ត្រឹម​មួយ​ថ្ងៃ ជនជាតិ​ប៉ាឡេស្ទីន​ស្លាប់​ជាង ៧០​នាក់ ក្នុង​ការ​វាយ​ប្រហារ​របស់​អ៊ីស្រាអែល​នៅ​ហ្គាហ្សា

យោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី១១ខែមិថុនា ការ​វាយ​ប្រហារ​តាម​អាកាស និង​ជើង​គោក​របស់​កងកម្លាំងអ៊ីស្រាអែលបាន​ឆក់​យក​ជីវិត​ជនជាតិប៉ាឡេស្ទីនជាង ៧០នាក់នៅទូទាំងតំបន់ហ្គាហ្សាក្នុងរយៈពេលត្រឹម​តែមួយថ្ងៃ​ប៉ុណ្ណោះ ចំពេលមានវិបត្តិមនុស្សធម៌កាន់តែធ្ងន់ធ្ងរ។

ក្នុងចំណោមជនរងគ្រោះមានក្មេង​អាយុ​១២ឆ្នាំត្រូវបានសម្លាប់ពេលកំពុងស្វែងរកជំនួយនៅជិតច្រករបៀង Netzarim ដែលគ្រប់គ្រងដោយអ៊ីស្រាអែល។ មនុស្សជាង​២០០​នាក់ផ្សេងទៀត បានរងរបួសនៅក្នុងការវាយប្រហារសំដៅទៅលើជនស៊ីវិលដែលប្រមូលផ្តុំជុំវិញកន្លែងផ្តល់ជំនួយដំណើរការដោយមូលនិធិមនុស្សធម៌ហ្គាហ្សា (GHF)។

កន្លែង​ចែកចាយ​ជំនួយ​ទាំងនេះ ដែល​មាន​ការ​គាំទ្រដោយសហរដ្ឋអាមេរិក និងអ៊ីស្រាអែល ត្រូវ​បាន​រង​ការ​ថ្កោលទោស​ថាជា «អន្ទាក់មរណៈ» ដោយអាជ្ញាធរតំបន់ហ្គាហ្សា ដោយបានចោទប្រកាន់អ៊ីស្រាអែលថាបានប្រើប្រាស់ជំនួយជានុយក្នុងការវាយឆ្មក់ដ៏សាហាវ។ ចាប់តាំងពី GHF បានចាប់ផ្តើមប្រតិបត្តិការនៅថ្ងៃទី២៧​ខែឧសភា មនុស្សជាង​១៥០​នាក់ត្រូវបានសម្លាប់ និងជិត១ ៥០០នាក់បានរងរបួស។

អ៊ីស្រាអែលក៏បានវាយប្រហារតំបន់ផ្សេងទៀត រួមទាំង«តំបន់សុវត្ថិភាព» នៅ al-Mawasi និងជុំរុំ​ភៀសខ្លួននៅទីក្រុង Khan Younis ដោយបានសម្លាប់ជនស៊ីវិល​អស់​ជាច្រើននាក់។ ជាមួយគ្នានេះ អង្គការសុខភាពពិភពលោកបានរាយការណ៍ពីការបិទមន្ទីរពេទ្យ al-Amal ដោយសារតែអរិភាព ដោយបន្សល់ទុកតែកន្លែង ICU ប្រតិបត្តិការ​នៅក្នុងតំបន់ប៉ុណ្ណោះ។ លើសពីនេះ ទីភ្នាក់ងារអង្គការសហប្រជាជាតិក៏បានព្រមានអំពីទុរ្ភិក្ស និងរាយការណ៍អំពីកុមាររាប់ពាន់នាក់ដែលខ្វះអាហារូបត្ថម្ភអាយុក្រោម៥ឆ្នាំ។

ចំណែកនៅតំបន់ West Bank ដែលកាន់កាប់ដោយទាហានអ៊ីស្រាអែល បានបង្កើនការវាយឆ្មក់ដោយសម្លាប់បងប្អូនពីរនាក់នៅ Nablus និងរបួសជាង៨៥នាក់។ ក្រុមគ្រូពេទ្យ និងបុគ្គលិកពេទ្យក៏ត្រូវបានគេកំណត់គោលដៅផងដែរ ដោយមានមនុស្សស្លាប់ជាច្រើននាក់ ខណៈកំពុងបំពេញមុខងារមនុស្សធម៌។

នៅពេលនេះ ស្ថានការណ៍នៅហ្គាហ្សាបន្តកាន់តែយ៉ាប់យ៉ឺន ដោយសារការឡោមព័ទ្ធកាន់តែតឹងរ៉ឹង ជំនួយនៅតែរឹតបន្តឹងយ៉ាងធ្ងន់ធ្ងរ ហើយហេដ្ឋារចនាសម្ព័ន្ធវេជ្ជសាស្រ្តក៏ជិតដួលរលំថែមទៀត៕

អត្ថបទ៖ ប៊ុន សុភាព