Connect with us

ព័ត៌មានអន្ដរជាតិ

ចំនួនអ្នកស្លាប់ក្នុងហេតុការណ៍បាក់ដីនៅ ហ្វីលីពីន កើនដល់ ៥៤ នាក់

បានផុស

នៅ

ចំនួនអ្នកស្លាប់ ដោយសារការរអិលបាក់ដីដែលបានវាយប្រហារភូមិជីករ៉ែមាសមួយកន្លែងនៅភាគខាងត្បូងប្រទេសហ្វីលីពីនបានកើនឡើងដល់ ៥៤ នាក់ហើយ និង ៦៣ នាក់ផ្សេងទៀតកំពុងបាត់ខ្លួន ខណៈភ្លៀងធ្លាក់ខ្លាំង ភក់ក្រាស់ និងការគំរាមកំហែងនៃការបាក់ដីបន្ថែមទៀតកំពុងបង្អាក់កិច្ចខិតខំប្រឹងប្រែងជួយសង្គ្រោះ ។ នេះបើយោងតាមការចេញផ្សាយរបស់សារពត៌មាន Al Jazeera កាលពីថ្ងៃទី១១ ខែកុម្ភៈកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបាក់ដីនេះបានវាយប្រហារភូមិមួយក្នុងខេត្ត Davao de Oro កាលពីយប់ថ្ងៃអង្គារសប្ដាហ៍មុន បន្ទាប់ពីភ្លៀងធ្លាក់ខ្លាំងជាច្រើនសប្តាហ៍​បានកប់ផ្ទៃដីនៃសហគមន៍ Masara ប្រមាណ ៨.៩ ហិកតា ។ សាកសពចំនួន ៥៤ នាក់ត្រូវបានរកឃើញ និងយ៉ាងហោចណាស់អ្នកស្រុកចំនួន ៣២ នាក់បានរួចជីវិត ប៉ុន្តែ ៦៣ នាក់ផ្សេងទៀតនៅតែបាត់ខ្លួន ហើយក្នុង​ចំណោម​អ្នក​បាត់​ខ្លួន​ទាំង​នោះ​មាន​កម្មករ​រុក​រក​រ៉ែ​មាស​ដែល​កំពុង​អង្គុយរង់ចាំ​ក្នុង​រថយន្ត​ក្រុង​ ២ ​គ្រឿង​ដើម្បីទៅ​ផ្ទះ​ នៅ​ពេល​ការ​បាក់​ដី​បាន​វាយ​ប្រហារ ​និង​កប់​ពួកគេបាត់ ។

ទន្ទឹមនោះ គ្រួសារជាង ១,១០០ ត្រូវបានរើទៅកាន់មជ្ឈមណ្ឌលជម្លៀសដើម្បីសុវត្ថិភាពរបស់ពួកគេ ខណៈមនុស្សជាង ៣០០ នាក់បានចូលរួមក្នុងការជួយសង្គ្រោះ ប៉ុន្តែត្រូវបានរារាំងដោយសារភ្លៀងធ្លាក់ខ្លាំង ភក់ក្រាស់ និងការគំរាមកំហែងនៃការបាក់ដីបន្ថែមទៀត ។

គួរបញ្ជាក់ថា ភ្លៀងធ្លាក់ខ្លាំង​បាន​បោកបក់តំបន់​ភាគ​ខាង​ត្បូងរបស់ប្រទេសនេះ​អស់​រយៈពេល​ជាច្រើន​សប្តាហ៍ ដោយ​បង្ក​ឲ្យមាន​ការ​បាក់​ដី និង​ទឹកជំនន់ ដែល​បាន​បង្ខំឲ្យ​មនុស្ស​រាប់ម៉ឺន​នាក់ផ្លាស់​ទៅ​ទីជម្រកបណ្ដោះអាសន្ន ខណៈគ្រោះរញ្ជួយដីក៏បានបំផ្លាញផ្ទះសម្បែង និងអគារជាច្រើននៅក្នុងប៉ុន្មានខែថ្មីៗនេះផងដែរ ៕

អត្តបទ ៖ ប៊ុន សុភាព

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម