អាមេរិក ត្រៀមដកទ័ព ២០ ០០០នាក់ចេញពីអឺរ៉ុប, ណាតូកំពុងបារម្ភ

តាមការចុះផ្សាយរបស់ RT កាលពីថ្ងៃព្រហស្បតិ៍ទី២៣ខែមករាឆ្នាំ២០២៥ លោក ដូណាល់ ត្រាំ កំពុងត្រៀមដកទ័ពអាមេរិកប្រមាណ ២០ ០០០នាក់ពីទ្វីបអឺរ៉ុបវិញ ពោលគឺស្មើនឹង២០%នៃចំនួនទ័ពអាមេរិក ដែលឈរជើងនៅទីនោះ ហើយនេះគឺជាបញ្ហាប្រឈមសម្រាប់សម្ព័ន្ធមិត្តអង្គការណាតូ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មិនត្រឹមប៉ុណ្ណឹង ប្រភពខាងលើទម្លាយទៀតថា ក្រៅពីដកចេញហើយនោះ លោកត្រាំក៏ចង់ស្នើសុំជំនួយហិរញ្ញវត្ថុ ដើម្បីយកទៅផ្គត់ផ្គង់និងថែទាំកងទ័ពដែលនៅសេសសល់ផងដែរ។

ផែនការនេះត្រូវគេដឹងថា បានលើកឡើងក្នុងជំនួបរវាងលោក ត្រាំ ជាមួយមេដឹកនាំអឺរ៉ុបនាពេលថ្មីៗនេះ ខណៈប្រធានាធិបតីអាមេរិក មិនសប្បាយចិត្តទេដោយនិយាយថា កងទ័ពរបស់ខ្លួនគឺជាអ្នកការពារ ចុះហេតុអ្វីបានជាអាមេរិក ត្រូវចំណាយលើរឿងនេះច្រើនជាងគេ?

ពាក់ព័ន្ធបញ្ហានេះដែរ ក្នុងអំឡុងសន្និសីទសារព័ត៌មានជាមួយអធិការបតីអាល្លឺម៉ង់ Olaf Scholz កាលពីថ្ងៃពុធ, ប្រធានាធិបតីបារាំង Emmanuel Macron បានកត់សម្គាល់ថា «ឥឡូវរដ្ឋបាលថ្មីអាមេរិកបានចូលកាន់តំណែងហើយ ដូច្នេះអឺរ៉ុបដល់ពេលវេលាសំខាន់ដែលត្រូវរឹងមាំហើយ»។

រឿងនេះក៏បង្កជាកង្វល់យ៉ាងធំដល់អង្គការណាតូផងដែរ ស្របពេលសម្ព័ន្ធមិត្តអឺរ៉ុបរបស់ខ្លួន កំពុងប្រឈមមុខនឹងការគំរាមកំហែងពីសំណាក់រុស្ស៊ី ព្រោះរុស្ស៊ីតែងព្រមានថា ខ្លួននៅតែមានលទ្ធភាពវាយប្រហារប្រទេសជាសមាជិកណាតូទាំងឡាយណា ដែលនៅតែគឃ្លើនជួយដល់អ៊ុយក្រែនឥតឈប់។

ពិតណាស់ ប្រសិនបើអាមេរិកដកទ័ពមែន នោះទ្វីបអឺរ៉ុប នឹងកាន់តែមានហានិភ័យនៃការវាយប្រហារពីសំណាក់រុស្ស៊ី ហើយទីក្រុងមូស្គូ កាន់តែបានដៃជាក់ជាមិនខានឡើយ។

សូមបញ្ជាក់ថា បច្ចុប្បន្ន អាមេរិកមានទ័ពប្រមាណ ១០០ ០០០នាក់​ ឈរជើងក្នុងទ្វីបអឺរ៉ុប ដូច្នេះមានន័យថា បើលោក ត្រាំ ដកចេញ២០%មែន នោះទ័ពនៅសល់តែ ៨០ ០០០នាក់ប៉ុណ្ណោះ៕

អត្ថបទ៖ សុវណ្ណ

ចុចអាន៖ ត្រាំ ថា នឹងជួបពូទីនឆាប់ៗ ចំណែក ភាគីអ៊ុយក្រែនឯណោះ ក៏ត្រៀមខ្លួនចរចាហើយដែរ