មេភូមិភាគ២ថៃ ថា នឹងបិទព្រំដែនដល់ពេលខ្លួនចូលនិវត្តន៍

មេភូមិភាគ២ថៃ Boonsin Phadklang បានបញ្ជាក់ថា លោកគ្មានគម្រោងបើកច្រកព្រំដែនជាមួយកម្ពុជាវិញទេ ពោលគឺនឹងបិទរហូតដល់ពេលលោកចូលនិវត្តន៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងចេញពីសាកលវិទ្យាល័យ Kasetsart ក្នុងទីក្រុងបាងកក នៅថ្ងៃព្រហស្បតិ៍ទី១៤ខែសីហាឆ្នាំ២០២​៥ បុរសវ័យ៦០ឆ្នាំរូបនេះបាននិយាយពាក់ព័ន្ធកិច្ចប្រជុំគណៈកម្មាធិការព្រំដែនតំបន់ (RBC) នាពេលខាងមុខ ដោយអះអាងទាំងមិនខ្មាសមាត់ថា នៅតាមតំបន់ព្រំដែនទាំង១១ដែលខ្លួនគ្រប់គ្រង ពួកគេមិនព្រមដកទ័ពឡើយ ហើយរក្សាការឈរជើងនៅទីនោះ។ នោះជាមូលហេតុដែលថៃ រាយបន្លាលួស។

សូមជម្រាបថា លោក Boonsin នឹងចូលនិវត្តន៍នៅថ្ងៃទី៣០ខែកញ្ញាឆ្នាំនេះ ប៉ុន្តែមានពលរដ្ឋថៃមួយចំនួនបានអំពាវនាវឲ្យរដ្ឋាភិបាលទីក្រុងបាងកក បន្តអាណត្តិជនល្មោភសង្គ្រាមម្នាក់នេះ ធ្វើឲ្យគេកាន់តែបានចិត្តនិងដំឡើងឫក។

យ៉ាងណាក្តី ក៏មានមន្ត្រីខ្លះជំទាស់ដែរ ដោយលើកឡើងថា ការបន្តអាណត្តិរបស់ Boonsin នឹងធ្វើឲ្យខូចដល់ប្រព័ន្ធដំឡើងឋានៈទាហានដែលផ្អែកលើគុណសម្បត្តិ ខណៈប្រព័ន្ធនេះត្រូវបានបង្កើតឡើងជាយូរមកហើយ។

ទោះបែបនេះ ថៃបានបង្ហាញបេក្ខភាព៣រូបរួចហើយ ដើម្បីចូលកាន់តំណែងមេភូមិភាគ២ ក្រោយពេល Boonsin ចូលនិវត្តន៍។ អ្នកទាំង៣ មានដូចជា Weerayut Raksin, Norathip Phoinok និង Nat Sri-in៕

អត្ថបទ៖ សុខ សុវណ្ណ

ចុចអាន៖ បេក្ខជន៣នាក់ ដែលអាចចូលកាន់តំណែងមេភូមិភាគ២ ក្នុងនោះមានម្នាក់ និយាយនិងស្តាប់ភាសាខ្មែរបានយ៉ាងស្ទាត់