អាមេរិក​មើល​ឃើញ​​«ភាព​អាសន្ន​ខ្លាំង» ដោយសារ​​ការ​​ផ្ទេរ​មីស៊ីលច្រើន​ពី​​អ៊ីរ៉ង់​ទៅ​រុស្ស៊ី​

សហរដ្ឋអាមេរិក​បាន​កត់សម្គាល់ឃើញថា ការផ្ទេរមីស៊ីលផ្លោងរបស់អ៊ីរ៉ង់ទៅរុស្ស៊ីកើនឡើងយ៉ាងខ្លាំងនៅក្នុងសង្គ្រាមអ៊ុយក្រែន បន្ទាប់ពីមានរបាយការណ៍ថា ប្រទេសទាំងពីរបានពង្រឹងទំនាក់ទំនងកាន់តែស៊ីជម្រៅក្នុងប៉ុន្មានសប្តាហ៍ថ្មីៗនេះជាមួយនឹងការផ្ទេរអាវុធ។

សារព័ត៌មាន​រ៉យទ័រ បានរាយការណ៍កាលពីខែសីហាថា រុស្ស៊ីរំពឹងថានឹងបញ្ជូនមីស៊ីលផ្លោងរយៈចម្ងាយជិត Fath-360 រាប់រយគ្រាប់ពីប្រទេសអ៊ីរ៉ង់ ខណៈយោធារុស្ស៊ីរាប់សិបនាក់កំពុងត្រូវបានបណ្តុះបណ្តាលនៅក្នុងប្រទេសអ៊ីរ៉ង់ក្នុងការប្រើប្រាស់អាវុធសម្រាប់ប្រើប្រាស់ក្នុងសង្គ្រាមនៅអ៊ុយក្រែន។

ចំណែក​កាសែត Wall Street Journal បានរាយការណ៍កាលពីថ្ងៃសុក្រ ដោយដកស្រង់សម្តីមន្ត្រីអាមេរិកដែលមិនបញ្ចេញឈ្មោះម្នាក់ថា «មីស៊ីលរយៈចម្ងាយខ្លីឥឡូវនេះត្រូវបានបញ្ជូនទៅកាន់ប្រទេសរុស្ស៊ីដោយប្រទេសអ៊ីរ៉ង់»។

ពាក់ព័ន្ធបញ្ហានេះ អ្នកនាំពាក្យក្រុមប្រឹក្សាសន្តិសុខជាតិអាមេរិក លោក Sean Savett បាននិយាយថា៖«យើងបានព្រមានពីភាពជាដៃគូសន្តិសុខកាន់តែស៊ីជម្រៅរវាងរុស្ស៊ីនិងអ៊ីរ៉ង់ ចាប់តាំងពីការចាប់ផ្តើមការឈ្លានពានរបស់រុស្ស៊ីមកលើអ៊ុយក្រែន ខណៈរាល់ការផ្ទេរមីស៊ីលផ្លោងរបស់អ៊ីរ៉ង់ទៅរុស្ស៊ីតំណាងឱ្យការកើនឡើងយ៉ាងខ្លាំងនៅក្នុងការគាំទ្ររបស់អ៊ីរ៉ង់ចំពោះសង្គ្រាមឈ្លានពានរបស់រុស្ស៊ីប្រឆាំងនឹងអ៊ុយក្រែន ដែលនឹងធ្វើឲ្យមានការព្រួយបារម្ភកាន់តែខ្លាំងថែមទៀត»។

ចំណែកមន្ត្រីអាមេរិកម្នាក់ទៀតបានប្រាប់រ៉យទ័រថា ពួកគេកំពុងឃ្លាំមើលការផ្ទេរមីស៊ីលពីអ៊ីរ៉ង់ទៅរុស្ស៊ីយ៉ាងដិតដល់។

គួរបញ្ជាក់ថា ការផ្លាស់ប្តូរ​អាវុធ​​ដ៏មានសក្តានុពលនេះ កើតឡើងបន្ទាប់ពីសហរដ្ឋអាមេរិកនិងដៃគូនានា រួមទាំងនៅអឺរ៉ុបបាន​ព្រមានថា ការគាំទ្ររបស់អ៊ីរ៉ង់អាចជួបនឹងផលវិបាក។ស្របពេលបណ្តាប្រទេសលោកខាងលិចបានកំពុងឃ្លាំមើលទំនាក់ទំនងកាន់តែស៊ីជម្រៅរបស់អ៊ីរ៉ង់និងរុស្ស៊ីក្នុងប៉ុន្មានខែថ្មីៗនេះ ជាមួយនឹងការព្រួយបារម្ភកាន់តែខ្លាំងឡើង។

ទោះយ៉ាងណា បេសកជន​របស់អ៊ីរ៉ង់ប្រចាំអង្គការសហប្រជាជាតិនៅទីក្រុងញូវយ៉ក បាននិយាយកាលពីថ្ងៃសុក្រ​ថា«ជំហររបស់ទីក្រុងតេអេរ៉ង់លើជម្លោះអ៊ុយក្រែនគឺមិនផ្លាស់ប្តូរទេ»៕

អត្ថបទ៖ ប៊ុន សុភាព