ព័ត៌មានជាតិ

IndiGo របស់ឥណ្ឌានឹងចាប់ផ្តើមជើងហោះហើរមកកាន់ខេត្តសៀមរាបនៅខែកម្ភៈឆ្នាំ២០២៥

បានផុស

២ years មុន

នៅ

ថ្ងៃព្រហស្បតិ៍ ១៩ ធ្នូ ២០២៤

ដោយ

ក្រុមហ៊ុនអាកាសចរណ៍ IndiGo របស់ឥណ្ឌានឹងចាប់ផ្តើមជើងហោះហើរត្រង់ រវាងទីក្រុង កុលកាតា-សៀមរាប-កុលកាតា (Kolkata – Siem Reap- Kolkata) ក្នុងខែកុម្ភៈ ឆ្នាំ២០២៥ ខាងមុខនេះ ដើម្បីឆ្លើយតបទៅនឹងកំណើននៃអ្នកដំណើររវាងប្រទេសទាំងពីរជាពិសេសគឺការជំរុញទេសចរណ៍វប្បធម៌។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ស៊ីន ចាន់សិរីវុត្ថា រដ្ឋលេខាធិការ និងអ្នកនាំពាក្យអាកាសចរណ៍ស៊ីវិលបានថ្លែងប្រាប់កម្ពុជាថ្មីនៅថ្ងៃទី១៩ ខែធ្នូថា ក្រុមហ៊ុនអាកាសចរណ៍ IndiGo របស់ឥណ្ឌានឹងចាប់ផ្តើមជើងហោះហើរត្រង់ រវាងទីក្រុង កុលកាតា-សៀមរាប-កុលកាតា (Kolkata – Siem Reap- Kolkata) ក្នុងខែកុម្ភៈ ឆ្នាំ២០២៥ ខាងមុខនេះ ដោយប្រើយន្តហោះប្រភេទ A320 ៣ជើង/សប្តាហ៍ (ចន្ទ-ពុធ-សុក្រ)។ កន្លងមករដ្ឋលេខាធិការដ្ឋានអាកាសចរណ៍ស៊ីវិល បានផ្តល់ការអនុញ្ញាតលើផ្នែកពាក់ព័ន្ធនានា ដល់ក្រុមហ៊ុនអាកាសចរណ៍ IndiGo រួចស្រេចហើយ រង់ចាំតែការហោះហើរជាក់ស្តែងរបស់ក្រុមហ៊ុនប៉ុណ្ណោះ។

លោកបានថ្លែងបញ្ជាក់ថា៖«ដំបូងឡើយក្រុមហ៊ុន IndiGo គ្រោងភ្ជាប់ជើងហោះហើរមកកម្ពុជា នៅចុងឆ្នាំ២០២៤ នេះ ប៉ុន្តែដោយសារមានការប្រែប្រួល ការភ្ជាប់ជើងហោះហើរត្រូវបានពន្យារពេលរហូតដល់ដើមឆ្នាំ២០២៥វិញ»។

«ការបើកតភ្ជាប់ផ្លូវថ្មីនេះ នឹងផ្ដល់ផលចំណេញដល់ប្រទេសទាំងពីរ ពាក់ព័ន្ធនឹងការធ្វើដំណើររយៈពេលខ្លី ហើយការចំណាយតិចជាងមុន ជាពិសេសភាគីទាំងពីរចង់ផ្សព្វផ្សាយពីផ្នែកទេសចរណ៍ វប្បធម៌ សាសនា និងសុខភាព ខណៈកម្ពុជាប្រើប្រាស់សេវាសុខាភិបាលនៅឥណ្ឌាច្រើន ខណៈឥណ្ឌាក៏ចង់មកស្រុកខ្មែរ តាមរយៈទេសចរណ៍ វប្បធម៌ និងសាសនា»។ នេះបើយោងតាម លោក ស៊ីន ចាន់សិរីវុត្ថា។

