ព្រឹត្តិការណ៍មួយជីវិតមានម្តង នឹងកើតឡើងក្នុងឆ្នាំនេះ ហើយមនុស្សអាចមើលឃើញដោយភ្នែកទទេ 

តាមការចុះផ្សាយរបស់ Scitech​ Daily, ក្នុងឆ្នាំ២០២៤នេះ នឹងកើតមានព្រឹត្តិការណ៍កម្រនៅអវកាសដែលមួយជីវិតមនុស្សជួបប្រទះតែម្តងប៉ុណ្ណោះ ហើយអ្វីដែលកាន់តែអស្ចារ្យគឺថា អ្នកអាចមើលឃើញវាដោយភ្នែកទទេទៀតផង។ នោះគឺជាព្រឹត្តិការណ៍ផ្កាយផ្ទុះ ដែលក្រុមអ្នកវិទ្យាសាស្រ្តឲ្យឈ្មោះថា T Coronae Borealis។

ព្រឹត្តិការណ៍ខាងលើនេះ ត្រូវបានក្រុមអ្នកវិទ្យាសាស្រ្តអះអាងថា ៨០ឆ្នាំទើបកើតឡើងម្តងឬអាចនិយាយបានថា មួយជីវិតមនុស្សអាចជួបប្រទះតែម្តងគត់ ព្រោះថា ពេលដល់ចំណុចកំពូល វត្ថុធាតុនៅជុំវិញផ្កាយនឹងផ្ទុះ ជាហេតុបង្កឲ្យមានពន្លឺដ៏ខ្លាំង ជះចេញទៅកាន់ប្រព័ន្ធផ្កាយនានានៅជុំវិញ។

ប្រព័ន្ធផ្កាយ T Coronae Borealis ឬ T CrB ស្ថិតនៅចម្ងាយ៣០០០ឆ្នាំពន្លឺពីផែនដី ហើយការផ្ទុះលើកចុងក្រោយរបស់វាគឺនៅឆ្នាំ១៩៤៦ ដូច្នេះហើយក្រុមតារាវិទូជឿជាក់ថា ឆ្នាំ២០២៤ ព្រឹត្តិការណ៍នេះនឹងកើតឡើងម្តងទៀត ពោលគឺនៅចន្លោះខែកុម្ភៈដល់ខែកញ្ញា គ្រាន់តែមិនច្បាស់ថា វាកើតឡើងចំថ្ងៃណាឲ្យប្រាកដប៉ុណ្ណោះ។

តាមទ្រឹស្តីវិទ្យាសាស្រ្ត ប្រព័ន្ធផ្កាយនេះជាធម្មតាមានកម្លាំងរ៉ិចទ័រ +10 ដែលងងឹតខ្លាំងមិនអាចមើលឃើញដោយភ្នែកទទេបានទេ តែក្នុងអំឡុងព្រឹត្តិការណ៍នេះ កម្លាំងរបស់វានឹងកើនដល់រ៉ិចទ័រ +2 មានពន្លឺខ្លាំងស្រដៀងទៅនឹងផ្កាយខាងជើង Polaris ដែរ។

ទោះបីជាយ៉ាងណាក៏ដោយ ក្រុមអ្នកវិទ្យាសាស្រ្តកំពុងតាមដានព្រឹត្តិការណ៍នេះជាប់ជានិច្ច ហើយនឹងផ្តល់ព័ត៌មានលម្អិតជាបន្តបន្ទាប់ ទាក់ទងនឹង T CrB៕

អត្ថបទ៖ សុខ សុវណ្ណ

ចុចអាន៖ រកឃើញ Black Hole មួយទៀត មានពណ៌ក្រហមឆ្អិនឆ្អៅ ធ្ងន់ជាងព្រះអាទិត្យ ៤០លានដង