ព័ត៌មានអន្ដរជាតិ

កូនសោ បញ្ចប់សង្គ្រាមអ៊ុយក្រែន ស្ថិតក្នុងដៃ អាមេរិក

បានផុស

១ year មុន

នៅ

ថ្ងៃព្រហស្បតិ៍ ៦ មិថុនា ២០២៤

ដោយ

តាមការចុះផ្សាយរបស់ RT នៅថ្ងៃព្រហស្បតិ៍ទី៦ខែមិថុនា ប្រធានាធិបតីរុស្ស៊ី លោក វ្ល៉ាឌីមៀរ ពូទីន អះអាងថា ទីក្រុងវ៉ាស៊ីនតោន កំពុងកាន់កូនសោហើយមានអំណាច បញ្ចប់ការបង្ហូរឈាមនៅអ៊ុយក្រែន ពោលគឺគ្រាន់តែសហរដ្ឋអាមេរិក ឈប់ផ្តល់សព្វាវុធដល់ទីក្រុងកៀវ នោះសង្គ្រាមនឹងចប់។

ប្រធានាធិបតីរុស្ស៊ី លោក វ្ល៉ាឌីមៀរ ពូទីន (រូបថត៖ AFP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងជាមួយប្រមុខទីភ្នាក់ងារព័ត៌មានអន្តរជាតិ នៅក្រៅវេទិកាសេដ្ឋកិច្ចអន្តរជាតិ St Petersburg (SPIEF) លោក ពូទីន បង្ហើបថា លោកបានទទួលសំបុត្រពីប្រធានាធិបតីអាមេរិក ចូ បៃដិន ទាក់ទងនឹងវិបត្តិអ៊ុយក្រែន ហើយលោកឆ្លើយតបថា “ប្រសិនបើអ្នកចង់បញ្ឈប់អរិភាពនៅអ៊ុយក្រែនមែន សូមឈប់ផ្គត់ផ្គង់អាវុធ។ យ៉ាងយូរ២-៣ខែ អ្វីៗនឹងចប់សព្វគ្រប់”។

ច្បាស់ណាស់តាមការបញ្ជាក់ពីលោក ពូទីន, ការបង្កើនជំនួយយោធារបស់លោកខាងលិចដល់អ៊ុយក្រែន កាន់តែគំរាមកំហែងធ្វើឲ្យជម្លោះរីកធំឡើងៗ ខណៈកាលពីខែមេសា សមាជិកសភាអាមេរិក បានអនុម័តជំនួយបន្ថែមមានទំហំទឹកប្រាក់៦១ពាន់លានដុល្លារឲ្យទីក្រុងកៀវ។

ពាក់ព័ន្ធបញ្ហានេះ ប្រធានាធិបតីរុស្ស៊ីអះអាងថា មេដឹកនាំអាមេរិកណាក៏ដោយ ក៏មិនខ្វល់ពីជោគវាសនារបស់អ៊ុយក្រែនដែរ គេខ្វល់តែពីភាពអស្ចារ្យរបស់អាមេរិកប៉ុណ្ណោះ។ គេមិនមែនប្រយុទ្ធដើម្បីអ៊ុយក្រែនទេ តែគេកំពុងតស៊ូដើម្បីភាពជាអ្នកដឹកនាំរបស់គេនៅលើឆាកពិភពលោក។ គេមិនចង់ឲ្យរុស្ស៊ីឈ្នះ ព្រោះគេគិតថា វានឹងធ្វើឲ្យខូចដល់ការដឹកនាំរបស់អាមេរិក។

ស្របពេលជាមួយគ្នានោះ ជុំវិញការបើកដៃឲ្យអ៊ុយក្រែន បាញ់ចូលដីរុស្ស៊ី លោកពូទីនបានប្រកាសឆ្លើយតបថា ទីក្រុងមូស្គូនឹងផ្តល់អាវុធដល់ប្រទេសទាំងឡាយណា ដែលចង់វាយប្រហារលើគោលដៅរបស់លោកខាងលិច។

លោកព្រមានថា “សកម្មភាពបែបនេះ អាចនាំឲ្យមានបញ្ហាធ្ងន់ធ្ងរ។ ប្រសិនបើនរណាម្នាក់គិតថា វាអាចទៅរួចក្នុងការផ្គត់ផ្គង់អាវុធបែបនេះទៅកាន់តំបន់សង្រ្គាមដើម្បីវាយប្រហារទឹកដីរបស់យើងនិងបង្កើតបញ្ហាសម្រាប់យើងនោះ ហេតុអ្វីបានជាយើងគ្មានសិទ្ធិផ្គត់ផ្គង់អាវុធប្រភេទដូចគ្នានេះ ទៅកាន់កន្លែងផ្សេងៗនៃពិភពលោក ដើម្បីវាយប្រហារពួកគេបាន? នេះគឺជាឆ្លើយតប”។

ទន្ទឹមនោះ លោកពូទីន បានចង្អុលចំៗទៅប្រទេសអាល្លឺម៉ង់ ដែលថ្មីៗ បានបើកភ្លើងខៀវឲ្យអ៊ុយក្រែន វាយលុកគោលដៅនៅក្នុងប្រទេសរុស្ស៊ីជាមួយនឹងអាវុធរយៈចម្ងាយឆ្ងាយផលិតដោយទីក្រុងបែរឡាំង ដោយលោកសង្កត់ធ្ងន់ថា “នៅពេលគេនិយាយថា នឹងមានមីស៊ីលបន្ថែមទៀត ដែលនឹងវាយប្រហារគោលដៅនៅលើទឹកដីរុស្ស៊ីនោះ ច្បាស់ណាស់ វាបំផ្លាញទំនាក់ទំនងរុស្ស៊ី-អាល្លឺម៉ង់បាត់ទៅហើយ”៕

អត្ថបទ៖ សុខ សុវណ្ណ

ចុចអាន៖ ពូទីន ប្រកាសថា បើប្រទេសណាចង់វាយប្រហារលោកខាងលិច រុស្ស៊ីនឹងជួយអាវុធ