ត្រាំ ព្រមានពូទីន ខ្លាំងៗ ក្នុងការនិយាយទូរស័ព្ទលើកដំបូង ក្រោយជាប់ឆ្នោតអាណត្តិថ្មី

ក្នុងការនិយាយទូរស័ព្ទលើកដំបូងក្រោយជាប់ឆ្នោតប្រធានាធិបតីអាមេរិកអាណត្តិថ្មីកាលពីសប្តាហ៍មុន លោក ដូណាល់ ត្រាំ បានព្រមានខ្លាំងៗទៅមេដឹកនាំរុស្ស៊ី វ្ល៉ាឌីមៀរ ពូទីន កុំដុតភ្លើងសង្គ្រាមនៅអ៊ុយក្រែន ឲ្យកាន់តែក្តៅឲ្យសោះ ហើយថែមទាំងក្រើនរម្លឹកប្រធានាធិបតីរុស្ស៊ី កុំឲ្យភ្លេចថា ទីក្រុងវ៉ាស៊ីនតោនមានវត្តមានយោធាធំណាស់ នៅក្នុងទ្វីបអឺរ៉ុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលនោះ លោក ត្រាំ នៅតែអះអាងថា លោកនឹងស្វែងរកដំណោះស្រាយបញ្ចប់សង្គ្រាមត្រឹមតែមួយថ្ងៃប៉ុណ្ណោះ ប៉ុន្តែមិនបញ្ជាក់ឡើយថាតើនឹងធ្វើដោយរបៀបណា។

ទោះបីជាយ៉ាងណាក៏ដោយ ក្រៅពីរឿងនេះ លោក ត្រាំ និងលោក ពូទីន ក៏បាននិយាយអំពីគោលដៅសន្តិភាពនៅទ្វីបអឺរ៉ុបផងដែរ។

កាលពីថ្ងៃសុក្រ វិមានក្រឹមឡាំងបញ្ជាក់ថា លោកពូទីន ត្រៀមខ្លួនរួចជាស្រេចអស់ហើយដើម្បីពិភាក្សាអំពីបញ្ហាអ៊ុយក្រែនជាមួយលោក ត្រាំ ប៉ុន្តែនោះមិនមានន័យថា លោកផ្លាស់ប្តូរលក្ខខណ្ឌរបស់ទីក្រុងមូស្គូនោះទេ។

សូមបញ្ជាក់ជាថ្មី នៅថ្ងៃទី១៤ខែមិថុនា លោកពូទីន បានដាក់លក្ខខណ្ឌសម្រាប់ការបញ្ចប់សង្រ្គាមដោយ អ៊ុយក្រែនត្រូវបោះបង់មហិច្ឆតាចូលជាសមាជិកអង្គការណាតូ ហើយដកទ័ពទាំងអស់ចេញពីទឹកដីនៃតំបន់៤ ដែលរុស្ស៊ីទាមទារ។

យ៉ាងណា អ៊ុយក្រែនមិនយល់ព្រមឡើយ ដោយ​និយាយ​ថា លក្ខខណ្ឌបែបនេះ មិនអាចទៅរួចទេ ហើយមេដឹកនាំហ្សេលេនស្គី ​ដាក់​ផែនការ​ជ័យ​ជម្នះ ដែល​រួម​មាន​សំណើ​សុំ​ជំនួយ​យោធា​បន្ថែម​ពី​លោក​ខាង​លិចរួចទៅហើយ៕

អត្ថបទ៖ សុខ សុវណ្ណ

ចុចអាន៖ តើទូរស័ព្ទលោក ត្រាំ ពិសេសកម្រិតណា?