ពូទីន ប្រកាសថា បើប្រទេសណាចង់វាយប្រហារលោកខាងលិច រុស្ស៊ីនឹងជួយអាវុធ

តាមការចុះផ្សាយរបស់ RT នៅថ្ងៃព្រហស្បតិ៍ទី៦ខែមិថុនា ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសថា ទីក្រុងមូស្គូនឹងផ្តល់អាវុធដល់ប្រទេសទាំងឡាយណា ដែលចង់វាយប្រហារលើគោលដៅរបស់លោកខាងលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន ព្រមានបែបនេះ ​ខណៈ​​លោក​ខាង​លិច ​បាន​ផ្តល់​អាវុធ​រយៈ​ចម្ងាយ​ឆ្ងាយ​ដល់​អ៊ុយក្រែន ហើយមានប្រទេសជាច្រើន រួមទាំងសហរដ្ឋអាមេរិកផងនោះ បានបើកដៃឲ្យទីក្រុងកៀវ វាយប្រហារលើគោលដៅនានានៅក្នុងប្រទេសរុស្ស៊ី ថែមទៀត។

លោកបានប្រាប់អ្នកសារព័ត៌មាននៅខាងក្រៅវេទិកាសេដ្ឋកិច្ចអន្តរជាតិ St Petersburg (SPIEF) ថា “សកម្មភាពបែបនេះ អាចនាំឲ្យមានបញ្ហាធ្ងន់ធ្ងរ។ ប្រសិនបើនរណាម្នាក់គិតថា វាអាចទៅរួចក្នុងការផ្គត់ផ្គង់អាវុធបែបនេះទៅកាន់តំបន់សង្រ្គាមដើម្បីវាយប្រហារទឹកដីរបស់យើ​ងនិងបង្កើតបញ្ហាសម្រាប់យើងនោះ ហេតុអ្វីយើងគ្មានសិទ្ធិផ្គត់ផ្គង់អាវុធប្រភេទដូចគ្នានេះ ទៅកាន់កន្លែងផ្សេងៗនៃពិភពលោក ដើម្បីវាយប្រហារពួកគេបាន? នេះគឺជាឆ្លើយតប”។

ស្របពេលជាមួយគ្នានោះដែរ លោកពូទីន បានចង្អុលចំៗទៅប្រទេសអាល្លឺម៉ង់ ដែលថ្មីៗ បានបើកភ្លើងខៀវឲ្យអ៊ុយក្រែន វាយលុកគោលដៅនៅក្នុងប្រទេសរុស្ស៊ីជាមួយនឹងអាវុធរយៈចម្ងាយឆ្ងាយផលិតដោយទីក្រុងបែរឡាំង។

លោកពូទីនសង្កត់ធ្ងន់ថា “នៅពេលគេនិយាយថា នឹងមានមីស៊ីលបន្ថែមទៀត ដែលនឹងវាយប្រហារគោលដៅនៅលើទឹកដីរុស្ស៊ីនោះ ច្បាស់ណាស់ វាបំផ្លាញទំនាក់ទំនងរុស្ស៊ី-អាល្លឺម៉ង់បាត់ទៅហើយ”។

មិនមែនតែអាល្លឺម៉ង់ទេ សូម្បីតែលោក ចូ បៃដិន ក៏អនុញ្ញាតឲ្យអ៊ុយក្រែនប្រើប្រាស់អាវុធដែលផ្គត់ផ្គង់ដោយអាមេរិក ដើម្បីវាយប្រហារលើគោលដៅនានាក្នុងប្រទេសរុស្ស៊ីដែរ ប៉ុន្តែចំពោះតែនៅជិតតំបន់ Kharkiv ប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ សមាជិកណាតូ ៦ប្រទេសនៅជាប់រុស្ស៊ី កសាង “ជញ្ជាំងយន្តហោះគ្មានមនុស្សបើក” ទប់ទល់ជាមួយ ពូទីន