ព័ត៌មានអន្ដរជាតិ

UN៖ មនុស្ស១៤០០នាក់បានស្លាប់ក្នុងការបង្ក្រាបលើការតវ៉ានៅបង់ក្លាដែស ខណៈចាប់ខ្លួនជាង១១០០០នាក់

បានផុស

១ year មុន

នៅ

ថ្ងៃព្រហស្បតិ៍ ១៣ កុម្ភៈ ២០២៥

ដោយ

ការិយាល័យសិទ្ធិមនុស្សរបស់អង្គការសហប្រជាជាតិ កាលពីថ្ងៃពុធបានប៉ាន់ប្រមាណថា មនុស្សរហូតដល់១៤០០នាក់ អាចត្រូវបានសម្លាប់នៅក្នុងប្រទេសបង់ក្លាដែសក្នុងរយៈពេលបីសប្តាហ៍ក្នុងការបង្ក្រាបលើការតវ៉ាដែលដឹកនាំដោយក្រុមនិស្សិតប្រឆាំងនឹងអតីតនាយករដ្ឋមន្ត្រី លោកស្រី Sheikh Hasina។ នេះបើយោងតាមការចេញផ្សាយរបស់សារព័ត៌មាន CNN នៅថ្ងៃទី១៣ខែកុម្ភៈនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងរបាយការណ៍ថ្មីមួយរបស់ការិយាល័យអង្គការសិទ្ធិមនុស្សអង្គការសហប្រជាជាតិដែលមានមូលដ្ឋាននៅទីក្រុងហ្សឺណែវ បានឲ្យដឹងថា មានការសហការគ្នារវាងសេវាសន្តិសុខ និងចារកម្មជាប្រព័ន្ធក្នុងការរំលោភសិទ្ធិមនុស្ស ដែលវាអាចឈានដល់ឧក្រិដ្ឋកម្មប្រឆាំងមនុស្សជាតិ និងទាមទារឱ្យមានការស៊ើបអង្កេតបន្ថែម។

ការិយាល័យសិទ្ធិមនុស្សបានប៉ាន់ប្រមាណថា មនុស្សរហូតដល់១៤០០នាក់អាចត្រូវបានសម្លាប់នៅក្នុងការតវ៉ាហិង្សាមួយរវាងថ្ងៃទី១៥ខែកក្កដា និងថ្ងៃទី៥ខែសីហាឆ្នាំ២០២៤ ដែលជាថ្ងៃនាយករដ្ឋមន្ត្រី Sheikh Hasina បានភៀសខ្លួនទៅប្រទេសឥណ្ឌាចំពេលមានការបះបោរហិង្សាកាន់តែខ្លាំងនោះ។

ក្នុងរបាយការណ៍ក៏បានបង្ហាញថា មនុស្សរាប់ពាន់នាក់ទៀតបានរងរបួសក្នុងរយៈប៉ុន្មានសប្តាហ៍នៃការតវ៉ា និងបន្ទាប់ពីការតវ៉ា ហើយភាគច្រើននៃអ្នកស្លាប់ និងរបួសត្រូវបានបាញ់ដោយកងកម្លាំងសន្តិសុខរបស់ប្រទេសបង់ក្លាដែស។

លើសពីនេះមនុស្សជាង ១១៧០០នាក់ត្រូវបានឃុំខ្លួន ហើយប្រហែលពី១២ ទៅ១៣% ឬប្រហែល១៨០ នាក់នៃអ្នកស្លាប់ គឺជាកុមារ។ ក្នុងករណីខ្លះកម្លាំងសន្តិសុខបានចូលរួមក្នុងការប្រហារជីវិតដោយចេតនាបាញ់សម្លាប់បាតុករដែលគ្មានអាវុធថែមទៀត។

ពាក់ព័ន្ធបញ្ហានេះដែរប្រធានសិទ្ធិមនុស្សអង្គការសហប្រជាជាតិ លោក Volker Turk បានលើកឡើងពីការបង្ក្រាបអំឡុងពេលតវ៉ា ដោយនិយាយថា៖«ការសម្លាប់ក្រៅប្រព័ន្ធតុលាការ ការចាប់ខ្លួន និងការឃុំខ្លួនដោយបំពាន និងការធ្វើទារុណកម្ម»ត្រូវបានធ្វើឡើងដោយមានចំណេះដឹង និងការសម្របសម្រួលពីថ្នាក់ដឹកនាំនយោបាយ និងមន្ត្រីសន្តិសុខកំពូល ដើម្បីបង្ក្រាបការតវ៉ា។

គួរបញ្ជាក់ថា ក្រុមស្វែងរកការពិតរបស់អង្គការសហប្រជាជាតិត្រូវបានដាក់ពង្រាយទៅកាន់ប្រទេសបង់ក្លាដែសតាមការអញ្ជើញរបស់មេដឹកនាំបណ្តោះអាសន្នរបស់ប្រទេសគឺលោក Muhammad Yunus ជ័យលាភីរង្វាន់ណូបែលសន្តិភាព ដើម្បីពិនិត្យមើលការបះបោរ និងការបង្ក្រាបដោយហិង្សាអំឡុងពេលមានការតវ៉ា និងស្វែករកការដាក់ទោសលោកស្រីSheikh Hasina៕