តៃវ៉ាន់ ថា ចិនរឹបអូសទូកនេសាទ និងចាប់នាវិករបស់ខ្លួន 

យោងតាមការចេញផ្សាយរបស់សារពត៌មាន Al Jazeera កាលពីថ្ងៃទី០៣ខែកក្កដា, ឆ្មាំសមុទ្រចិន បានរឹបអូសទូកនេសាទតៃវ៉ាន់មួយគ្រឿង យកទៅកំពង់ផែនៅចិនដីគោក ខណៈតៃវ៉ាន់ទាមទារឲ្យទីក្រុងប៉េកាំងប្រគល់ទូកនោះមកវិញ និងដោះលែងនាវិកទាំង៦នាក់។

ហេតុការណ៍នេះកើតឡើងនៅពេលឆ្មាំសមុទ្រចិន បង្កើនប្រតិបត្តិការល្បាតជុំវិញកោះ Kinmen របស់តៃវ៉ាន់ បន្ទាប់ពីឧប្បត្តិហេតុធ្ងន់ធ្ងរជាបន្តបន្ទាប់វាងភាគីទាំងពីរ។ ឆ្មាំសមុទ្រតៃវ៉ាន់និយាយថា ទូកតៃវ៉ាន់ កំពុងនេសាទមឹកនៅខាងក្រៅដែនទឹកដែលគ្រប់គ្រងដោយទីក្រុងតៃប៉ិ ក្បែរកោះ Kinmen ប៉ុន្តែត្រូវចាប់បានដោយទូកឆ្មាំសមុទ្រចិន។ ទន្ទឹមនោះ តៃវ៉ាន់អះអាង នឹងទាក់ទងជាមួយចិន ហើយជំរុញឱ្យពួកគេដោះលែងអ្នកនេសាទឱ្យបានឆាប់តាមដែលអាចធ្វើទៅបាន។

អុំឡុងពេលកើតហេតុ តៃវ៉ាន់បានបញ្ជូននាវាល្បាតចំនួនពីរដើម្បីព្យាយាមជួយសង្គ្រោះទូកនេសាទនោះ រួមជាមួយនឹងទូកនេសាទទីបីសម្រាប់ជំនួយ ប៉ុន្តែត្រូវរារាំងដោយនាវាឆ្មាំឆ្នេរសមុទ្រចិន។ ភ្លាមៗ​តៃវ៉ាន់ឲ្យចិនដោះលែងទូកមកវិញ តែចិនថាកុំលូកដៃ ដើម្បីចៀសវាងជម្លោះកាន់តែខ្លាំង។ តៃវ៉ាន់ក៏បញ្ឈប់ការដេញតាម ខណៈទូកនេសាទត្រូវបាននាំយកទៅកាន់កំពង់ផែ Weitou របស់ប្រទេសចិន។

គួរបញ្ជាក់ថា កោះKinmen ស្ថិតនៅជាប់ទីក្រុង Xiamen និង Quanzhou របស់ចិន ហើយមានចម្ងាយប្រហែលត្រឹម៥គីឡូម៉ែត្រប៉ុណ្ណោះ ពីចិនដីគោក។ ប្រទេសចិនចាត់ទុកតៃវ៉ាន់ថាជាទឹកដីរបស់ខ្លួន ហើយបានបង្កើនសម្ពាធលើទីក្រុងតៃប៉ិចាប់តាំងពីប្រធានាធិបតី William Lai Ching-te ចូលកាន់តំណែងកាលពីខែឧសភា មក៕

អត្ថបទ៖ ប៊ុន សុភាព