​​ភ្នាក់ងារ UN៖ ផ្ទៃដីកសិកម្ម​៩៥%នៅហ្គាហ្សា​មិន​បាន​ប្រើប្រាស់ ដោយសារ​សង្គ្រាម

យោងតាមការវាយតម្លៃភូមិសាស្ត្ររួមគ្នាដោយអង្គការស្បៀងអាហារ និងកសិកម្មរបស់អង្គការសហប្រជាជាតិ (FAO) និងមជ្ឈមណ្ឌលផ្កាយរណបអង្គការសហប្រជាជាតិ (UNOSAT) ផ្ទៃដីកសិកម្មជាង៩៥ភាគរយនៃតំបន់ហ្គាហ្សាបានក្លាយទៅជាមិនអាចប្រើប្រាស់បានដោយសារតែសង្គ្រាមដែលកំពុងបន្ត។ នេះបើតាមការចេញផ្សាយរបស់សារព័ត៌មាន​ Al Jazeera នៅថ្ងៃទី២៧ខែឧសភានេះ។

របាយការណ៍ដែលបានចេញផ្សាយកាលពីថ្ងៃចន្ទ បានបង្ហាញពីស្ថានភាពដ៏អាក្រក់នៃសមត្ថភាពផលិតស្បៀងរបស់ទឹកដីហ្គាហ្សា ដែលជា «ការប្រកាសអាសន្ន» និងការព្រមានអំពីហានិភ័យនៃគ្រោះទុរ្ភិក្សកាន់តែធ្ងន់ធ្ងរ។

ការវាយតម្លៃបានរកឃើញថា ៨០ភាគរយនៃដីដំណាំរបស់ ហ្គាហ្សា ត្រូវបានខូចខាតដោយមានតែ ៦៨៨ ហិកតាស្មើនឹង៤.៦ ភាគរយនៃផ្ទៃដីដាំដុះសរុបដែលអាចដាំដុះបាន។ បន្ថែមពីលើការបំផ្លិចបំផ្លាញដីស្រែចម្ការ ហេដ្ឋារចនាសម្ព័ន្ធកសិកម្មសំខាន់ៗក៏ត្រូវបានបំផ្លាញផងដែរដូចជា ផ្ទះកញ្ចក់ជាង៧០ភាគរយ និងអណ្តូងកសិកម្មជាង ៨០ភាគរយត្រូវបានខូតខាត ឬបំផ្លាញ។

លោកស្រី Beth Bechdol អគ្គនាយករងរបស់ FAO បាននិយាយថា៖«កម្រិតនៃការបំផ្លិចបំផ្លាញនេះ មិនមែនគ្រាន់តែជាការបាត់បង់ហេដ្ឋារចនាសម្ព័ន្ធប៉ុណ្ណោះទេ វាគឺជាការដួលរលំនៃប្រព័ន្ធកសិកម្ម និងខ្សែជីវិតប្រជាជន»។

របាយការណ៍នេះបន្ថែមពីលើការព្រមានមុនដែលថា ប្រជាជនទាំងអស់នៅហ្គាហ្សាប្រឈមមុខនឹងហានិភ័យធ្ងន់ធ្ងរនៃគ្រោះទុរ្ភិក្សដោយសារជម្លោះអូសបន្លាយ ការផ្លាស់ទីលំនៅរីករាលដាល និងការរាំងខ្ទប់ជំនួយមនុស្សធម៌។ ថ្វីបើមានការប្រកាសនាពេលថ្មីៗនេះ ដោយអាជ្ញាធរអ៊ីស្រាអែល ដើម្បីអនុញ្ញាតឱ្យមានជំនួយទៅកាន់តំបន់ហ្គាហ្សាក៏ដោយ ក៏ភ្នាក់ងារមនុស្សធម៌បានសង្កត់ធ្ងន់ថា ការផ្គត់ផ្គង់មិនគ្រប់គ្រាន់ទេ។

វិបត្តិមនុស្សធម៌កាន់តែធ្ងន់ធ្ងរទៅៗ ស្របពេលការវាយប្រហាររបស់អ៊ីស្រាអែលឥតឈប់ឈរដោយកាលពីថ្ងៃចន្ទ ការវាយប្រហារតាមអាកាសរបស់អ៊ីស្រាអែល ចំ​លើទីជំរកសាលារៀនមួយនៅក្នុងទីក្រុងហ្គាហ្សា សម្លាប់ជនជាតិប៉ាឡេស្ទីនយ៉ាងហោចណាស់ ៣៦នាក់ រួមទាំងកុមារ និងបានបង្កជាភ្លើងឆេះដ៏ធំមួយ។

យោងតាមមន្ត្រីសុខាភិបាលហ្គាហ្សា មនុស្សជាង ៥០នាក់ត្រូវបានសម្លាប់នៅទូទាំងតំបន់ហ្គាហ្សានៅថ្ងៃចន្ទតែមួយ ដោយសារតែប្រតិបត្តិការយោធារបស់អ៊ីស្រាអែល។

ដោយសារសង្រ្គាមនៅតែបន្ត ហើយប្រព័ន្ធស្បៀងអាហារបានដួលរលំ ហ្គាហ្សាកាន់តែខិតទៅជិតភាពអត់ឃ្លានធ្ងន់ធ្ងរ។ ទីភ្នាក់ងារអង្គការសហប្រជាជាតិ និងអង្គការជំនួយកំពុងជំរុញឱ្យសហគមន៍អន្តរជាតិធ្វើសកម្មភាពយ៉ាងឆាប់រហ័ស ដើម្បីជួយសម្រួលដល់ការចូលប្រើប្រាស់មនុស្សធម៌ និងចាប់ផ្តើមកិច្ចខិតខំប្រឹងប្រែងស្តារឡើងវិញរយៈពេលវែង មុនពេលស្ថានភាពកាន់តែយ៉ាប់យ៉ឺនបន្ថែមទៀត៕

អត្ថបទ៖ ប៊ុន សុភាព