ព័ត៌មានអន្ដរជាតិ

ថៃ ប្រាប់ថា ពលរដ្ឋខ្លួន ៤នាក់ត្រូវបានសម្លាប់នៅក្បែរព្រំដែនអ៊ីស្រាអែល-លីបង់

បានផុស

៥ ខែ មុន

នៅ

ថ្ងៃសុក្រ ១ វិច្ឆិកា ២០២៤

ដោយ

Chheang

លោក Maris Sangiampongsa រដ្ឋមន្ត្រីការបរទេសថៃ បានបង្ហោះសារនៅលើបណ្ដាញសង្គម X នៅថ្ងៃសុក្រនេះថា ប្រជាជនថៃចំនួន ៤នាក់ត្រូវបានសម្លាប់ និងម្នាក់ទៀតបានរងរបួស នៅក្នុងការវាយប្រហារដោយគ្រាប់រ៉ុកកែតនៅក្បែរក្រុង Metula នៃប្រទេសអ៊ីស្រាអែល ជាប់ព្រំដែនប្រទេសលីបង់។

លោក Maris Sangiampongsa (រូបភាព៖ បណ្ដាញសង្គម)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Maris បានសរសេរថា៖ «ប្រទេសថៃបន្តជំរុញយ៉ាងម៉ឺងម៉ាត់ឲ្យគ្រប់ភាគីទាំងអស់ត្រឡប់ទៅរកមាគ៌ាសន្ដិភាពវិញ ដោយតាំងនាមឲ្យជនស៊ីវិលដែលមិនដឹងអីហើយរងផលប៉ះពាល់ធ្ងន់ធ្ងរព្រោះជម្លោះដ៏រ៉ាំរ៉ៃ និងកាន់តែរីកធំឡើងនេះ»។

កាលពីថ្ងៃទី៧ខែតុលាឆ្នាំ២០២៣ ជនជាតិថៃ ៤១នាក់គឺស្ថិតនៅក្នុងចំណោមមនុស្សចំនួន ១ ២០០នាក់ដែលត្រូវបានសម្លាប់ដោយក្រុមសកម្មប្រយុទ្ធហាម៉ាស អំឡុងពេលបើកការវាយឆ្មក់នៅលើទឹកដីអ៊ីស្រាអែល។ បន្ថែមពីនេះ ជនជាតិថៃ ៣១នាក់ផ្សេងទៀត ត្រូវបានចាប់ធ្វើជាចំណាប់ខ្មាំង ហើយបច្ចុប្បន្នគេជឿថា ជនជាតិថៃប្រហែល ៦នាក់កំពុងជាប់ឃុំឃាំងនៅឡើយ។

មុនសង្គ្រាម ជនជាតិថៃប្រមាណ ៣ម៉ឺននាក់ បានធ្វើការនៅប្រទេសអ៊ីស្រាអែល ដោយភាគច្រើនស្ថិតនៅក្នុងវិស័យកសិកម្ម។ ប្រជាជនថៃជាច្រើន ជាពិសេសអ្នកនៅតាមតំបន់ជនបទភាគឦសានប្រទេស មានបំណងចង់ស្វែងរកការងារធ្វើនៅអ៊ីស្រាអែល ក៏ព្រោះតែនៅទីនោះអាចទទួលបានប្រាក់កម្រៃខ្ពស់ សម្រាប់ដោះបំណុល ដែលការជំពាក់បំណុលនេះគឺជាបញ្ហាសេដ្ឋកិច្ចលំដាប់ថ្នាក់ទី២ចំពោះមនុស្សរាប់លាននាក់នៅអាស៊ីអាគ្នេយ៍។

បើតាមការចុះផ្សាយរបស់សារព័ត៌មាន BBC ពលករថៃចាប់ផ្ដើមធ្វើចំណាកស្រុកទៅកាន់ប្រទេសអ៊ីស្រាអែល តាំងពីអំឡុងទសវត្សរ៍ឆ្នាំ១៩៨០មកម៉្លេះ មុនកិច្ចព្រមព្រៀងជាផ្លូវការរវាងរដ្ឋាភិបាលប្រទេសទាំង២កាលពីឆ្នាំ២០១១ទៅទៀត។ សព្វថ្ងៃ កម្រៃប្រចាំខែរបស់ពលករថៃនៅអ៊ីស្រាអែល អាចទទួលបានចន្លោះពី ២១០០ដុល្លារ ដល់ជាង ៣២០០ដុល្លារ។ ក្រុមពលករថៃ បានអះអាងថា កម្រៃប៉ុណ្ណឹងគឺច្រើនជាងការរកចំណូលនៅប្រទេសកំណើតពួកគេដល់ទៅ ៧ ឬ ៨ដងឯណោះ៕

ដោយ៖ ឈាង

ចុចអាន៖ ថៃ ត្រៀមបញ្ជូនពលករទៅអ៊ីស្រាអែលវិញ ទោះសង្គ្រាមនៅទីនោះមិនទាន់ចប់