ការ​វាយ​ប្រហារ​ដ៏​សាហាវ​នៅ​ស៊ូដង់​សម្លាប់​បុគ្គលិក​UN ​៥​នាក់​ចំពេល​វិបត្តិស្រេក​ឃ្លាន​កាន់​តែ​ធ្ងន់ធ្ងរ

ការវាយឆ្មក់យ៉ាងសាហាវមួយ បាន​ធ្វើ​ឡើង​​​លើ​ក្បួនរថយន្តជំនួយស្បៀងអាហាររបស់អង្គការសហប្រជាជាតិនៅក្នុងប្រទេសស៊ូដង់ ដែល​បណ្តាលឲ្យបុគ្គលិកជំនួយចំនួន ៥​នាក់ស្លាប់ និងជាច្រើននាក់ទៀតរងរបួស ដោយ​ធ្វើឱ្យវិបត្តិមនុស្សធម៌កាន់តែធ្ងន់ធ្ងរនៅក្នុងតំបន់ដែលសម្បូរដោយជម្លោះ​មួយ​នេះ។

បើយោងតាមការចេញផ្សាយរបស់សារព័ត៌មាន​Al Jazeera នៅថ្ងៃទី០៤ខែមិថុនា ក្បួនរថយន្ត ១៥​គ្រឿង ដែលដឹកជញ្ជូនគ្រឿងផ្គត់ផ្គង់សំខាន់ៗពីកំពង់ផែស៊ូដង់ ទៅកាន់រដ្ឋNorth Darfur ត្រូវបានវាយប្រហារនៅជិតទីក្រុង al-Koma ដែលជាទីប្រជុំជនដែលគ្រប់គ្រងដោយកងកម្លាំងគាំទ្ររហ័សប៉ារ៉ាយោធា (RSF)។ ឡានដឹកទំនិញជាច្រើនបានឆេះ ហើយជំនួយសំខាន់ៗត្រូវបានបំផ្លាញ។

ទីភ្នាក់ងារអង្គការសហប្រជាជាតិដែលពាក់ព័ន្ធ រួមទាំងអង្គការយូនីសេហ្វ និងកម្មវិធីស្បៀងអាហារពិភពលោក (WFP) បានថ្កោលទោសការវាយប្រហារនេះថាជាការរំលោភលើច្បាប់មនុស្សធម៌អន្តរជាតិ ហើយបានជំរុញឱ្យមានការស៊ើបអង្កេតជាបន្ទាន់ ខណៈផ្លូវធ្វើដំណើរដែលរងការវាយប្រហារ​នេះ​ត្រូវ​បាន​​បែងចែក​​គ្នា​គ្រប់គ្រង​ដោយ​​​​កង​កម្លាំង​​ដែល​កំពុង​ធ្វើ​សង្គ្រាម​ទាំង​ពីរ​គឺ RSF និង​កងទ័ព​ស៊ូដង់ ហើយឥឡូវ​នេះ​ពួកគេកំពុងចោទ​គ្នា​ទៅ​វិញ​ទៅ​មក​ចំពោះ​ការ​វាយ​ប្រហារ។

ការវាយប្រហារនេះគឺជាហេតុការណ៍ហិង្សាចុងក្រោយបង្អស់ដែលផ្តោតលើកិច្ចខិតខំប្រឹងប្រែងមនុស្សធម៌ ខណៈដែលសង្រ្គាមស៊ីវិលរបស់ប្រទេសស៊ូដង់ឈានចូលដល់ឆ្នាំទី៣។ ជាពិសេសទីក្រុង El-Fasher រដ្ឋធានីរដ្ឋ North Darfur នៅតែស្ថិតក្នុងហានិភ័យ ដោយមនុស្សរាប់សែននាក់ប្រឈមនឹងភាព​ស្រេក​ឃ្លាន ដោយសារតែផ្លូវជំនួយត្រូវបានបិទដែលអាចនាំឲ្យមានគ្រោះទុរភិក្សកាន់តែអាក្រក់៕

អត្ថបទ៖ ប៊ុន សុភាព