ព័ត៌មានអន្ដរជាតិ

អាមេរិក ចូលដៃជាមួយប្រទេសផ្ដាច់ការចំនួន៣ បដិសេធចោទប្រកាន់ ពូទីន រឿងបង្កសង្គ្រាមនៅអ៊ុយក្រែន

បានផុស

១ year មុន

នៅ

ថ្ងៃអង្គារ ២៥ កុម្ភៈ ២០២៥

ដោយ

Chheang

សហរដ្ឋអាមេរិក រួមជាមួយប្រទេសផ្ដាច់ការចំនួនបី ដូចជា កូរ៉េខាងជើង រុស្ស៊ី និងបេឡារុស បានច្រានចោលសេចក្តីសម្រេចរបស់មហាសន្និបាតអង្គការសហប្រជាជាតិ ដែលអំពាវនាវឲ្យកងកម្លាំងរុស្ស៊ីដកខ្លួនចេញពីប្រទេសអ៊ុយក្រែន និងបដិសេធការចោទប្រកាន់លើលោក វ្ល៉ាឌីមៀរ ពូទីន ចំពោះការឈ្លានពានដោយខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ញត្តិដែលត្រូវបានព្រាងដោយអ៊ុយក្រែន និងបណ្តាប្រទេសអឺរ៉ុបផ្សេងទៀត បានទទួលបានសំឡេងគាំទ្រចំនួន៩៣ នៅអង្គការសហប្រជាជាតិ កាលពីថ្ងៃចន្ទទី២៤ខែកុម្ភៈឆ្នាំ២០២៥ ខណៈប្រទេសចំនួន១៨ បានបោះឆ្នោតប្រឆាំងនឹងវា ហើយប្រទេសចំនួន៦៤ រួមទាំង ប្រទេសចិន ផងដែរ បានអនុប្បវាទ។

សហរដ្ឋអាមេរិក បានជំរុញឲ្យប្រទេសផ្សេងទៀតបោះឆ្នោតប្រឆាំងនឹងសេចក្ដីសម្រេចនេះ ហើយបានស្នើដំណោះស្រាយដាច់ដោយឡែកមួយ ដែលទាមទារឲ្យបញ្ចប់សង្គ្រាមរយៈពេល ៣ឆ្នាំ ប៉ុន្តែមិនបានលើកឡើងឲ្យក្រុងមូស្គូត្រូវទទួលខុសត្រូវណាមួយនៅក្នុងជម្លោះនោះទេ។

កាលពីសប្តាហ៍មុន ប្រធានាធិបតីអាមេរិក ដូណាល់ ត្រាំ បានស្តីបន្ទោសប្រធានាធិបតីអ៊ុយក្រែនលោក វ៉ុលឡូឌីមៀរ ហ្សេលេនស្គី ថាជាអ្នកចាប់ផ្តើមសង្រ្គាម ហើយបានហៅគាត់ថាជា «ជនផ្តាច់ការ»។

លោក ត្រាំ បានសរសេរសារបង្ហោះនៅលើបណ្ដាញសង្គម TruthSocial ថា៖ «មេដឹកនាំផ្តាច់ការដោយគ្មានការបោះឆ្នោត ហ្សេលេនស្គី គួរតែបញ្ចេញសកម្មភាពឲ្យលឿន បើមិនដូច្នោះគាត់នឹងត្រូវបាត់បង់ប្រទេស»។

យ៉ាងណាមិញ ក្រោយមក លោក ត្រាំ បានសារភាពថា លោក ពូទីន ពិតជាបានឈ្លានពានអ៊ុយក្រែន ប៉ុន្តែបានអះអាងថា សហរដ្ឋអាមេរិក និងទីក្រុងកៀវ មិនគួរអនុញ្ញាតឲ្យ ពូទីន ធ្វើការឈ្លានពានបាននោះឡើយ ហើយលោក ត្រាំ បានបញ្ជាក់ម្តងទៀតថា សង្រ្គាមនឹងមិនចាប់ផ្តើមទេ បើគាត់ជាប្រធានាធិបតីអាមេរិកកាលពីឆ្នាំ២០២២៕

ដោយ៖ ឈាង