ ៣ រូបថា អ៊ីស្រាអែលបានដាក់មុខព្រួញបង្កើនភ្លើងសង្គ្រាមជាមួយក្រុមហេសបូឡានៅចុងខែមករានេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា ការបោះពាក្យសម្ដី និងការបាញ់បោះដាក់គ្នានៅតាមតំបន់ព្រំដែនរវាងលីបង់ និងអ៊ីស្រាអែលផ្ទុះឆេះឡើង ក្រោយការវាយឆ្មក់ដ៏សាហាវរបស់ក្រុមប្រដាប់អាវុធប៉ាឡេស្ទីនហាម៉ាសចូលទៅក្នុងទឹកដីនៃប្រទេសអ៊ីស្រាអែលកាលពីថ្ងៃទី ៧ តុលា ដោយបានសម្លាប់ប្រជាពលរដ្ឋស៊ីវិលប្រមាណ ១,២០០ នាក់ ។

ជាការឆ្លើយតប អ៊ីស្រាអែលបើកការវាយប្រហារយ៉ាងសន្ធាប់ទាំងតាមផ្លូវអាកាស និងដីគោកទៅលើតំបន់ហ្គាហ្សាដោយបានឆក់យកជីវិតពលរដ្ឋប៉ាឡេស្ទីន ២៤,៧០០ នាក់ និងជាង ៦២,១០០ នាក់រងរបួស ខណៈឈ្លើយសឹកជាង ១៣០ នាក់នៅតែស្ថិតក្នុងកណ្ដាប់ដៃក្រុមហាម៉ាសដដែល ៕

ដោយ ៖ សុខ ជីវ័ន្ត

ចុចអាន ៖ អាល្លឺម៉ង់ ថា ទ័ពលោក ពូទីន នឹងវាយលុកអង្គការណាតូ ៥ ទៅ ៨ ឆ្នាំទៀត