មនុស្ស​ប្រមូលផ្ដុំ​រាប់​សិប​ម៉ឺន​នាក់​នៅ​អ៊ីស្រាអែល ក្រោយ​ការ​ស្លាប់​ចំណាប់​ខ្មាំង​៦​នាក់​​នៅ​ហ្គាហ្សា

បាតុកម្ម​បាន​ផ្ទុះ​ឡើង​នៅ​​​​អ៊ីស្រាអែល​​កាល​ពី​ថ្ងៃ​ទី​១​ខែ​កញ្ញា បន្ទាប់​ពី​​ការ​ស្លាប់​ចំណាប់​ខ្មាំង៦​នាក់​នៅ​តំបន់​ហ្កាហ្សា ដោយ​ក្រុម​បាតុករ​បាន​សម្ដែង​ការ​ខកចិត្ត​​ចំពោះ​​ថ្នាក់​ដឹកនាំ​ប្រទេស​ ទាក់ទិន​នឹង​ភាព​​​​បរាជ័យ​ក្នុង​ការ​​សម្រេច​ឲ្យ​បាន​នូវ​​​​កិច្ច​ព្រម​ព្រៀង​​​បទ​ឈប់​បាញ់​ ព្រម​ទាំង​ការ​ដោះលែង​ចំណាប់​ខ្មាំង។

ប្រព័ន្ធផ្សព្វផ្សាយរបស់អ៊ីស្រាអែល បាន​ប៉ាន់ប្រមាណ​ថាមាន​មនុស្ស​ចំនួនរហូតដល់ ៥០​ម៉ឺន​នាក់ ដែល​ធ្វើបាតុកម្ម​យ៉ាង​ធំ​សម្បើម​​នៅទីក្រុងហ្ស៊េរុយសាឡិម ទីក្រុង Tel Aviv និងទីក្រុងដទៃទៀត ដោយទាមទារឲ្យ​​លោកនាយករដ្ឋមន្ត្រី Benjamin Netanyahu ប្រឹងប្រែង​កាន់​ឲ្យ​ខ្លាំង​ឡើង​បន្ថែមទៀតដើម្បីនាំយកចំណាប់ខ្មាំង​ដែល​នៅ​សេសសល់​ចំនួន ១០១នាក់​ត្រឡប់​​ទៅ​ផ្ទះវិញ។

នៅ​ក្រុង​ហ្ស៊េរុយសាឡិម ក្រុម​បាតុករ​បាន​បិទ​ផ្លូវ និង​ធ្វើ​បាតុកម្ម​នៅ​ខាង​ក្រៅ​គេហដ្ឋាន​របស់​នាយក​រដ្ឋមន្ត្រី។

រូបភាពពីលើអាកាសបានបង្ហាញពីផ្លូវហាយវេដ៏សំខាន់របស់ទីក្រុង Tel Aviv ដែលពោរពេញទៅដោយក្រុមអ្នកតវ៉ាកាន់ទង់ជាតិជាមួយនឹងរូបភាពនៃចំណាប់ខ្មាំងដែលត្រូវបានសម្លាប់។

ខ្សែ​វីដេអូ​ទូរទស្សន៍​អ៊ីស្រាអែល ​បាន​បង្ហាញ​​ពី​សកម្មភាព​ប៉ូលិស​​​​​ប្រើ​កាណុង​បាញ់​​ទឹក​ទៅ​កាន់​ក្រុម​​បាតុករ​ដែល​បាន​បិទ​ផ្លូវ។ ប្រព័ន្ធផ្សព្វផ្សាយក្នុងស្រុកបានរាយការណ៍ថាមានការចាប់ខ្លួន​មនុស្ស​ចំនួន​២៩​នាក់។

យោធាអ៊ីស្រាអែល បានប្រកាសពីការនាំ​យក​សាកសព​ចំណាប់​ខ្មាំង​​៦​នាក់​ចេញពីផ្លូវរូងក្រោមដីក្នុងទីក្រុង Rafah ភាគខាងត្បូង​ហ្គាហ្សា ដែល​មាន​ដូចជា Carmel Gat, Hersh Goldberg-Polin, Eden Yerushalmi, Alexander Lobanov, Almog Sarusi និង Ori Danino។

