ត្រាំ ថា នឹងជួបពូទីនឆាប់ៗ ចំណែក ភាគីអ៊ុយក្រែនឯណោះ ក៏ត្រៀមខ្លួនចរចាហើយដែរ

ក្នុងវេទិកាសេដ្ឋកិច្ចពិភពលោក (WEF) នៅទីក្រុងដាវ៉ូស នៃប្រទេសស្វីស កាលពីថ្ងៃព្រហស្បតិ៍ទី២៣ខែមករាឆ្នាំ២០២៥ ប្រធានាធិបតីអាមេរិកលោក ដូណាល់ ត្រាំ បានលើកឡើងថា លោកនឹងជួបជាមួយមេដឹកនាំរុស្ស៊ី វ្ល៉ាឌីមៀរ ពូទីន ក្នុងពេលឆាប់ៗនេះ ដើម្បីពិភាក្សាពន្លត់ភ្លើងសង្គ្រាមអ៊ុយក្រែន ហើយនោះមិនត្រឹមជាសារៈសំខាន់ចំពោះសេដ្ឋកិច្ចពិភពលោកប៉ុណ្ណោះទេ ប៉ុន្តែវាក៏ការពារលែងឲ្យមានមនុស្សស្លាប់ច្រើននាក់ទៀតផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងតាមរយៈវីដេអូ «មេដឹកនាំសេតវិមាននិយាយថា មានរឿងជាច្រើននឹងកើតឡើងក្នុងនិងក្រៅអាមេរិក ប៉ុន្តែរឿងដ៏សំខាន់បំផុតមួយគឺថា ខ្ញុំនឹងជួបលោកពូទីន ឲ្យបានឆាប់បំផុត ដើម្បីបញ្ចប់សង្គ្រាម។ ជីវិតរាប់លានត្រូវបាត់បង់! ខ្ញុំមិនមែននិយាយពីសេដ្ឋកិច្ច ហើយក៏មិនមែននិយាយពីធនធានធម្មជាតិដែរ គឺខ្ញុំនិយាយអំពីមនុស្សវ័យក្មេងជាច្រើននាក់ ដែលត្រូវបានគេសម្លាប់នៅក្នុងសង្គ្រាមនេះ»។

ស្របពេលជាមួយគ្នានោះ លោក ត្រាំ គូសបញ្ជាក់ថា ភាគីអ៊ុយក្រែនឯណោះ ក៏ត្រៀមខ្លួនរួចរាល់ហើយអស់ដែរ ដើម្បីចូលមកកាន់តុចរចាបញ្ចប់សង្គ្រាម។

ឆ្លើយតបសំណួរប្រធាន WEF លោក Borge Brende ថាតើនឹងមានកិច្ចព្រមព្រៀងសន្តិភាពទេ? លោក ត្រាំ ប្រាប់ថា «សូមអ្នកទៅសួររុស្ស៊ីទៅ ព្រោះថា អ៊ុយក្រែន ត្រៀមខ្លួនរួចអស់ហើយ»។

សម្តីលោកត្រាំកើតឡើងបន្ទាប់ពី អ្នកសាធារណរដ្ឋរូបនេះ ព្រមានប្រើធម៌ក្តៅលើលោកពូទីន ដើម្បីបញ្ចប់សង្គ្រាម និងគំរាមដាក់ទណ្ឌកម្មបន្ថែមលើរុស្ស៊ី​ បើមិន​ព្រម​ចូល​តុចរចា។

ប្រធានាធិបតីអាមេរិក បានបង្ហោះសារនៅក្នុងបណ្តាញសង្គម Truth Social ថា សូមបញ្ឈប់សង្គ្រាមគួរឲ្យអស់សំណើចនេះទៅ! លោកស្រឡាញ់ប្រជាជនរុស្ស៊ី និងមិនចង់ធ្វើឲ្យរុស្ស៊ីឈឺចាប់ឡើយ! ល្មមដល់ពេលត្រូវចរចាគ្នាហើយ។ យើងអាចប្រើធម៌ក្តៅក៏បាន ធម៌ត្រជាក់ក៏បាន ប៉ុន្តែធម៌ត្រជាក់វាស្រួលជាង។ 

ដំណោះស្រាយជម្លោះរុស្ស៊ី-អ៊ុយក្រែន គឺជាអាទិភាពកំពូលមួយក្នុងអំឡុងយុទ្ធនាការរកសំឡេងឆ្នោត ដោយអ្នកសាធារណរដ្ឋរូបនេះ ឃោសនាថា លោកនឹងបញ្ចប់សង្គ្រាមត្រឹមរយៈពេល២៤ម៉ោងប៉ុណ្ណោះ ដ្បិតតែអ្នកជំនាញអន្តរជាតិសឹងតែមួយពិភពលោក ហ៊ានអះអាងថា មិនអាចទៅរួចក៏ដោយ៕

អត្ថបទ៖ សុវណ្ណ

ចុចអាន៖ ត្រាំ គំរាម​​ដាក់ទណ្ឌកម្មរុស្ស៊ី និង​ប្រទេស​ពាក់ព័ន្ធ ​ឱ្យធ្ងន់ធ្ងរ ​បើមិនបញ្ចប់សង្រ្គាមនៅអ៊ុយក្រែន