បេក្ខជន៣នាក់ ដែលអាចចូលកាន់តំណែងមេភូមិភាគ២ ក្នុងនោះមានម្នាក់ និយាយនិងស្តាប់ភាសាខ្មែរបានយ៉ាងស្ទាត់

នៅចុងខែកញ្ញាខាងមុខ អាណត្តិមេបញ្ជាការភូមិភាគ២របស់លោក Boonsin Padklang នឹងត្រូវចប់ហើយ ប៉ុន្តែមានពលរដ្ឋថៃមួយចំនួនបានអំពាវនាវឲ្យរដ្ឋាភិបាលទីក្រុងបាងកក បន្តអាណត្តិជនល្មោភសង្គ្រាមម្នាក់នេះ ធ្វើឲ្យគេកាន់តែបានចិត្តនិងដំឡើងឫក។

យ៉ាងណាក្តី ក៏មានមន្ត្រីខ្លះជំទាស់ដែរ ដោយលើកឡើងថា ការបន្តអាណត្តិរបស់ Boonsin នឹងធ្វើឲ្យខូចដល់ប្រព័ន្ធដំឡើងឋានៈទាហានដែលផ្អែកលើគុណសម្បត្តិ ខណៈប្រព័ន្ធនេះត្រូវបានបង្កើតឡើងជាយូរមកហើយ។

ទោះបែបនេះ ថៃបានបង្ហាញបេក្ខភាព៣រូបរួចហើយ ដើម្បីចូលកាន់តំណែងមេភូមិភាគ២ ក្រោយពេល Boonsin ចូលនិវត្ត។ អ្នកទាំង៣ មានដូចជា Weerayut Raksin, Norathip Phoinok និង Nat Sri-in។

តើពួកគេទាំង៣ មានសាវតារបែបណា?

1. ឧត្តមសេនីយ៍ទោ Weerayut Raksin

Weerayuth គឺជាមេបញ្ជាការរងភូមិភាគ២។ គាត់បានបញ្ចប់ការសិក្សាពី សាលានាយទាហានត្រៀមបម្រុងកងកម្លាំងប្រដាប់អាវុធជំនាន់ទី ២៦។ គាត់គឺជាមិត្តរួមថ្នាក់មេដឹកនាំយោធាថៃសំខាន់ៗមួយចំនួន រួមទាំងប្រមុខកងទ័ពជើងគោកបច្ចុប្បន្ន លោកឧត្តមសេនីយ៍ Phana Klaewplodthuk និងមេបញ្ជាការភូមិភាគ២ លោក Boonsin Padklang។

ម្នាក់នេះកាន់កាប់តំបន់ភាគឦសានប្រទេសថៃ ដូច្នេះគេស្គាល់អំពីភូមិសាស្ត្រ និងបញ្ហានៅតាមតំបន់ព្រំដែនថៃ-កម្ពុជា។ គាត់ធ្លាប់កាន់តំណែងជាមេបញ្ជាការកងពលថ្មើរជើងលេខ៦ ដែលមានទីតាំងប្រតិបត្តិការនៅតំបន់ភាគឦសាន។ គាត់ក៏ធ្លាប់ជាមេបញ្ជាការកងកម្លាំង Suranaree ដែលទទួលបន្ទុកផ្ទាល់លើកិច្ចការពារព្រំដែនកម្ពុជា-ថៃផងដែរ។

ក្នុងឆ្នាំ២០២៣ គាត់ត្រូវបានដំឡើងឋានៈជាមេបញ្ជាការរងភូមិភាគ២ ហើយបច្ចុប្បន្នជាមេបញ្ជាការរងដែលមានឋានៈខ្ពស់ជាងគេបំផុតក្នុងចំណោមមេបញ្ជាការរងដទៃទៀត។

2. ឧត្តមសេនីយ៍ទោ Norathip Phoinok

គាត់ក៏បញ្ចប់ការសិក្សាពី សាលានាយទាហានត្រៀមបម្រុងកងកម្លាំងប្រដាប់អាវុធ ជំនាន់ទី ២៦ ដែរ។ មុនពេលទទួលបានតួនាទីជាមេបញ្ជាការរងភូមិភាគ២ គាត់ធ្លាប់កាន់តំណែងជា មេបញ្ជាការកងពលថ្មើរជើងលេខ៣ និងជាប្រធានសេនាធិការភូមិភាគ២។ គាត់ត្រូវបានដំឡើងឋានៈជាមេបញ្ជាការរងភូមិភាគ២ នៅឆ្នាំ ២០២៤។

3. ឧត្តមសេនីយ៍ទោ Nat Sri-in

គាត់បានបញ្ចប់ការសិក្សាពី សាលានាយទាហានត្រៀមបម្រុងកងកម្លាំងប្រដាប់អាវុធ ដូចគ្នា ប៉ុន្តែជំនាន់ទី ២៧ ហើយបានបញ្ចប់ការសិក្សានៅ សាលានាយទាហានជើងគោក Chulachomklao Royal Military Academy ជំនាន់ទី៣៨។

គាត់មានប្រវត្តិការងារយោធានៅក្នុងតំបន់ភាគឦសានប្រទេសថៃ ដោយធ្លាប់កាន់តំណែងជា មេបញ្ជាការកងពលថ្មើរជើងលេខ៦ និងជា មេបញ្ជាការកងកម្លាំង Suranaree។

បុរសម្នាក់នេះអាចនិយាយនិងស្តាប់ភាសាខ្មែរបានយ៉ាងស្ទាត់ជំនាញ ព្រោះគាត់មានដើមកំណើតនៅសុរិន្ទ។

ក្នុងនាមជាមេបញ្ជាការរងភូមិភាគ២ គាត់មានតួនាទីសំខាន់ក្នុងការសម្របសម្រួលនិងចរចាជាមួយកងទ័ពកម្ពុជាដើម្បីដោះស្រាយភាពតានតឹងនៅតាមតំបន់ព្រំដែន៕

អត្ថបទ៖ សុខ សុវណ្ណ

ចុចអាន៖ នាយករដ្ឋមន្ត្រី​ស្ដីទីថៃ ប្រាប់កងទ័ពភូមិភាគ២ថា បើខ្វះ​បន្លាលួស ស្នើសុំ​រដ្ឋាភិបាល កុំសុំ​លុយពលរដ្ឋ