ប្រជាជន ប៉ាឡេស្ទីន ជាងកន្លះលាននាក់រត់ភៀសខ្លួន ខណៈ អ៊ីស្រាអែល បង្កើនការវាយលុកនៅ ហ្គាហ្សា

មកដល់ពេលនេះប្រជាជនប៉ាឡេស្ទីនជាងកន្លះលាននាក់ហើយត្រូវបានជម្លៀសចេញពីតំបន់ហ្គាហ្សា ខណៈ​កងកម្លាំងអ៊ីស្រាអែលបានបង្កើនការវាយប្រហារនៅទូទាំងតំបន់ដែលកំពុងត្រូវបានឡោមព័ទ្ធមួយនេះ ជាមួយនឹងការទម្លាក់គ្រាប់បែកលើជំរុំជនភៀសខ្លួន និងបញ្ជូនរថក្រោះវាយប្រហារចូលកាន់តែជ្រៅទៅទីក្រុង Rafah ភាគខាងត្បូងថែមទៀត ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី​១៥ ខែឧសភា​ ។

ទន្ទឹមនោះ យោធាអ៊ីស្រាអែលបន្តបញ្ជាឲ្យប្រជាជនបន្ថែមទៀតត្រូវជម្លៀសខ្លួនចេញពីតំបន់ភាគខាងជើង ខណៈមានការប្រយុទ្ធគ្នារវាងទាហានអ៊ីស្រាអែល និងក្រុមយុទ្ធជនហាម៉ាសក្នុងរយៈពេលប៉ុន្មានថ្ងៃថ្មីៗនេះ បន្ទាប់ពីអ៊ីស្រាអែលបើកការវាយប្រហារមកលើតំបន់នេះសាជាថ្មីដើម្បីកម្ចាត់ក្រុមហាម៉ាស ។

យោងតាមអង្គការសហប្រជាជាតិបានឲ្យដឹងថា ជនជាតិប៉ាឡេស្ទីនជាងកន្លះលាននាក់ត្រូវបានផ្លាស់ទីលំនៅក្នុងរយៈពេលប៉ុន្មានថ្ងៃថ្មីៗនេះ ដោយសារតែការកើនឡើងនូវប្រតិបត្តិការយោធារបស់អ៊ីស្រាអែល ទាំងនៅតំបន់ហ្គាហ្សាភាគខាងត្បូង និងភាគខាងជើង ខណៈរហូតមកដល់ពេលនបានជម្លៀសមនុស្សយ៉ាងហោចណាស់ ១០០,០០០ នាក់ ។ ចំណែកនៅក្នុងទីក្រុង Rafah មានប្រជាជនប៉ាឡេស្ទីនប្រមាណ ៤៥០,០០០ ក៏ត្រូវបានជម្លៀសចេញក្នុងរយៈពេលមួយសប្តាហ៍កន្លងមកនេះដែរ ។

បន្ថែមពីនេះ ​ប្រតិបត្តិការសាជាថ្មីនៅទីក្រុង Rafah​​ នេះបានធ្វើឲ្យប្រមុខ​អង្គការ​សហ​ប្រជាជាតិ (UN) លោក Antonio Guterres ព្រួយបារម្ភយ៉ាងខ្លាំង ហើយទាមទារឲ្យមានការការពារជនស៊ីវិល និងបានអំពាវនាវឲ្យមានបទឈប់បាញ់ម្ដងហើយម្ដងទៀតផងដែរ ។

គួរបញ្ជាក់ថា ការជម្លៀសប្រជាជនប៉ាឡេស្ទីនដោយបង្ខំបានធ្វើឲ្យមានការលំបាកកាន់តែខ្លាំងឡើងសម្រាប់បុគ្គលិកជំនួយក្នុងការចែកចាយជំនួយ ស្របពេលដែលការផ្គត់ផ្គង់បច្ចុប្បន្នក៏កំពុងថយចុះផងដែរ ដោយធ្វើឲ្យពលរដ្ឋប្រឈមនឹងកម្រិតគ្រោះមហន្តរាយនៃភាពអត់ឃ្លាននៅក្នុងជំរុំតង់បណ្តោះអាសន្ន ។

ម្យ៉ាងវិញទៀតកងកម្លាំងអ៊ីស្រាអែលកំពុងបន្តរារាំងមិនឲ្យរថយន្តផ្ដល់ជំនួយមនុស្សធម៌ចូលតាមរយៈច្រកព្រំដែន Rafah ជាមួយអេហ្ស៊ីប បន្ទាប់ពីកងកម្លាំងរបស់ខ្លួនបានដណ្តើមកាន់កាប់តំបន់មួយនេះកាលពីថ្ងៃទី៧ ខែឧសភា ដែលនឹងកាន់តែបង្កើនការលំបាកដល់កិច្ចខិតខំក្នុងការផ្ដល់ជំនួយ ៕

អត្ថបទ៖ ប៊ុន សុភាព