កូរ៉េ​ខាង​ជើងបើក​សម្ពោធ​​តំបន់​ទេសចរណ៍​ឆ្នេរសមុទ្រ​ដ៏ស្រស់ស្អាត​​​

យោងតាមប្រព័ន្ធផ្សព្វផ្សាយរដ្ឋ KCNA កាលថ្ងៃទី២៤ ខែមិថុនា ប្រទេសកូរ៉េខាងជើងបានសម្ពោធជាផ្លូវការ​នូវ​តំបន់ទេសចរណ៍​ឆ្នេរសមុទ្រ​ដ៏ស្រស់​ស្អាត មានឈ្មោះ​ថា «Wonsan Kalma Coastal Tourist Zone» ដែលជាគម្រោងទេសចរណ៍ទ្រង់ទ្រាយធំនៅឆ្នេរសមុទ្រភាគខាងកើតរបស់ប្រទេសនេះ។

ក្នុងពិធីនេះ មេដឹកនាំលោក គីម ជុងអ៊ុន (Kim Jong Un) បានចូលរួមក្នុងជាមួយកូនស្រីរបស់គាត់ Kim Ju Ae ដោយបង្ហាញ «ការពេញចិត្តយ៉ាងខ្លាំង» និងប្រកាសផែនការសម្រាប់ការអភិវឌ្ឍ​យ៉ាងឆាប់រហ័សបន្ថែមទៀតនៃរមណីយដ្ឋានស្រដៀងគ្នានៅទូទាំងប្រទេស។

តំបន់ទេសចរណ៍ដែលទើបនឹងបញ្ចប់​ការ​រៀបចំ​​ថ្មីនេះ ត្រូវបានរចនាឡើងដើម្បីទទួលភ្ញៀវទេសចរក្នុងស្រុកបានរហូតដល់ ២០០០០នាក់ ហើយនឹងបើកជាសាធារណៈនៅថ្ងៃទី ១ខែកក្កដា។ ទោះជាយ៉ាងណាក៏ដោយ KCNA មិនបាននិយាយអំពី​ការអនុញ្ញាតឱ្យភ្ញៀវទេសចរបរទេសនោះទេ ដោយឆ្លុះបញ្ចាំងពីការរឹតបន្តឹងការធ្វើដំណើរដែលកំពុងបន្តនៅឡើយ។

ពីមុនប្រទេសកូរ៉េខាងជើងបានបិទព្រំដែនរបស់ខ្លួននៅឆ្នាំ​២០២០ ដោយសារ កូវីដ១៩ តែបានបន្ធូរបន្ថយបន្តិចម្តងៗនូវដែនកំណត់មួយចំនួនចាប់តាំងពីឆ្នាំ ២០២៣ ដោយថ្មីៗនេះ បានរៀបចំក្រុមទេសចរណ៍រុស្ស៊ី និងការរត់ម៉ារ៉ាតុងជាមួយនឹងអ្នកចូលរួមអន្តរជាតិនៅក្នុងខែមេសា។

ទីក្រុង Wonsan ដែលជាកន្លែងវិស្សមកាលក្នុងស្រុកតាមបែបប្រពៃណី ស្ថិតនៅក្រោមការអភិវឌ្ឍ​តាំងពីឆ្នាំ ២០១៤ ដោយ​កាល​នោះ លោក គីម ចង់​ឃើញ​ថា វានឹងក្លាយជាមជ្ឈមណ្ឌលទេសចរណ៍ដែលមានតម្លៃរាប់ពាន់លានដុល្លារ។ ទោះបីជាវិស័យទេសចរណ៍ជាប្រភពចំណូលបរទេសស្របច្បាប់របស់កូរ៉េខាងជើងមានកម្រិតដែលមិនត្រូវបានគ្រប​ដណ្តប់​ដោយ​ទណ្ឌកម្មរបស់អង្គការសហប្រជាជាតិក៏ដោយ ក៏គម្រោងនេះខ្វះដៃគូអន្តរជាតិដ៏សំខាន់ ដែលភាគច្រើនដោយសារតែការព្រួយបារម្ភជាសកលលើកម្មវិធីអាវុធរបស់ទីក្រុងព្យុងយ៉ាង។

ការពង្រឹងទំនាក់ទំនងរវាងកូរ៉េខាងជើង និងរុស្ស៊ីក៏ត្រូវបានបង្ហាញនៅក្នុងពេលសម្ពោធនេះផងដែរ ដោយមានឯកអគ្គរដ្ឋទូតរុស្ស៊ីលោក Alexander Matsegora និងបុគ្គលិកស្ថានទូតចូលរួមជាភ្ញៀវពិសេស។ ទាំងនេះកើតឡើងចំពេលដែលកិច្ចសហប្រតិបត្តិការកាន់តែស៊ីជម្រៅរវាងប្រជាជាតិទាំងពីរ រួមទាំងផែនការថ្មីសម្រាប់រថភ្លើងដឹកអ្នកដំណើរដោយផ្ទាល់រវាងទីក្រុងព្យុងយ៉ាង និងទីក្រុងមូស្គូ និងការគាំទ្ររបស់កូរ៉េខាងជើងសម្រាប់ប្រទេសរុស្ស៊ីក្នុងសង្គ្រាមនៅអ៊ុយក្រែន។

នៅក្នុងពិធីសម្ពោធនេះលោក គីម បានសង្កត់ធ្ងន់ថា រមណីយដ្ឋាន Wonsan នឹងរួមចំណែកដល់ការទទួលស្គាល់ជាសកលរបស់កូរ៉េខាងជើងថាជាគោលដៅទេសចរណ៍លំដាប់ពិភពលោក ដោយសន្យាថានឹងបង្កើត «រលកនៃសុភមង្គល» សម្រាប់ភ្ញៀវទេសចរនាពេលអនាគតរបស់ខ្លួន៕

អត្ថបទ៖ ប៊ុន សុភាព