រថយន្ត​ក្រុង​ធ្លាក់​ចូលប្រឡាយ​បណ្តាល​ឲ្យ​ស្លាប់និង​របួស​១៤​នាក់​ ក្នុងទីក្រុង Asyut អេហ្ស៊ីប

ក្រុមជួយសង្គ្រោះក្នុងខេត្ត Asyut របស់អេហ្ស៊ីបបានស្រង់សាកសពមនុស្ស៤នាក់កាលពីថ្ងៃអាទិត្យ បន្ទាប់ពីឡានក្រុងដែលដឹកអ្នកដំណើរ ១៤នាក់ បានធ្លាក់ចូលទៅក្នុងប្រឡាយមួយក្នុងសង្កាត់ Dayrout។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ Xinhua នៅថ្ងៃទី០៩ខែធ្នូនេះ។

កាសែតរដ្ឋ Al-Ahram បានរាយការណ៍ថា កិច្ចខិតខំប្រឹងប្រែងស្វែងរកកំពុងបន្តសម្រាប់អ្នកដំណើរដែលបាត់ខ្លួនដែលនៅសេសសល់១០នាក់ទៀត ខណៈដែលអ្នកមុជទឹក និងប៉ូលិសទឹកកំពុងចូលរួមក្នុងប្រតិបត្តិការនេះ។ នៅក្នុងហេតុការណ៍​​មិនទាន់​មានរបាយការណ៍ច្បាស់លាស់ អំពីមូលហេតុពិតប្រាកដដែលបណ្ដាលឲ្យមានហេតុការណ៍​នេះនោះទេ ដោយប៉ូលិសកមពុងស៉ើបអង្គេតនៅឡើយ។

គួរបញ្ជាក់ថាប្រទេសអេហ្ស៊ីបមានអត្រាគ្រោះថ្នាក់ចរាចរណ៍ខ្ពស់។ យោងតាមទីភ្នាក់ងារស្ថិតិផ្លូវការ CAPMAS គ្រោះថ្នាក់ចរាចរណ៍នៅក្នុងប្រទេសនេះបានឆក់យកជីវិតមនុស្សចំនួន៥៨៦១នាក់ក្នុងឆ្នាំ​២០២៣៕

អត្ថបទ៖ ប៊ុន សុភាព