លោក ណេតាន់យ៉ាហ៊ូ ជា​មេ​ដឹក​នាំ​បរទេស​ដំបូង​គេ ដែល​នឹង​ជួប​ជាមួយ ត្រាំ ក្នុង​អាណត្តិ​ថ្មី

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ នឹងធ្វើទស្សនកិច្ចនៅសេតវិមាននា​សប្តាហ៍ក្រោយ ដោយធ្វើឲ្យ​គាត់ក្លាយជាមេដឹកនាំបរទេសដំបូងគេដែលជួបជាមួយលោក ដូណាល់ ត្រាំ ក្នុងរដ្ឋធានី​វ៉ាស៊ីតោន​ឌីស៊ី ចាប់តាំងពីប្រធានាធិបតីសហរដ្ឋអាមេរិក​រូប​នេះ​បានឡើងកាន់អំណាច​សា​ជា​ថ្មី​ម្ដង​ទៀត​នៅ​ក្នុង​អាណត្តិ​ទី​២។

រដ្ឋាភិបាលអ៊ីស្រាអែល បានបញ្ជាក់កាលពីថ្ងៃអង្គារថា លោក ត្រាំ បានអញ្ជើញលោក ណេតាន់យ៉ាហ៊ូ ទៅកាន់សេតវិមាននៅថ្ងៃទី​៤​ខែកុម្ភៈ។

ការប្រកាសនេះកើតឡើងប៉ុន្មានថ្ងៃបន្ទាប់ពីលោក ត្រាំ បានអំពាវនាវឲ្យ​តំបន់​​ហ្គាហ្សា​បញ្ជូន​ប្រជាជនរបស់ខ្លួនទៅកាន់ប្រទេសហ្ស៊កដានី និងអេហ្ស៊ីប ដែលជាសំណើមួយដែលត្រូវបានច្រានចោលភ្លាមៗដោយមេដឹកនាំក្នុងតំបន់ ដែលបានប្រដូចវាទៅនឹងការបោសសម្អាតជនជាតិភាគតិច។

លោក ត្រាំ បានទទួលគុណសម្បត្តិ​​ច្រើន​សម្រាប់កិច្ចព្រមព្រៀងបទឈប់បាញ់ដ៏ផុយស្រួយនៅហ្គាហ្សា ដែលបានចូលជាធរមានមួយថ្ងៃមុនកា​រ​ឡើង​កាន់​តំណែង​របស់លោកកាល​ពី​ថ្ងៃ​ទី​២០​ខែ​មករា។

រហូតមកដល់ពេលនេះ កិច្ចព្រមព្រៀងនេះត្រូវបានគេមើលឃើញថាជាការបញ្ចប់ការប្រយុទ្ធគ្នាជាបណ្ដោះអាសន្ន និងការដោះលែងចំណាប់ខ្មាំង​ជា​ជនជាតិអ៊ីស្រាអែល៧​នាក់ និងអ្នកទោសប៉ាឡេស្ទីនរាប់រយនាក់។ បទ​ឈប់​បាញ់​នេះក៏បានអនុញ្ញាតឲ្យប្រជាជនប៉ាឡេស្ទីនរាប់សែននាក់ត្រឡប់ទៅ​កាន់​ផ្ទះ​សម្បែង​របស់​ពួកគេ​នៅភាគខាងជើងហ្គាហ្សាវិញផង​ដែរ។

សូម​បញ្ជាក់​ថា អាមេរិកផ្តល់ជំនួយយោធាដល់អ៊ីស្រាអែលរាប់ពាន់លានដុល្លារក្នុងមួយឆ្នាំៗ។ នៅក្នុងក្រឹត្យដំបូងមួយរបស់លោក ត្រាំ បានបង្កក​ជំនួយអន្តរជាតិស្ទើរតែទាំងអស់ លើកលែងតែជំនួយផ្នែកយោធាដល់អេហ្ស៊ីប និងអ៊ីស្រាអែល។

កាលពីសប្តាហ៍មុន លោក ត្រាំ ក៏បានអនុញ្ញាតឲ្យ​បញ្ជូន​​គ្រាប់បែក​ទម្ងន់ ៩០០​គីឡូក្រាម​​ទៅអ៊ីស្រាអែល ដែលត្រូវបានផ្អាកដោយអ្នកកាន់តំណែងមុនរបស់គាត់ គឺអតីតប្រធានាធិបតីអាមេរិក លោក ចូ បៃដិន កាលពីខែឧសភាឆ្នាំមុន៕

ដោយ៖ ឈាង