ពូទីន ដាក់លក្ខខណ្ឌតែមួយគត់ បើអ៊ុយក្រែន ធ្វើបាន បទឈប់បាញ់នឹងកើតឡើងភ្លាម

តាមការចុះផ្សាយរបស់ RT, លោក វ្ល៉ាឌីមៀរ ពូទីន បានបញ្ជាក់យ៉ាងច្បាស់ថា លក្ខខណ្ឌតែមួយគត់ ដែលអាចឲ្យបទឈប់បាញ់នៅអ៊ុយក្រែន លេចចេញជារូបរាងបាននោះគឺ ទីក្រុង ​កៀវ ត្រូវតែដកទ័ពចេញពីទឹកដីដែលរុស្ស៊ីកាត់យក ជាមុនសិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបញ្ជាក់ច្បាស់ៗបែបនេះក្នុងអំឡុងកិច្ចប្រជុំជាមួយឯកអគ្គរដ្ឋទូតរុស្ស៊ីនៅទីក្រុងមូស្គូ កាលពីថ្ងសសុក្រទី១៤ខែមិថុនា ហើយការអះអាងនេះទៀតសោត កើតឡើងមុនពេលថ្នាក់ដឹកនាំមកពី៩០ប្រទេស ត្រៀមចូលរួមជំនួបកំពូលស្តីពីសន្តិភាពអ៊ុយក្រែន ដែលរៀបចំឡើងនៅប្រទេសស្វីស។

លោក ពូទីន សង្កត់ធ្ងន់ថា បទឈប់បាញ់អាចកើតឡើងទៅបាន លុះត្រាតែរដ្ឋាភិបាលអ៊ុយក្រែន ដកកងកម្លាំងចេញពីតំបន់ទាំង៤ដែលរុស្ស៊ីកាត់យកដូចជា Donetsk, Luhansk, Kherson និង Zaporizhzhia ជាមុនសិន ហើយពេលណាទីក្រុងកៀវសម្រេចចិត្តធ្វើតាមហើយនោះ បទឈប់បាញ់នឹងកើតឡើងមួយរំពេចតែម្តង។

លើសពីនេះ លោកក៏ដាស់តឿនដែរថា អ៊ុយក្រែន គួរបោះបង់គំនិតចូលរួមជាមួយអង្គការណាតូចោលទៅ បើចង់ឲ្យរុស្ស៊ី បញ្ឈប់ប្រតិបត្តិការយោធាមែន។

យ៉ាងណាក្តី ភាគីអ៊ុយក្រែន បានប្រតិកម្មខ្លាំងៗទៅនឹងលក្ខខណ្ឌនេះ ដោយហៅថាជាសំណើដ៏អាម៉ាស់ និងប្រៀបប្រដូចទៅនឹងឱសានវាទតាមបែបហ៊ីត្លែរ។

ទន្ទឹមនោះ ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានប្រាប់បណ្តាញទូរទស្សន៍ Sky TG24 ពេលចូលរួមក្នុងកិច្ចប្រជុំ G7 នៅភាគខាងត្បូងប្រទេសអ៊ីតាលីថា “តើខ្ញុំអាចនិយាយអ្វីបាន? សារទាំងនេះគឺជាសារឱសានវាទ វាមិនខុសពីឱសានវាទដែលគាត់ដាក់ពីមុននោះទេ។ គាត់​ចង់​ឲ្យ​យើង​បោះបង់​ទឹកដី​ដែល​យើង​កាន់កាប់ ដូច្នេះគាត់មិនឈប់ទេ”។

សូមបញ្ជាក់ថា ជាមួយនឹងសេចក្តីប្រកាសបើកប្រតិបត្តិការយោធាប្រឆាំងរដ្ឋាភិបាលទីក្រុងកៀវ ក្នុងខែកុម្ភៈឆ្នាំ ២០២២, លោក ពូទីន បញ្ជាក់ថា ទីក្រុងមូស្គូមានគោលបំណងចង់ឲ្យអ៊ុយក្រែនធ្វើវិយោធកម្ម និងការធានាថា ទីក្រុងកៀវ នឹងមិនចូលរួមជាមួយណាតូ ឬប្លុកយោធាប្រឆាំងរុស្ស៊ីណាមួយឡើយ៕

អត្ថបទ៖ សុខ សុវណ្ណ

ចុចអាន៖ ពូទីន៖ រុស្ស៊ី មាននុយក្លេអ៊ែរ ខ្លាំងជាងគ្រាប់បែកអាមេរិក ទម្លាក់នៅ ហ៊ីរ៉ូស៊ីម៉ា ៤ដង