ពូទីន អនុម័តច្បាប់ជួយគ្នាទៅវិញទៅមក ជាមួយកូរ៉េខាងជើង បើប្រទេសណាត្រូវវាយប្រហារ

តាមការចុះផ្សាយរបស់សារព័ត៌មាន RT កាលពីថ្ងៃអាទិត្យទី១០ខែវិច្ឆិកាឆ្នាំ២០២៤, ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចុះហត្ថលេខាលើច្បាប់សន្ធិសញ្ញាស្តីពីភាពជាដៃគូយុទ្ធសាស្ត្ររបស់ប្រទេសខ្លួន ជាមួយកូរ៉េខាងជើងហើយ ដែលសន្ធិសញ្ញានេះ ត្រូវគេដឹងថា រួមមានទាំងការផ្តល់ការការពារគ្នាទៅវិញទៅមកផងដែរ បើប្រទេសណាត្រូវវាយប្រហារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីខែមិថុនា បន្ទាប់ពីកិច្ចប្រជុំកំពូលនៅទីក្រុងព្យុងយ៉ាង លោកពូទីននិងមេដឹកនាំកូរ៉េខាងជើង គីម ជុងអ៊ុន បានចុះហត្ថលេខាលើកិច្ចព្រមព្រៀងមួយ ដែលសម្រេចឲ្យភាគីមួយ ត្រូវជួយភាគីម្ខាងទៀត ក្នុងករណីមានការវាយប្រហារប្រដាប់អាវុធ។

លុះមកដល់ថ្ងៃអាទិត្យ សភាជាន់ខ្ពស់របស់រុស្ស៊ី បានផ្តល់សច្ចាប័នលើសន្ធិសញ្ញានេះ ខណៈដែលសភាជាន់ទាបបានអនុម័តវាកាលពីខែមុន។

ច្បាស់ណាស់ សន្ធិសញ្ញានេះ នឹងធ្វើឲ្យទំនាក់ទំនងរវាងទីក្រុងមូស្គូនិងព្យុងយ៉ាង កាន់តែជិតស្និទ្ធ ចាប់តាំងពីរុស្ស៊ី បើកការវាយប្រហារពេញទំហឹងលើអ៊ុយក្រែនក្នុងខែកុម្ភៈ ឆ្នាំ២០២២។

លើសពីនេះ របាយការណ៍​ពី​ប្រទេស​កូរ៉េ​ខាង​ត្បូងនិង​ប្រទេស​លោក​ខាង​លិច​អះអាង​ថា កូរ៉េ​ខាង​ជើង​ បានជួយជាជំនួយយោធា​ដល់​រុស្ស៊ីទៀតផង ខណៈអ្នកជំនាញអ៊ុយក្រែននិយាយថា ពួកគេបានរកឃើញដាននៃអាវុធនៅកន្លែងវាយប្រហាររុស្ស៊ី។

មិនត្រឹមប៉ុណ្ណឹង ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានបញ្ជាក់កាលពីថ្ងៃព្រហស្បតិ៍ថា កូរ៉េខាងជើង បានបញ្ជូនកងទ័ពចំនួន ១១ ០០០នាក់ទៅកាន់ប្រទេសរុស្ស៊ី ហើយពួកគេមួយចំនួន បានរងរបួសនៅក្នុងការប្រយុទ្ធជាមួយកងកម្លាំងទីក្រុង កៀវ នៅតំបន់ Kursk ភាគខាងត្បូងនៃប្រទេសរុស្ស៊ី។

ទោះបីជាយ៉ាងណាក៏ដោយ មកទល់ពេលនេះ រុស្ស៊ី​មិន​បាន​បញ្ជាក់​ពី​វត្តមាន​ទាហាន​កូរ៉េ​ខាង​ជើង​ទេ៕

អត្ថបទ៖ សុខ សុវណ្ណ

ចុចអាន៖ ត្រាំ ព្រមានពូទីន ខ្លាំងៗ ក្នុងការនិយាយទូរស័ព្ទលើកដំបូង ក្រោយជាប់ឆ្នោតអាណត្តិថ្មី