ឥណ្ឌា​ ចូលរួម​សមយុទ្ធយោធារុស្ស៊ី-បេឡារុស្សដ៏ធំបំផុតប្រចាំឆ្នាំ

ឥណ្ឌាបានបញ្ជូនទាហាន ៦៥​ នាក់ទៅចូលរួមសមយុទ្ធ Zapad-2025 ដែលជាសមយុទ្ធយោធាទ្រង់ទ្រាយធំរៀបចំដោយរុស្ស៊ី និងបេឡារុស្ស។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៧ខែកញ្ញា។

ក្នុងអំឡុងពេលសមយុទ្ធ រុស្ស៊ី និងបេឡារុស្សបានសាកល្បងអាវុធនុយក្លេអ៊ែរយុទ្ធសាស្ត្រ ដូចជាអាវុធនុយក្លេអ៊ែរតូចៗ ដែលរចនាឡើងសម្រាប់ប្រើប្រាស់ក្នុងការប្រយុទ្ធជាមួយកងកម្លាំងសត្រូវ។ ពួកគេក៏បានដាក់តាំងបង្ហាញមីស៊ីលលឿនជាងសំឡេង Oreshnik ដែលជាអាវុធដ៏មានអានុភាពធ្វើដំណើរបានយ៉ាងលឿនបំផុត និងធ្លាប់ត្រូវបានប្រើប្រាស់ពីមុននៅក្នុងសង្គ្រាមនៅអ៊ុយក្រែន។

សមយុទ្ធនេះមានរយៈពេលប្រាំថ្ងៃ និងមានការចូលរួមពីកងទ័ពសរុបប្រហែល ១០ ម៉ឺន នាក់ ដែលធ្វើឱ្យវាក្លាយជាសមយុទ្ធយោធាដ៏ធំបំផុតប្រចាំឆ្នាំ។ ក្រៅ​ពី​ឥណ្ឌា ទាហាន​មក​ពី​ប្រទេស​មួយ​ចំនួន​ទៀត​ក៏​បាន​ចូល​រួម​ដែរ រួម​មាន​អ៊ីរ៉ង់ បង់ក្លាដែស ប៊ូគីណាហ្វាសូ សាធារណរដ្ឋ​ប្រជាធិបតេយ្យ​កុងហ្គោ និង​ម៉ាលី។

ព្រឹត្តិការណ៍នេះគឺជាការបង្ហាញពីអំណាចយោធាដោយរុស្ស៊ី និងបេឡារុស្ស និងជាឱកាសសម្រាប់ប្រជាជាតិទាំងនេះ រួមជាមួយនឹងដៃគូរបស់ពួកគេ ដើម្បីពង្រឹងកិច្ចសហប្រតិបត្តិការយោធានៅពេលមានភាពតានតឹងពិភពលោកខ្ពស់។

ការចូលរួមរបស់ឥណ្ឌាបានគូសបញ្ជាក់ពីទង្វើដែលមានតុល្យភាពរវាងទំនាក់ទំនងការពារជាតិដែលមានរយៈពេលយូរជាមួយទីក្រុងមូស្គូ និងទំនាក់ទំនងដ៏តានតឹងជាមួយទីក្រុងវ៉ាស៊ីនតោន ដែលកាន់តែអាក្រក់ឡើងដោយពន្ធគយរបស់សហរដ្ឋអាមេរិក និងការរិះគន់លើការនាំចូលប្រេងពីរុស្ស៊ីរបស់ឥណ្ឌាក្នុងអំឡុងសង្គ្រាមអ៊ុយក្រែន៕

អត្ថបទ៖ ប៊ុន សុភាព