ចិន ព្រមានពលរដ្ឋខ្លួនកុំឲ្យធ្វើដំណើរទៅកាន់ប្រទេសជប៉ុន

ប្រទេសចិនបានចេញការព្រមានអំពីការធ្វើដំណើរដោយជំរុញឱ្យពលរដ្ឋរបស់ខ្លួនជៀសវាងប្រទេសជប៉ុន ដែលបង្កើនភាពតានតឹងបន្ទាប់ពីនាយករដ្ឋមន្ត្រីជប៉ុនលោកស្រី Sanae Takaichi បាននិយាយថា ការវាយប្រហាររបស់ចិនលើតៃវ៉ាន់អាចគំរាមកំហែងដល់ជប៉ុន និងអាចបង្កឱ្យមានការឆ្លើយតបខាងយោធា។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី១៥ខែវិច្ឆិកា។

ទីក្រុងប៉េកាំងបានថ្កោលទោសការកត់សម្គាល់នេះថាជា «ការញុះញង់ដោយចេតនា» ដោយនិយាយថាវាបានបង្កើតហានិភ័យសម្រាប់អ្នកទេសចរចិន និងធ្វើឱ្យខូចទំនាក់ទំនងទ្វេភាគី។

ការណែនាំនេះធ្វើឡើងបន្ទាប់ពីការប៉ះទង្គិចគ្នាខាងការទូតរយៈពេលមួយសប្តាហ៍ រួមមានទាំងប្រទេសទាំងពីរបានកោះហៅឯកអគ្គរដ្ឋទូតគ្នាទៅវិញទៅមក និងរលកនៃប្រតិកម្មជាតិនិយមនៅក្នុងប្រទេសចិន។ មន្ត្រីចិន និងប្រព័ន្ធផ្សព្វផ្សាយរដ្ឋបានព្រមានថា ប្រសិនបើជប៉ុនចូលរួមក្នុងជម្លោះជុំវិញកោះតៃវ៉ាន់ ជប៉ុននឹងប្រឈមមុខនឹងផលវិបាកធ្ងន់ធ្ងរ។ ក្រសួងការពារជាតិចិនថែមទាំងបាននិយាយថា ជប៉ុននឹងត្រូវ «កំទេច» ប្រសិនបើខ្លួនព្យាយាមជ្រៀតជ្រែក។

ទោះយ៉ាងណាប្រទេសជប៉ុនបាននិយាយថា មតិយោបល់របស់លោកស្រី Takaichi គ្រាន់តែជាផ្នែកមួយនៃការពិភាក្សាទ្រឹស្តីអំពីសន្តិសុខជាតិប៉ុណ្ណោះ។ ក្រោយមកលោកស្រី Takaichi បាននិយាយថា លោកស្រីនឹងមិនធ្វើការកត់សម្គាល់ស្រដៀងគ្នានេះម្តងទៀតទេ ប៉ុន្តែប្រទេសជប៉ុននៅតែទទូចថា ការរក្សាសន្តិភាពនៅក្នុងច្រកសមុទ្រតៃវ៉ាន់គឺមានសារៈសំខាន់សម្រាប់ប្រទេសជប៉ុន និងសម្រាប់ពិភពលោក។

ជម្លោះនេះបង្ហាញពីការធ្លាក់ចុះយ៉ាងខ្លាំងនៃទំនាក់ទំនង ត្រឹមតែប៉ុន្មានសប្តាហ៍បន្ទាប់ពីលោកស្រី Takaichi និងប្រធានាធិបតីចិន Xi Jinping បានធ្វើកិច្ចចរចាដែលមានគោលបំណងកែលម្អទំនាក់ទំនង។ បញ្ហានេះក៏បានគូសបញ្ជាក់ពីសកម្មភាពរក្សាតុល្យភាពដ៏លំបាករបស់ប្រទេសជប៉ុនរវាងភាពជាដៃគូសន្តិសុខរបស់ខ្លួនជាមួយសហរដ្ឋអាមេរិក និងទំនាក់ទំនងសេដ្ឋកិច្ចយ៉ាងស៊ីជម្រៅរបស់ខ្លួនជាមួយប្រទេសចិន ដែលភ្ញៀវទេសចរមានចំនួនជិត ៧,៥ លាននាក់បានមកទស្សនាប្រទេសជប៉ុនក្នុងរយៈពេលប្រាំបួនខែដំបូងនៃឆ្នាំនេះ៕

អត្ថបទ៖ ប៊ុន សុភាព