គណបក្សប្រឆាំង កូរ៉េខាងត្បូង ឈ្នះការបោះឆ្នោតសភាភ្លូកទឹកភ្លូកដី

ការបោះឆ្នោតសភានៅកូរ៉េខាងត្បូងដែលរៀបចំឡើងកាលពីថ្ងៃទី១០ ខែមេសាកន្លងទៅស្ទើរតែបិទបញ្ចប់ការរាប់សន្លឹកឆ្នោតជាផ្លូវការហើយ ខណៈគណបក្សប្រឆាំងទទួលបានជ័យជម្នះភ្លូកទឹកភ្លូកដី ហើយនេះក៏ជាបញ្ហាប៉ះពាល់ទៅដល់លោកប្រធានាធិបតី Yoon Suk Yeol និងគណបក្សអភិរក្សនិយមរបស់លោកក្នុងកៅអីសភាផងដែរ ។ នេះបើយោងតាមការចេញផ្សាយដោយទីភ្នាក់ងារព័ត៌មាន Yonhap ចេញផ្សាយនៅថ្ងៃទី១១ ខែមេសានេះ ។

គណៈកម្មការជាតិរៀបចំការបោះឆ្នោតបានឲ្យដឹងថា គិតត្រឹមម៉ោង ១១ ព្រឹកថ្ងៃព្រហស្បតិ៍នេះ (ម៉ោងនៅកូរ៉េខាងត្បូង) សន្លឹកឆ្នោតរាប់បាន ៩៩ ភាគរយទៅហើយ ក្នុងនោះគណបក្សប្រជាធិបតេយ្យ (DP) កើបបានអាសនៈចំនួន ១៧០ ក្នុងចំណោមអាសនៈសភាសរុប ៣០០ ខណៈគណបក្សអំណាចប្រជាជន (PPP) របស់លោក Yoon បានត្រឹម ១០៨ អាសនៈប៉ុណ្ណោះ ។

ពាក់ព័ន្ធនឹងការទទួលបានសំឡេងភាគតិចនៅក្នុងសភានេះទៀតសោត កំពុងធ្វើឲ្យលោកប្រធានាធិបតី Yoon ដែលនឹងបន្តកាន់តំណែងក្នុងឆ្នាំទី ៣ នាពេលខាងមុខនេះ កាន់តែក្រពុលមុខ និងស្ថិតក្នុងពេលវេលាដ៏លំបាកក្នុងការស្ដារ ក៏ដូចជាលើកកម្ពស់គោលនយោបាយរបស់លោក ស្របពេលដែលក៏កំពុងត្រដាបត្រដួសក្នុងការដោះស្រាយបញ្ហាសេដ្ឋកិច្ចស្រាប់ផង ។

ចំណែកប្រធានគណបក្សប្រជាធិបតេយ្យ (DP) លោក Lee Jae-myung ដែលបានដឹកនាំយុទ្ធនាការឃោសនាបោះឆ្នោតតតាំងនឹងលោក Yoon បាននិយាយថា ឥឡូវនេះអាទិភាពកំពូលរបស់យើងគឺធ្វើយ៉ាងណាដើម្បីស្ដារសេដ្ឋកិច្ចឲ្យមានសន្ទុះឡើងវិញ ជាពិសេសគឺសម្រាប់ក្រុមគ្រួសារដែលមានកម្រិតមធ្យម ។

គួរបញ្ជាក់ថា ក្រុមអ្នកវិភាគនយោបាយចាត់ទុកលទ្ធផលបោះឆ្នោតសភានាពេលនេះ គឺជាការធ្វើប្រជាមតិមួយចំពោះការកាន់អំណាចរបស់លោកប្រធានាធិបតី Yoon ស្របពេលដែលប្រជាប្រិយភាពរបស់លោកក៏កាន់តែហៅលែងឮ ចំពេលមានវិបត្តិលើការដោះស្រាយថ្លៃចំណាយនៃការរស់នៅរបស់ប្រជាពលរដ្ឋ ក៏ដូចជាជម្លោះនយោបាយជាដើម ៕

ដោយ ៖ សុខ ជីវ័ន្ត

ចុចអាន ៖ អ៊ីស្រាអែល បញ្ជាក់ពេលវេលាដែល អ៊ីរ៉ង់ នឹងឲ្យខ្លួនភ្លក់រសជាតិវាយប្រហារ​សងសឹក