​ឥណ្ឌា​ទទួល​បានសារ​គំរាម​ដោយ​គ្រាប់​បែក​ជាង​៧០​លើក​​នៅ​លើ​យន្តហោះ​

ប្រព័ន្ធផ្សព្វផ្សាយឥណ្ឌាបានរាយការណ៍​នៅ​ថ្ងៃទី២០ខែតុលាថា ការគំរាមកំហែងគ្រាប់បែកក្លែងក្លាយជាង៧០​ត្រូវបានធ្វើឡើងប្រឆាំងនឹងជើងហោះហើរដែលដំណើរការដោយក្រុមហ៊ុនអាកាសចរណ៍ឥណ្ឌាជាច្រើនកាលពីសប្តាហ៍មុន ដែលបង្កឱ្យមានការភ័យខ្លាចក្នុងចំណោមអ្នកដំណើរ និងការពន្យារពេលជាសកល។

ជើងហោះហើរទាំងអស់បានចុះចតដោយសុវត្ថិភាព ប៉ុន្តែការគម្រាមកំហែងបានធ្វើឱ្យយន្តហោះត្រូវបង្វែរទិសដៅទៅកាន់ប្រទេសកាណាដា និងអាល្លឺម៉ង់ ហើយយន្តហោះចម្បាំងបានព្យាយាមហោះហើរដើម្បីអមយន្តហោះនៅលើមេឃពីលើចក្រភពអង់គ្លេស និងសិង្ហបុរី។

រដ្ឋាភិបាល​ឥណ្ឌា និង​អាជ្ញាធរ​អាកាសចរណ៍​ស៊ីវិល​បាន​ព្រមាន​ថា​នឹង​ចាត់​វិធានការ​តឹងរ៉ឹង​ខ្លាំង។

អាជ្ញាធរអាកាសចរណ៍ស៊ីវិលរបស់ទីក្រុងញូវដេលីមិនបាននិយាយថា ការគំរាមកំហែងប៉ុន្មានត្រូវបានទទួលក្នុងសប្តាហ៍មុន ប៉ុន្តែកាសែត Times of India និងទូរទស្សន៍ News18 បានរាយការណ៍អំពីការបោកបញ្ឆោតជាង​៧០​ដង​ដែលផ្តោតលើជើងហោះហើរក្នុងស្រុក និងអន្តរជាតិចាប់តាំងពីថ្ងៃទី១៣ខែតុលា។

យ៉ាងហោចណាស់ការគំរាមកំហែងបោកបញ្ឆោតចំនួន៣០ដង​ ត្រូវបានធ្វើឡើង​ក្នុង​ពេល​តែ​មួយថ្ងៃ ​​​គឺ​ថ្ងៃទី១៩​ខែតុលាតែ។

ផលប៉ះពាល់ជាសាកលនៃការពន្យាពេល និងការបង្វែរទិសដៅ​ចុះ​ចត​​ជា​បន្ទុកដ៏​ធ្ងន់ទៅលើ​ពេលវេ​លា​ហោះ​ហើរ​ និងការចំណាយរបស់ក្រុមហ៊ុនអាកាសចរណ៍។ យ៉ាងហោចណាស់មនុស្សម្នាក់ ដែលជាអនីតិជន ត្រូវបានចាប់ខ្លួននៅក្នុងប្រទេសឥណ្ឌា ប៉ុន្តែការគំរាមកំហែងនៅតែបន្ត​កើត​មាន​។

រដ្ឋមន្ត្រីអាកាសចរណ៍ឥណ្ឌា លោក Ram Mohan Naidu បាននិយាយបន្ទាប់ពីការចាប់ខ្លួនកាលពីថ្ងៃទី១៦​ខែតុលាថា «អ្នកផ្សេងទៀតទាំងអស់ដែលទទួលខុសត្រូវចំពោះការរំខាននឹងត្រូវបានកំណត់អត្តសញ្ញាណ និងកាត់ទោសឱ្យបានត្រឹមត្រូវ»។

របាយការណ៍​មួយនៅក្នុង The Indian Express បាននិយាយថា គណនីអនាមិកមួយនៅលើ​ប្រព័ន្ធផ្សព្វផ្សាយបណ្តាញ​សង្គម X ត្រូវបានផ្អាក បន្ទាប់ពីការបង្ហោះការគំរាមកំហែងគ្រាប់បែកដល់ជើងហោះហើរយ៉ាងហោចណាស់៤០កាលពីថ្ងៃទី១៨និង១៩​ខែតុលា។

នេះរួមបញ្ចូលទាំងក្រុមហ៊ុនអាកាសចរណ៍ឥណ្ឌា និងអន្តរជាតិ រួមទាំងពីសហរដ្ឋអាមេរិក និងនូវែលសេឡង់។

សារ​អេឡិចត្រូនិក​ដូចៗ​គ្នាពី​គណនី​ដែល​ត្រូវ​បាន​ផ្អាក​នោះ ត្រូវ​បាន​សារព័ត៌មាន​រាយការណ៍​ថា៖«​មានគ្រាប់បែកដាក់នៅលើយន្តហោះ… គ្មាននរណាម្នាក់នឹងធ្វើឱ្យរួចជីវិតឡើយ។ ប្រញាប់ ជម្លៀសចេញពីយន្តហោះ»៕​