ចិន ជោគជ័យចុះចតយានអវកាសនៅចុងឋានព្រះចន្ទ ដើម្បីយកសំណាកមកផែនដីវិញ

នៅថ្ងៃអាទិត្យទី២ខែមិថុនា យានអវកាសគ្មានមនុស្សបើករបស់ចិន បានចុះចតដោយជោគជ័យនៅចុងនៃភពព្រះចន្ទ ក្នុងការប៉ុនប៉ងលើកដំបូងលើលោកដើម្បីនាំយកសំណាកពីតំបន់ដែលកម្រមានគេទៅដល់ មកភពផែនដីវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីប្រព័ន្ធផ្សព្វផ្សាយរដ្ឋ គម្រោងនេះគឺកិច្ចខិតខំតស៊ូរបស់ប្រទេសចិន ដើម្បីក្លាយជាមហាអំណាចអវកាសនិងនាំមុខគេ ក្នុងការអភិវឌ្ឍអវកាស ចំពេលមានការប្រកួតប្រជែងកាន់តែខ្លាំងជាមួយប្រទេសនានាដូចជាសហរដ្ឋអាមេរិក និងឥណ្ឌា។

យានអវកាស Chang’e-6 ត្រូវបានបាញ់បង្ហោះនៅលើរ៉ុកកែត Long March-5 ចេញពីទីលានបង្ហោះយានអវកាស Wenchang ស្ថិតនៅលើឆ្នេរសមុទ្រនៃខេត្ត Hainan ភាគខាងត្បូង កាលពីថ្ងៃទី៣ខែឧសភា។

រម្លឹកទៅខែមករាឆ្នាំ២០១៩ យានអវកាស Chang’e-4 របស់ប្រទេសចិន បានធ្វើការចុះចតយ៉ាងរលូនជាលើកដំបូង នៅតំបន់ដាច់ឆ្ងាយនៃឋានព្រះចន្ទ ហើយបញ្ជូនរូបថតត្រឡប់មកវិញប្រកបដោយជោគជ័យ ហើយនៅក្នុងខែធ្នូឆ្នាំ២០២០ យានអវកាស Chang’e-5 ក៏បានវិលត្រឡប់មកផែនដីវិញ ជាមួយនឹងសំណាកដីពីឋានព្រះចន្ទជាលើកដំបូងក្នុងរយៈពេល៤៤ឆ្នាំផងដែរ។

សូមបញ្ជាក់ថា ប្រទេសចិន មានគោលដៅបញ្ជូនមនុស្សទៅឋានព្រះចន្ទក្នុងឆ្នាំ២០៣០ និងបញ្ចប់មូលដ្ឋានស្រាវជ្រាវទីនោះនៅឆ្នាំ២០៣៥៕

អត្ថបទ៖ សុខ សុវណ្ណ