ព័ត៌មានអន្ដរជាតិ

លោក បៃដិន អនុម័តជំនួយ៥៦៧លានដុល្លារឲ្យតៃវ៉ាន់ លើវិស័យការពារជាតិ

បានផុស

៦ ខែ មុន

នៅ

ថ្ងៃអង្គារ ១ តុលា ២០២៤

ដោយ

Chheang

ប្រធានាធិបតីអាមេរិកលោក ចូ បៃដិន បានអនុម័តទឹកប្រាក់ចំនួន ៥៦៧លានដុល្លារ ដែលជាកញ្ចប់ជំនួយផ្នែកការពារជាតិសម្រាប់កោះតៃវ៉ាន់ និងជាវិធានការចុងក្រោយរបស់សហរដ្ឋអាមេរិកក្នុងការពង្រឹងយោធារបស់កោះនេះ ដើម្បីប្រឈមមុខនឹងភាពតានតឹងជាមួយប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍របស់សេតវិមាន បានប្រកាសថា លោក បៃដិន បានប្រគល់តួនាទីនេះឲ្យលោក Anthony Blinken រដ្ឋមន្ត្រីការបរទេស ក្នុងការសម្រេច «ដកយកប្រាក់រហូតដល់ ៥៦៧លានដុល្លារនៅក្នុងមាត្រាច្បាប់ការពារជាតិ និងទីភ្នាក់ងាររបស់ក្រសួងការពារជាតិ ការអប់រំ និងការបណ្តុះបណ្តាលយោធា ដើម្បីផ្តល់ជំនួយដល់តៃវ៉ាន់»។ យ៉ាងណាមិញ ព័ត៌មានលម្អិតផ្សេងទៀតមិនត្រូវបានបញ្ជាក់នោះទេ។

សហរដ្ឋអាមេរិកគឺជាអ្នកគាំទ្រអន្តរជាតិ និងជាអ្នកផ្គត់ផ្គង់សព្វាវុធដ៏សំខាន់បំផុតរបស់តៃវ៉ាន់ ថ្វីត្បិតសម្ព័ន្ធមិត្តទាំង២គ្មានទំនាក់ទំនងការទូតផ្លូវការក៏ដោយ។ ចិនបានទាមទារម្តងហើយម្តងទៀតឲ្យក្រុងវ៉ាស៊ីនតោនបញ្ឈប់ការលក់សព្វាវុធទៅឲ្យក្រុងតៃប៉ិ។

កាលពីខែមេសា លោក បៃដិន បានចុះហត្ថលេខាលើច្បាប់មួយដែលផ្តល់ជំនួយថ្មីរាប់ពាន់លានដុល្លារដល់ប្រទេសអ៊ុយក្រែនសម្រាប់សង្គ្រាមរបស់ខ្លួនជាមួយរុស្ស៊ី ក៏ដូចជាសម្រាប់អ៊ីស្រាអែល និងតៃវ៉ាន់ផងដែរ។

ក្រុងតៃប៉ិបានត្អូញត្អែរពីការពន្យារពេលបញ្ជូនសព្វាវុធរបស់សហរដ្ឋអាមេរិក រួមទាំងការដំឡើងយន្តហោះចម្បាំង F-14។

ប្រទេសចិន ដែលចាត់ទុកតៃវ៉ាន់ដែលគ្រប់គ្រងតាមបែបប្រជាធិបតេយ្យថាជាទឹកដីរបស់ខ្លួននោះ បានបង្កើនសម្ពាធផ្នែកយោធា និងនយោបាយក្នុងរយៈពេល៥ឆ្នាំចុងក្រោយ ដើម្បីអះអាងនូវការទាមទាររបស់ខ្លួន៕

ដោយ៖ ឈាង