គីម ជុងអ៊ុន គំរាមពង្រឹងកម្មវិធីនុយក្លេអ៊ែរ ​សងសឹកសម្ព័ន្ធភាពយោធា អាមេរិក-ជប៉ុន-កូរ៉េខាងត្បូង

ក្នុងខួបលើកទី៧៧នៃការបង្កើតកងទ័ពប្រជាជនកូរ៉េកាលពីថ្ងៃសៅរ៍ទី៨ខែកុម្ភៈឆ្នាំ២០២៥ មេដឹកនាំកូរ៉េខាងជើងលោក គីម ជុងអ៊ុន បានបង្ហាញការខឹងសម្បាយ៉ាងខ្លាំងចំពោះភាពជាដៃគូយោធារវាងសហរដ្ឋអាមេរិក, ជប៉ុននិងកូរ៉េខាងត្បូង ហើយប្តេជ្ញាចាត់វិធានការសងសឹក ក្នុងនោះរួមទាំងការពង្រឹងកម្មវិធីអាវុធនុយក្លេអ៊ែររបស់ខ្លួនផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ KCNA, លោក គីម ថ្លែងថា សម្ព័ន្ធភាពយោធាត្រីភាគីនោះ បានបង្កជាការគំរាមយ៉ាងធំចំពោះកូរ៉េខាងជើង ព្រោះវាជាផែនការរៀបចំឡើងដោយសហរដ្ឋអាមេរិក ដើម្បីប្រែក្លាយតំបន់នេះឲ្យក្លាយទៅជាប្លុកយោធាដូចទៅនឹងអង្គការណាតូ ហើយបង្កអស្ថិរភាពនៅឧបទ្វីបកូរ៉េ ព្រមទាំងចោទជាបញ្ហាប្រឈមយ៉ាងធ្ងន់ធ្ងរចំពោះបរិយាកាសសន្តិសុខចំពោះកូរ៉េខាងជើង។ 

ស្របពេលជាមួយគ្នានោះ លោកគីម ប្រកាសថា ដើម្បីឆ្លើយតបទៅការគំរាមកំហែងទាំងនេះ ទីក្រុងព្យុងយ៉ាងនឹងពង្រីកថែមទាំងធ្វើទំនើបកម្មឃ្លាំងអាវុធនុយក្លេអ៊ែររបស់ខ្លួនផងដែរ។

អ្នកជំនាញប៉ាន់ប្រមាណថា កូរ៉េខាងជើងមានក្បាលគ្រាប់នុយក្លេអ៊ែរចន្លោះពី ៤០ទៅ៥០គ្រាប់ ហើយមានលទ្ធភាពនិងធនធានគ្រប់គ្រាន់ សម្រាប់ការផលិតថែមទៀត។

យ៉ាងណា ការគំរាមរបស់មេដឹកនាំកូរ៉េខាងជើង កើតឡើងត្រឹមប៉ុន្មានថ្ងៃប៉ុណ្ណោះបន្ទាប់ពីប្រធានាធិបតីអាមេរិក ដូណាល់ ត្រាំ បង្ហាញបំណងជួបជាមួយលោក គីម ជុងអ៊ុន ម្តងទៀត ហើយចាប់ផ្តើមទំនាក់ទំនងផ្នែកការទូតរវាងទីក្រុងវ៉ាស៊ីនតោននិងព្យុងយ៉ាង។

ក្នុងសន្និសីទសារព័ត៌មានជាមួយនាយករដ្ឋមន្ត្រីជប៉ុន ហ្ស៊ីកេរុ អ៊ីហ្ស៊ីបា នៅឯសេតវិមានកាលពីថ្ងៃសុក្រទី៧ខែកុម្ភៈឆ្នាំ២០២៥ លោកត្រាំ បាននិយាយដូច្នេះ «ខ្ញុំគិតថា វាជាលាភធំសម្រាប់មនុស្សគ្រប់គ្នាដែលឃើញ ខ្ញុំធ្វើការជាមួយគាត់។ ខ្ញុំចង់មានន័យថា ខ្ញុំចុះសម្រុងជាមួយគាត់ ហើយគាត់ក៏ចុះសម្រុងជាមួយខ្ញុំដែរ ហើយនោះជារឿងល្អ មិនមែនជារឿងអាក្រក់ទេ។ យើងនឹងមានទំនាក់ទំនងជាមួយកូរ៉េខាងជើង និងជាមួយលោក គីម ជុងអ៊ុន តែម្តង។ ខ្ញុំ​គិត​ថា​ខ្ញុំ​បាន​បញ្ឈប់​សង្គ្រាមហើយ! ជ័យជម្នះក្នុងការបោះឆ្នោតឆ្នាំ២០១៦ របស់ខ្ញុំបានជួយការពារជម្លោះ។ ខ្ញុំគិតថា បើខ្ញុំមិនឈ្នះការបោះឆ្នោតពិសេសនោះទេ អ្នកប្រហែលស្ថិតក្នុងស្ថានភាពដ៏អាក្រក់ហើយ ប៉ុន្តែ​ខ្ញុំ​ធ្វើបាន ហើយ​យើង​មាន​ទំនាក់ទំនង​ល្អ​ណាស់»។

សូមជម្រាបជាថ្មី ក្នុងឆ្នាំ២០១៨ លោកត្រាំ និងលោកគីម បានជួបគ្នានៅប្រទេសសិង្ហបុរី សម្រាប់កិច្ចប្រជុំកំពូលលើកដំបូងរវាងប្រធានាធិបតីអាមេរិកដែលកំពុងកាន់អំណាច ជាមួយមេដឹកនាំកូរ៉េខាងជើង។ កិច្ចប្រជុំនោះ សម្រេចបានកិច្ចព្រមព្រៀងធំមួយស្តីពីការរំសាយអាវុធនុយក្លេអ៊ែរ ទោះបីជាគេមិនដឹងលម្អិតក៏ដោយ។

កិច្ចប្រជុំកំពូលលើកទីពីរគឺនៅទីក្រុងហាណូយក្នុងឆ្នាំ២០១៩ ប៉ុន្តែវាបានបញ្ចប់ទៅដោយគ្មានកិច្ចព្រមព្រៀងអ្វីទេ ព្រោះតែមានការខ្វែងគំនិតគ្នាលើវិធានការបន្ធូរបន្ថយទណ្ឌកម្ម និងកម្មវិធីនុយក្លេអ៊ែររបស់កូរ៉េខាងជើង។

លុះមកដល់ចុងឆ្នាំនោះ លោក ត្រាំ បានក្លាយជាប្រធានាធិបតីកាន់តំណែងដំបូងគេក្នុងប្រវត្តិសាស្រ្តអាមេរិក ដែលឈានជើងលើទឹកដីកូរ៉េខាងជើង ដោយមេដឹកនាំទាំងពីរ បានជួបគ្នាក្នុងតំបន់គ្មានយោធា ដែលពុះចែកកូរ៉េខាងជើងនិងកូរ៉េខាងត្បូង៕

អត្ថបទ៖ សុខ សុវណ្ណ

ចុចអាន៖ កូរ៉េខាងជើង បាញ់មីស៊ីលចេញពីសមុទ្រ កម្លាអាមេរិក