លោក ពូទីន៖ អាមេរិក ជាដើមហេតុ បង្កឲ្យមានជម្លោះនៅអ៊ុយក្រែន

ថ្លែងចេញពីកិច្ចប្រជុំកំពូលអង្គការកិច្ចសហប្រតិបត្តិការសៀងហៃ (SCO) ក្នុងទីក្រុងអាស្តាណា នៃប្រទេសកាហ្សាក់ស្ថាន, ប្រធានាធិបតីរុស្ស៊ីលោក វ្ល៉ាឌីមៀរ ពូទីន បានចង្អុលចំមុខអាមេរិក ថាជាដើមហេតុបង្កឲ្យមានជម្លោះនៅអ៊ុយក្រែន។ នេះបើតាមការចុះផ្សាយរបស់ RT កាលពីថ្ងៃព្រហស្បតិ៍ទី៤ខែកក្កដា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពូទីន លើកឡើងថា រុស្ស៊ីនឹងបន្តតស៊ូមតិសម្រាប់ដំណោះស្រាយដោយសន្តិវិធីនៃជម្លោះអ៊ុយក្រែន ថ្វីបើការពិតគឺថា វិបត្តិនេះត្រូវបានបង្កឡើងដោយសកម្មភាពរបស់សហរដ្ឋអាមេរិកក៏ដោយ។ ទីក្រុងមូស្គូ បានបញ្ជាក់ហើយបញ្ជាក់ទៀតថា ការសម្រេចចិត្តរបស់ខ្លួន ក្នុងការបើកប្រតិបត្តិការវាយលុកអ៊ុយក្រែន គឺបង្ខំចិត្តធ្វើដោយសារតែមហិច្ឆតារបស់ប្រទេសនេះ ចង់ក្លាយជាផ្នែកមួយនៃអង្គការណាតូ ក៏ដូចជាសង្រ្គាមប្រឆាំងប្រជាជន Donbass ផងដែរ។

មិនត្រឹមប៉ុណ្ណឹង លោក ពូទីន សង្កត់ធ្ងន់ថា ទីក្រុងមូស្គូ បានដាក់ចេញនូវសំណើជាក់លាក់ម្តងហើយម្តងទៀតសម្រាប់ដំណោះស្រាយបញ្ហាអ៊ុយក្រែន​ ប៉ុន្តែសំណើទាំងនោះ មិនត្រូវបានទីក្រុងកៀវនិងអ្នកគាំទ្ររបស់ខ្លួនអើពើឡើយ ហើយថែមទាំងច្រានចោលទៀតផង។ 

រុស្ស៊ីបានបង្ហាញផែនការចុងក្រោយរបស់ខ្លួនកាលពីខែមុន ហើយពេលនោះបើទីក្រុងកៀវ និងអ្នកគាំទ្រលោកខាងលិចទទួលយក វាប្រហែលបញ្ចប់អរិភាពភ្លាមៗ ជួយសង្គ្រោះជីវិតមនុស្សរាប់មិនអស់ និងចាប់ផ្តើមការចរចាបានបាត់ទៅហើយ។

សូមបញ្ជាក់ជាថ្មី រុស្ស៊ី បានបើកប្រតិបត្តិការយោធាប្រឆាំងរដ្ឋាភិបាលទីក្រុងកៀវ ក្នុងខែកុម្ភៈឆ្នាំ ២០២២ ដោយលោក ពូទីន បញ្ជាក់ថា ទីក្រុងមូស្គូមានគោលបំណងចង់ឲ្យអ៊ុយក្រែនធ្វើវិយោធកម្ម និងការធានាថា ទីក្រុងកៀវ នឹងមិនចូលរួមជាមួយណាតូ ឬប្លុកយោធាប្រឆាំងរុស្ស៊ីណាមួយឡើយ៕

អត្ថបទ៖ សុខ សុវណ្ណ

ចុចអាន៖ រុស្ស៊ី ត្រៀមផលិតមីស៊ីល ដែលហាមឃាត់ក្រោមសន្ធិសញ្ញាជាមួយ អាមេរិក