បុរសកូរ៉េខាងជើងម្នាក់ឆ្លងព្រំដែនចូលកូរ៉េខាងត្បូង ចំពេលមានភាពតានតឹងខ្លាំង

យោងតាមការចេញផ្សាយរបស់ទីភ្នាក់ងារព័ត៌មាន​AP នៅថ្ងៃ​សុក្រ​ទី០៤ខែកក្កដានេះ បុរសជនជាតិកូរ៉េខាងជើងម្នាក់បានឆ្លងកាត់តំបន់គ្មានយោធាដែលមានកំពែងការពារដ៏​រឹងមាំ ចូលទៅក្នុងប្រទេសកូរ៉េខាងត្បូង ហើយត្រូវបានចាប់ខ្លួនដោយកងកម្លាំងកូរ៉េខាងត្បូងកាលពីយប់ថ្ងៃព្រហស្បតិ៍។

បុរសជនជាតិកូរ៉េខាងជើងម្នាក់ដែលគ្មានអាវុធជាប់ខ្លួន ត្រូវបានយោធាកូរ៉េខាង​ត្បូង​ប្រទះឃើញនៅជិតព្រំដែនភាគខាងលិច ហើយត្រូវបាននាំ​ចេញ​ពី​តំបន់​គ្មាន​យោធា​​ដ៏​គ្រោះថ្នាក់។ យោធាកូរ៉េខាងត្បូងបានជូនដំណឹងដល់បញ្ជាការអង្គការសហប្រជាជាតិដឹកនាំដោយសហរដ្ឋអាមេរិក ហើយបាននិយាយថា មិនមានសញ្ញានៃសកម្មភាពមិនធម្មតាពីកូរ៉េខាងជើងទេ។ អាជ្ញាធរ​កំពុង​ស៊ើបអង្កេត​ថា​តើ​វា​ជា​ការ​រត់ចោលប្រទេស​ឬ​អត់​។

ឧបទ្ទវហេតុនេះកើតឡើងចំពេលដែលភាពតានតឹងកាន់តែខ្លាំងឡើងរវាងកូរ៉េទាំងពីរដែលបានចូលរួមក្នុងយុទ្ធសាស្ត្របែបសង្គ្រាមត្រជាក់ រួមទាំងការបង្ហោះប៉េងប៉ោងសម្រាមដោយកូរ៉េខាងជើង និងការបំពងសំឡេងដោយកូរ៉េខាងត្បូង។ ភាពតានតឹងទាំងនេះបានផ្ទុះឡើង បើទោះបីជាមានការខិតខំប្រឹងប្រែងនាពេលថ្មីៗនេះដោយប្រធានាធិបតីថ្មីរបស់ប្រទេសកូរ៉េខាងត្បូងលោក Lee Jae Myung ដើម្បីបន្ធូរបន្ថយអរិភាពដោយការបញ្ចប់ការផ្សាយតាមឧបករណ៍បំពងសំឡេង និងការរឹតបន្តឹងយុទ្ធនាការប៉េងប៉ោងដែលដឹកនាំដោយសកម្មជនកូរ៉េខាងត្បូងក៏ដោយ។

គួរបញ្ជាក់ថា ការរត់ឆ្លងព្រំដែនកាន់តែកើតមានជាញឹកញាប់ ដោយមានព្រឹត្តិការណ៍ស្រដៀងគ្នាកាលពីឆ្នាំមុនដូចជាការឆ្លងកាត់ដោយចៃដន្យដោយទាហានកូរ៉េខាងជើងក្នុងអំឡុងពេលសកម្មភាពការពារព្រំដែន។ មកដល់​ពេលនេះ ការទូតរវាងប្រទេសទាំងពីរនៅតែជាប់គាំង បន្ទាប់ពីការដួលរលំនៃកិច្ចចរចានុយក្លេអ៊ែររវាងសហរដ្ឋអាមេរិក និងកូរ៉េខាងជើងក្នុងឆ្នាំ២០១៩ ហើយកូរ៉េខាងជើងនៅតែបន្តសាងសង់ឃ្លាំងអាវុធរបស់ខ្លួន ដោយគំរាមកំហែងទាំងទីក្រុងវ៉ាស៊ីនតោន និងទីក្រុងសេអ៊ូល៕

អត្ថបទ៖ ប៊ុន សុភាព