សព្វាវុធណាតូបញ្ជូនទៅជួយអ៊ុយក្រែន ត្រូវរុស្ស៊ី វាយយកបាន ដាក់តាំងបង្អួតឲ្យប្រជាជនទស្សនា

ប្រទេសរុស្ស៊ី បានតាំងពិព័រណ៍បង្អួតសព្វាវុធដែលខ្លួនរឹបអូសបានពីទ័ពអ៊ុយក្រែនដើម្បីឲ្យប្រជាជនទស្សនា ហើយសព្វាវុធដែលតាំងបង្ហាញនេះទៀតសោត គឺសុទ្ធសឹងតែជារបស់អង្គការណាតូ បញ្ជូនទៅជួយទីក្រុងកៀវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម RT, កម្មវិធីនេះ ត្រូវបានរៀបចំឡើងនៅខាងក្រៅសារមន្ទីជ័យជម្នះ ក្នុងទីក្រុងមូស្គូកាលពីថ្ងៃពុធទី១ខែឧសភា ដោយគេបានឃើញសព្វាវុធជាច្រើនជាពិសេសគ្រឿងសឹកធុនធ្ងន់តែម្តងដូចជា រថក្រោះ ប្រព័ន្ធបាញ់មីស៊ីល និងយន្តហោះគ្មានមនុស្សបើកជាដើម។ 

ការតាំងពិពណ៌នេះក៏រួមមានរថយន្តសរុបចំនួន៣២គ្រឿង ដែលរុស្ស៊ីរឹបអូសបានពីកងកម្លាំងអ៊ុយក្រែនផងដែរ ជាពិសេសគ្រឿងសឹកដែលផ្គត់ផ្គង់ដោយប្រទេសជាសមាជិកអង្គការណាតូតែម្តង។ ក្រៅពីយានយន្ត គេបានឃើញអាវុធធុនតូចៗជាច្រើនប្រភេទ គ្រាប់បែកដៃ និងគ្រឿងសឹកយោធាផ្សេងទៀត។

អ្វីដែលគេចាប់អារម្មណ៍ខ្លាំងក្នុងការតាំងពិព័រណ៍នោះ គឺរថពាសដែកទំនើបៗដែលអ៊ុយក្រែនទទួលបានក្នុងអំឡុងពេលមានជម្លោះ ដូចជារថក្រោះធុន Leopard 2A6 ផលិតដោយអាល្លឺម៉ង់ និងរថក្រោះប្រយុទ្ធ M1A1 SA Abrams ផលិតដោយសហរដ្ឋអាមេរិក។

មិនត្រឹមប៉ុណ្ណឹង យានធុនស្រាល CV90 ផលិតនៅប្រទេសស៊ុយអែត យានប្រយុទ្ធថ្មើរជើង Marder ផលិតដោយអាល្លឺម៉ង់ ក៏ដូចជាយានផ្សេងៗទៀតក៏ត្រូវតាំងបង្ហាញដែរ។

កាលពីខែសីហាឆ្នាំ២០២៣ ក្រសួងការពារជាតិរុស្ស៊ី ក៏បានរៀបចំការតាំងពិព័រណ៍អាវុធលោកខាងលិចដែលរឹបអូសបាននៅជិតទីក្រុងមូស្គូដូចគ្នានេះ ដោយបង្ហាញសព្វាវុធនិងគ្រឿងសឹកច្រើនប្រភេទរាប់ចាប់ពីរថពាសដែកអាមេរិក M-113 និង CV90-40 របស់ស៊ុយអែត រហូតដល់រថក្រោះ AMX-10RCR របស់បារាំង និងរថពាសដែក Bushmaster របស់អូស្ត្រាលី។

ការតាំងពិព័រណ៌នោះ បានបង្ហាញពីសព្វាវុធជាង៨៧០ប្រភេទ ដែលរឹបអូសដោយកងកម្លាំងរុស្ស៊ី រួមទាំងគ្រឿងសឹកផលិតដោយសូវៀត និងអ៊ុយក្រែនទៀតផង។

រម្លឹកទៅកាលពីដើមឆ្នាំនេះ ប្រធាធិបតីរុស្ស៊ីលោក វ្ល៉ាឌីមៀរ ពូទីន បានឲ្យដឹងថា អ៊ុយក្រែនកំពុងប្រឈមមុខនឹងបរាជ័យនៅសមរភូមិដ៏សំខាន់ ហើយការវាយលុករបស់ទីក្រុងកៀវ មិនអាចបំពេញចិត្តអ្នកគាំទ្ររបស់ពួកគេនៅបរទេសបានទេ ជាពិសេសជម្លោះអ៊ុយក្រែន បានលាតត្រដាងឲ្យឃើញការពិត អំពីសព្វាវុធលោកខាងលិច។

ស្របពេលជាមួយគ្នានោះ រដ្ឋមន្ត្រីការពារជាតិរុស្ស៊ី លោក Sergey Shoigu ក៏បាននិយាយដែរថា អ៊ុយក្រែន បានបាត់បង់រថក្រោះនិងយានប្រយុទ្ធថ្មើរជើងជាង ១៤០០០ គ្រឿង ចាប់តាំងពីរុស្ស៊ី បើកប្រតិបត្តិការយោធានៅក្នុងប្រទេសនេះ៕

សូមទស្សនាវីដេអូ៖

អត្ថបទ​៖ សុខ សុវណ្ណ

ចុចអាន៖ លោក ពូទីន៖ ជម្លោះអ៊ុយក្រែន លាតត្រដាងការពិតអំពីសព្វាវុធលោកខាងលិច