កាលពីខែមិថុនា ២០២៤ ក្រុមហ៊ុនអាកាសចរណ៍កម្ពុជា Cambodia Angkor Air (K6) បានចាប់ផ្តើម បើកការហោះហើរត្រង់ទៅប្រទេសឥណ្ឌា ដោយធ្វើឡើង ៤ជើងក្នុងមួយសប្តាហ៍។

លោក ស សារិន អនុប្រធានសមាគមភ្នាក់ងារទេសចរណ៍កម្ពុជា (CATA) បានឱ្យដឹងថា បន្ទាប់ពីបើកដំណើរការជើងហោះហើរត្រង់កម្ពុជា-ឥណ្ឌា កាលពីថ្ងៃទី ១៦ ខែមិថុនា ឆ្នាំ ២០២៤ និងឃើញពីសក្ដានុពលទេសចរឥណ្ឌាប្រតិបត្តិករទេសចរណ៍ បានចាប់ផ្ដើមពង្រឹងសមត្ថភាពក្នុងការទទួលភ្ញៀវទេសចរឥណ្ឌា ខណៈទេសចរពីឥណ្ឌា មានការពិបាកក្នុងការតម្រូវបន្តិច ពិសេសគឺមុខម្ហូប ហើយកម្ពុជានៅខ្វះមុខម្ហូបឥណ្ឌា ដែលមិនអាចទទួលភ្ញៀវទេសចរឥណ្ឌាក្នុងទំហំធំនៅឡើយ។

លោក ខៀវ ធី ប្រធានសមាគមមគ្គុទេសក៏ទេសចរណ៍អង្គរ បានលើកឡើងថា ជនជាតិឥណ្ឌាជាច្រើនចង់ ទស្សនាប្រាសាទអង្គរវត្ត កន្លងមិនមិនមានជើងហោះហើរត្រង់ ទើបមិនសូវមានភ្ញៀវឥណ្ឌាមកច្រើន។

លោកបញ្ជាក់ថា៖« ឥណ្ឌាចង់មកមើលប្រាសាទអង្គរវត្ត ដោយសារខ្មែរយើង ទទួលឥទ្ធិពលពីឥណ្ឌា ដែលឥណ្ឌាមានមោទនភាពឃើញសាសានាហិណ្ឌូនៅស្រុកយើង»។

នៅក្នុងរយៈពេល ១១ ខែ ឆ្នាំ ២០២៤ កម្ពុជាទទួលបានភ្ញៀវទេសចរណ៍អន្តរជាតិចំនួនប្រមាណ ៦ លានានក់ កើនឡើង ២២ ភាគរយ ធៀបនឹងរយៈពេលដូចគ្នានៅឆ្នាំ២០២៣ ខណៈទេសចរជាតិបានធ្វើដំណើរកម្សាន្តនៅទូទាំងប្រទេសប្រមាណ ២០ លាននាក់ កើនឡើង ១៩,៧% ក្នុងនោះតំបន់ឆ្នេរសមុទ្រមានទេសចរជាតិប្រមាណ ៨ លាននាក់ កើន ១២,៥% និងទេសចរបរទេសប្រមាណ ៤២ ម៉ឺននាក់ កើន ១០,៦% ធៀបនឹងរយៈពេលដូចគ្នាកាលពីឆ្នាំ ២០២៣។ នេះបើយោងតាមរបាយការណ៍របស់ក្រសួងទេសចរណ៍។

នៅដំណាច់ឆ្នាំ ២០២៤កម្ពុជារំពឹងទទួលបានភ្ញៀវទេសចរណ៍អន្តរជាតិប្រមាណ ៦,៧ លាននាក់ ពោលគឺលើសមុនពេលជំងឺកូវីដ១៩ និងទេសចរជាតិប្រមាណ ២២ លាននាក់៕

Related Topics:ជើងហោះហើរកម្ពុជា-ឥណ្ឌា