អ្នកនាំពាក្យក្រសួងសុខាភិបាលអ៊ីស្រាអែល បាននិយាយថា ការពិនិត្យកោសល្យវិច្ច័យបានឲ្យ​ដឹង​ថា ពួកគេត្រូវបាន «សម្លាប់ដោយភេរវករហាម៉ាស ក្នុងការបាញ់ប្រហារជាច្រើន​គ្រាប់» ចន្លោះ​ពី​ ៤៨​ម៉ោង ទៅ ៧២​ម៉ោង មុន​ប្រទះ​ឃើញ​សាកសព។

លោក Netanyahu ដែលប្រឈមមុខនឹងការអំពាវនាវកាន់តែខ្លាំងឡើងដើម្បីបញ្ចប់សង្រ្គាមជិត​១១​ខែជាមួយនឹងកិច្ចព្រមព្រៀងបទឈប់បាញ់ និងការដោះលែងចំណាប់ខ្មាំងដែលនៅសេសសល់ បាននិយាយថា អ៊ីស្រាអែលនឹងមិន​ឈប់​​ត្រឹម​នេះ​ទេ​រហូតដល់​មាន​ការ​ចាប់ខ្លួនអ្នកដែល​ជា​មេក្លោង​​របស់​ក្រុម​ហាម៉ាស។ លោក​បាន​ថ្លែង​ថា​៖ «​អ្នក​ណា​ដែល​សម្លាប់​ចំណាប់ខ្មាំង មិន​ចង់​បាន​កិច្ចព្រមព្រៀង​ទេ​»។

លោក Sami Abu Zuhri មេ​បញ្ជាការ​ជាន់ខ្ពស់ក្រុមហាម៉ាស បានប្រកាស​ថា អ៊ីស្រាអែល​ដែល​បាន​បដិសេធក្នុងការចុះហត្ថលេខាលើកិច្ចព្រមព្រៀង​បទ​ឈប់បាញ់ គឺ​ជា​អ្នក​គួរ​ត្រូវតែ​រង​ការ​ស្តីបន្ទោសចំពោះការស្លាប់​ចំណាប់​ខ្មាំង​ទាំង​នោះ។ លោក Zuhri បាន​​និយាយ​ថា៖ «លោក Netanyahu ជា​ដើមហេតុ​នៃ​ការសម្លាប់អ្នកទោសអ៊ីស្រាអែល។ អ៊ីស្រាអែលគួរតែជ្រើសរើសរវាងលោក Netanyahu និងកិច្ចព្រមព្រៀង»។

ការវាយលុករបស់អ៊ីស្រាអែលលើតំបន់ហ្គាហ្សា បានចាប់ផ្តើមបន្ទាប់ពីក្រុមហាម៉ាស និង​​ក្រុម​សកម្មប្រយុទ្ធផ្សេងទៀត​បាន​​សម្លាប់មនុស្សប្រហែល ១២០០នាក់ និងចាប់ចំណាប់ខ្មាំងប្រហែល ២៥០នាក់ក្នុងការវាយប្រហារលើអ៊ីស្រាអែលកាលពីថ្ងៃទី៧​ខែតុលា​ឆ្នាំ​២០២៣។

ចាប់តាំងពីពេលនោះ មនុស្ស​ប្រមាណ ២,៣​លាន​នាក់​ បាន​ទទួល​រង​ផល​ប៉ះពាល់​យ៉ាង​ធ្ងន់ធ្ងរ​ចំពោះ​ការ​វាយ​សងសឹក​ពី​ភាគី​អ៊ីស្រាអែល​នៅ​តំបន់​ហ្គាហ្សា ហើយក្រសួងសុខាភិបាលនៃតំបន់ហ្គាហ្សា បាន​ប្រកាស​ថា យ៉ាងហោចណាស់មានជនជាតិប៉ាឡេស្ទីនចំនួន ៤០ ៧៣៨​នាក់ត្រូវបានសម្លាប់។ ជនភៀសខ្លួនកំពុងរស់នៅក្នុងស្ថានភាពធ្ងន់ធ្ងរ ដោយ​គ្មាន​ទីជម្រក​គ្រប់គ្រាន់ និង​ជួប​ប្រទះ​​នឹង​វិបត្តិ​ស្រេក​ឃ្លាន៕

ដោយ៖ ឈាង