ព័ត៌មានអន្ដរជាតិ

មេដឹកនាំចិននិងថៃជួបគ្នា ចំពេល លោក ត្រាំ ក្រឡុកនយោបាយនិងសេដ្ឋកិច្ចសកល

បានផុស

១ year មុន

នៅ

ថ្ងៃព្រហស្បតិ៍ ៦ កុម្ភៈ ២០២៥

ដោយ

នាយករដ្ឋមន្ត្រីថៃ ផែថងថាន ស៊ីណាវ៉ាត្រា (Paetongtarn Shinawatra) កំពុងដឹកនាំគណៈប្រតិភូថៃ បំពេញទស្សនកិច្ចចំនួន៤ថ្ងៃនៅក្នុងប្រទេសចិន ដោយបានជួបពិភាក្សាជាមួយប្រមុខដឹកនាំចិន គឺប្រធានាធិបតី Xi Jinping ក្នុងខណៈពេលដែលពិភពលោកប្រឈមភាពមិនច្បាស់លាស់ ដោយសារនយោបាយរបស់មេដឹកនាំសហរដ្ឋអាមេរិក។

នាយករដ្ឋមន្ត្រីថៃ ផែថងថាន ស៊ីណាវ៉ាត្រា ក្នុងជំនួបប្រធានាធិបតីចិន Xi Jinping នៅថ្ងៃព្រហស្បតិ៍នេះ។ FB

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមបណ្តាញសង្គមហ្វេសប៊ុករបស់នាយករដ្ឋមន្ត្រីថៃ ដែលមានឈ្មោះថា «Ing Shinawatra) បានបង្ហាញពីការជួបសន្ទនាជាមួយប្រធានាធិបតីចិន លោក Xi Jinping នៅទីក្រុងប៉េកាំង។

ជំនួបរបស់ប្រមុខដឹកនាំនៃប្រទេសដែលមានសេដ្ឋកិច្ចរីកចម្រើនលួតលាស់ខ្លាំងក្នុងតំបន់អាស៊ីជាប់ភូមិផងរបងជាមួយទាំងពីរ ក៏កើតមានឡើងចំពេលដែលពិភពលោកប្រឈមភាពរំជើបរំជួលជាខ្លាំងដោយសារតែការឡើងកាន់អំណាចរបស់ លោក ដូណាល់ ត្រាំ ដែលក្រឡុកនយោបាយ និងសេដ្ឋកិច្ចសកលចាប់តាំងពីថ្ងៃទី២០ខែមករាដើមឆ្នាំនេះ។

ថ្វីបើព័ត៌មានលម្អិតនៃជំនួបមិនត្រូវបានផ្សព្វផ្សាយភ្លាម ប៉ុន្តែមានការលើកឡើងកន្លងមកថា ភាគីទាំងពីរត្រូវបានគេរំពឹងថានឹងពិភាក្សាគ្នាដែលនឹងសង្កត់ធ្ងន់លើវិធានការរឹតបន្តឹងសន្តិសុខដើម្បីធ្វើឱ្យភ្ញៀវទេសចរចិនមានអារម្មណ៍សុវត្ថិភាព។

សារព័ត៌មានអាល្លឺម៉ង់ DW បានផ្សាយថា សម្រាប់ប្រទេសថៃ ប្រទេសចិនគឺជាដៃគូពាណិជ្ជកម្មធំបំផុត និងជាទីផ្សារទេសចរណ៍ក្នុងស្រុកដ៏ធំបំផុតរបស់ខ្លួន។ ប៉ុន្តែការចាប់ជម្រិតតារាសម្ដែងចិនម្នាក់ពីប្រទេសថៃដ៏ល្បីមួយ និងករណីការបាញ់រះបណ្តាលឲ្យស្លាប់នឹងរបួសទេសចរចិនកាលពីខែកញ្ញាឆ្នាំ២០២៣ បានធ្វើឲ្យភ្ញៀវទេសចរចិនរារែកក្នុងការធ្វើដំណើរទៅកាន់ប្រទេសថៃ។

កាលពីខែមករា តារាសម្ដែង Wang Xing បានជិះយន្តហោះទៅទីក្រុងបាងកក ដើម្បីអ្វីដែលលោកគិតថាជាការអញ្ជើញឲ្យចូលរួមសម្ដែង។ ផ្ទុយទៅវិញ គាត់ត្រូវបានគេចាប់ជម្រិតឡើងនៅអាកាសយានដ្ឋាន ហើយត្រូវបានបើកឆ្លងកាត់ព្រំដែនទៅកាន់ទីក្រុង Myawaddy ប្រទេសមីយ៉ាន់ម៉ា ហើយត្រូវបានបង្ខំឱ្យធ្វើការនៅក្នុងមជ្ឈមណ្ឌលបោកប្រាស់តាមអ៊ីនធឺណិត។

លោក Wang ត្រូវបានជួយសង្គ្រោះដោយអាជ្ញាធរថៃរយៈពេល៤ថ្ងៃបន្ទាប់ពីគាត់បានបាត់ខ្លួនក្នុងខែមករា ប៉ុន្តែករណីនេះបានបង្កឱ្យមានការរំជើបរំជួលយ៉ាងខ្លាំងនៅក្នុងប្រទេសចិន និងទូទាំងពិភពលោក ដែលជំរុញឱ្យមន្ត្រីថៃ និងចិនសន្យាចាត់វិធានការបន្ថែមទៀត៕

ដោយ រ៉ាន់ រើយ