សេដ្ឋកិច្ច

IndiGo នឹងបើកជើងហោះហើរត្រង់ពីឥណ្ឌា-កម្ពុជាលើកដំបូងក្នុងខែវិច្ឆិកា ជំរុញទំនាក់ទំនងទេសចរណ៍ និងពាណិជ្ជកម្ម

បានផុស

៩ ខែ មុន

នៅ

ថ្ងៃព្រហស្បតិ៍ ២៣ តុលា ២០២៥

ដោយ

ក្រុមហ៊ុនអាកាសចរណ៍ IndiGo Airlines នឹងបើកដំណើរការការហោះហើរត្រង់លើកដំបូងរបស់ខ្លួនរវាងប្រទេសឥណ្ឌា និងកម្ពុជា ដោយភ្ជាប់ទីក្រុង Kolkata ទៅកាន់ខេត្តសៀមរាបចំនួន ៣ ជើងក្នុងមួយសប្តាហ៍។ ការហោះហើរត្រង់មកកម្ពុជានេះ និងចាប់ផ្តើមប្រតិបត្តិការនៅថ្ងៃទី១៣ ខែវិច្ឆិកា ខាងមុខនេះ ដំណើរការដោយយន្តហោះ Airbus A320neo និងជាព្រឹត្តិការណ៍ដ៏សំខាន់មួយក្នុងការពង្រឹងវិស័យទេសចរណ៍ និងពាណិជ្ជកម្មទ្វេភាគី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pieter Elbers នាយកប្រតិបត្តិនៃក្រុមហ៊ុន IndiGo បានមានប្រសាសន៍ថា ជើងហោះហើរត្រង់មកកាន់កម្ពុជានេះនឹងលើកកម្ពស់ការតភ្ជាប់ ព្រមទាំងលើកកម្ពស់ការផ្លាស់ប្តូរវប្បធម៌ តាមរយៈការផ្សព្វផ្សាយជាសាកលរបស់ខេត្តសៀមរាបក្នុងនាមជាម្ចាស់ផ្ទះ។ ក្នុងនោះអ្នកធ្វើដំណើរឥណ្ឌាអាចទទួលបានអត្ថប្រយោជន៍ពីជម្រើសទិដ្ឋាការពេលមកដល់ និង e-visa របស់ប្រទេសកម្ពុជា ដែលធ្វើឱ្យការធ្វើដំណើរកាន់តែងាយស្រួល។

ឥណ្ឌាជាទីផ្សារទេសចរណ៍ដែលមានកំណើនលឿនបំផុតមួយរបស់កម្ពុជា។ ក្នុងឆ្នាំ២០២៤ ភ្ញៀវទេសចរឥណ្ឌាជាង ៧៥.០០០ នាក់បានមកទស្សនាប្រទេសកម្ពុជា ដែលទាក់ទាញដោយតំបន់បេតិកភណ្ឌ និងការពង្រីកវិស័យបដិសណ្ឋារកិច្ច។ ផ្លូវហោះហើរថ្មីនេះត្រូវបានគេរំពឹងថានឹងជំរុញការមកដល់បន្ថែមទៀត ជាពិសេសនៅពេលដែលកម្ពុជាកំណត់គោលដៅភ្ញៀវទេសចរអន្តរជាតិចំនួន ៧ លាននាក់នៅឆ្នាំ២០២៦។

សូមជម្រាបថា ពាណិជ្ជកម្មរវាងប្រទេសទាំងពីរកម្ពុជា-ឥណ្ឌា បានរីកចម្រើនជាលំដាប់ ដោយពាណិជ្ជកម្មទ្វេភាគីឈានដល់ជាង ៥០០ លានដុល្លារក្នុងឆ្នាំ២០២៤។ ការនាំចេញសំខាន់ៗរួមមាន វាយនភ័ណ្ឌ ឱសថ និងផលិតផលកសិកម្ម។ ជាក់ស្តែង ការតភ្ជាប់ផ្លូវអាកាសដោយផ្ទាល់ត្រូវបានគេរំពឹងថានឹងជួយសម្រួលដល់ការធ្វើដំណើរអាជីវកម្ម ធ្វើឱ្យប្រសើរឡើងនូវការដឹកជញ្ជូនទំនិញ និងធ្វើឱ្យកិច្ចសហប្រតិបត្តិការសេដ្ឋកិច្ចកាន់តែស៊ីជម្រៅរវាងឥណ្ឌា និងកម្ពុជា។

យោងតាមរដ្ឋលេខាធិការដ្ឋានអាកាសចរស៊ីវិល បានឱ្យដឹងថា ប្រទេសកម្ពុជាបានស្វាគមន៍អ្នកធ្វើដំណើរតាមផ្លូវអាកាសជាង ៥.១ លាននាក់ក្នុងរយៈពេល ៩ ខែដំបូងនៃឆ្នាំ២០២៥ កើនឡើង ១៤% បើធៀបនឹងរយៈពេលដូចគ្នាកាលពីឆ្នាំមុន។

ចាប់ពីខែមករាដល់ខែកញ្ញា ប្រទេសនេះបានកត់ត្រាជើងហោះហើរក្នុង និងក្រៅប្រទេសចំនួន ៤៧.៦៣៧ កើនឡើង ១២% ពីមួយឆ្នាំទៅមួយឆ្នាំ។ បរិមាណទំនិញតាមអាកាសក៏បានកើនឡើង ១៤% លើសពី ៦០.០០០ តោន។

រដ្ឋលេខាធិការ និងជាអ្នកនាំពាក្យ លោក ស៊ិន ច័ន្ទសេរីវុត្ថា បានចាត់ទុកកំណើននេះ ដោយសារតែការស្ទុះងើបឡើងវិញយ៉ាងខ្លាំងនៃវិស័យទេសចរណ៍ចិនក្រៅប្រទេស តម្រូវការក្នុងតំបន់ប្រកបដោយនិរន្តរភាពពីប្រទេសថៃ វៀតណាម កូរ៉េខាងត្បូង និងជប៉ុន និងការបន្ធូរបន្ថយការរឹតបន្តឹងការធ្វើដំណើរជាដើម។ លោកក៏បានលើកឡើងពីការងើបឡើងវិញ និងការពង្រីកប្រតិបត្តិការរបស់ក្រុមហ៊ុនអាកាសចរណ៍។

រដ្ឋាភិបាលរំពឹងថាក្រុមហ៊ុនអាកាសចរណ៍ថ្មីចំនួន៣ បន្ថែមទៀតរួមមាន Firefly, Air Busan និង T’way នឹងចាប់ផ្តើមប្រតិបត្តិការនៅចុងឆ្នាំ២០២៥ ។ ចរាចរណ៍អ្នកដំណើរត្រូវបានគេព្យាករណ៍ថានឹងកើនឡើងដល់ ៧.៥ លាននាក់ ជាមួយនឹងទំនិញតាមអាកាសត្រូវបានគេព្យាករណ៍ថានឹងកើនឡើងដល់ ៨០.០០០ តោន៕