ត្រាំ៖ «យើងដឹងពីទីតាំងលាក់ខ្លួនរបស់មេដឹកនាំកំពូលអ៊ីរ៉ង់ តែយើងនឹងមិនកម្ចាត់គាត់ ឥឡូវនេះទេ» 

ក្នុងសារបង្ហោះលើបណ្តាញសង្គម Truth Social កាលពីថ្ងៃអង្គារទី១៧ខែមិថុនាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បានបញ្ជាក់យ៉ាងច្បាស់ថា «យើងដឹងពីទីតាំងលាក់ខ្លួនរបស់មេដឹកនាំកំពូលអ៊ីរ៉ង់ Ayatollah Ali Khamenei ហើយបើចង់កំណត់គោលដៅមែន គឺមិនពិបាកទេ។ យ៉ាងណា គាត់កំពុងមានសុវត្ថិភាព ហើយយើងនឹងមិនកម្ចាត់គាត់នាពេលឥឡូវនេះទេ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា «យើងមិនចង់ឲ្យមីស៊ីលបាញ់ត្រូវជនស៊ីវិលឬទាហានអាមេរិកទេ។ ការអត់ធ្មត់របស់យើង កាន់តែខើចទៅៗហើយ»។

មិនត្រឹមប៉ុណ្ណឹង តាមរយៈការបង្ហោះ Truth Social ជាបន្តបន្ទាប់ ប្រធានាធិបតីអាមេរិក ថែមទាំងតម្រូវឲ្យ «អ៊ីរ៉ង់ ត្រូវតែចុះចាញ់ដោយឥតលក្ខខណ្ឌផងដែរ។ ឥឡូវ យើងគ្រប់គ្រងផ្ទៃមេឃលើប្រទេសអ៊ីរ៉ង់បានទាំងស្រុងហើយ»។

មុននេះដែរ នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បាននិយាយជាសាធារណៈថា ការធ្វើឃាតមេដឹកនាំកំពូលរបស់អ៊ីរ៉ង់ Ayatollah Ali Khamenei «អាចបញ្ចប់ជម្លោះ» រវាងប្រជាជាតិទាំងពីរ ជាជាងធ្វើ​ឲ្យវាកាន់តែ​កើន​កម្ដៅ។

ក្នុង​ពេល​ផ្ដល់​បទ​សម្ភាស​ជាមួយ ABC News កាល​ពី​ថ្ងៃ​ទី​១៦​ខែ​មិថុនា លោក ណេតាន់យ៉ាហ៊ូ បាន​លើក​ឡើង​ថា ប្រតិបត្តិការ​​បន្សាប​ការ​គំរាមកំហែង​របស់​អ៊ីស្រាអែល​លើ​អ៊ីរ៉ង់ គឺ​ជា​រឿង​ត្រឹមត្រូវ ហើយ​គាត់​​បាន​ចាត់ទុក​លោក Khamenei ថា​ជា « (Adolf) Hilter សម័យ​ថ្មី»។​

បើ​យោង​តាម​របាយការណ៍​​ថ្មីៗ​ លោក ត្រាំ បានបដិសេធផែនការរបស់អ៊ីស្រាអែល ក្នុងការសម្លាប់មេដឹកនាំកំពូលអ៊ីរ៉ង់ ដោយប្រាប់ថា កុំធ្វើរឿងបែបនេះឲ្យសោះ បើមិនដូច្នោះទេនឹងមានរឿងធំជាក់ជាមិនខានឡើយ។ យ៉ាង​ណា​មិញ លោក បេនចាមីន បាន​ច្រានចោល​គំនិត​នេះ ហើយ​​ប្រាប់​ថា «​វា​មិន​ធ្វើ​ឲ្យ​ជម្លោះ​កើន​ឡើង​ទេ វា​នឹង​បញ្ចប់​ជម្លោះ​»។

មេដឹកនាំ​អ៊ីស្រាអែល បាន​បន្ថែម​ថា «សង្រ្គាមជារៀងរហូត” គឺជាអ្វីដែលអ៊ីរ៉ង់ចង់បាន ហើយពួកគេកំពុងនាំយើងទៅកាន់គែមនៃសង្រ្គាមនុយក្លេអ៊ែរ។ តាមពិតទៅ អ្វីដែលអ៊ីស្រាអែលកំពុងធ្វើ គឺការទប់ស្កាត់ការឈ្លានពាននេះ ហើយយើងអាចធ្វើដូច្នេះបានដោយ​ប្រឆាំង​នឹង​កម្លាំងនៃអំពើអាក្រក់»៕

អត្ថបទ៖ សុខ សុវណ្ណ

ចុចអាន៖ យន្តហោះចម្បាំងអាមេរិក ចាកចេញពីមូលដ្ឋាននៅអង់គ្លេសហើយ ដើម្បីទៅជួយអ៊ីស្រាអែល ប្រយុទ្ធជាមួយអ៊ីរ៉ង់