ស្លាប់ ១៤នាក់ និង ១២៤​នាក់បាត់ខ្លួន បន្ទាប់ពី​ព្យុះទីហ្វុងនៅ​តៃវ៉ាន់

យ៉ាង​ហោចណាស់ មនុស្សចំនួន ១៤​នាក់បានស្លាប់ និង ១២៤​នាក់កំពុងបាត់ខ្លួននៅភាគខាងកើតកោះតៃវ៉ាន់ ដោយសារ​តែ​ឥទ្ធិពល​ខ្យល់​ព្យុះទីហ្វុង Ragasa។ នេះ​បើយោង​តាម​ការ​​ឲ្យ​ដឹង​ពី​នាយកដ្ឋាន​អគ្គិភ័យ​តៃវ៉ាន់ នា​ថ្ងៃ​ពុធ​ទី​២៤​ខែ​កញ្ញា​ឆ្នាំ​២០២៥។

គ្រោះមហន្តរាយបានវាយប្រហារទីក្រុង Guangfu ក្នុងតំបន់ Hualien នៅពេលដែលបឹងមួយ​កន្លែង​ដែលត្រូវបានបង្កើតឡើងដោយបំណាក់​ដីព្រោះ​​ភ្លៀងធ្លាក់ខ្លាំងមុននេះ បានហូរហៀរកាលពីរសៀលថ្ងៃអង្គារ។ ទឹក​ចាល់​​ និង​ហូរ​កាត់​ទីប្រជុំជន ដោយ​នាំ​មក​នូវ​ភក់ ថ្ម និង​​បណ្ដាល​ឲ្យ​អគារ​​នានា​បាក់​រលំ​។

លោក Wang Tse-an ប្រធានភូមិ Dama ដែលមានប្រជាជនប្រហែល ១ ០០០​នាក់ បាននិយាយថា ស្ថានភាពនេះគឺ​គ្រោះថ្នាក់​ខ្លាំង។ លោក​បានរៀបរាប់​ថា «វាមានភាពច្របូកច្របល់នៅពេលនេះ។ ទឹកជំនន់ខ្លះបានស្រកចុះ ប៉ុន្តែខ្លះនៅសេសសល់។ កិច្ចការសំខាន់បំផុតគឺធ្វើ​ឲ្យ​មនុស្សមានសុវត្ថិភាព»។

មនុស្សប្រហែល ៥ ២០០​នាក់ ជិត ៦០% នៃចំនួនប្រជាជនរបស់ទីក្រុង Guangfu កំពុងជ្រកនៅជាន់ខ្ពស់នៃផ្ទះរបស់ពួកគេ ខណៈដែលអ្នកផ្សេងទៀតភាគច្រើនបានជម្លៀសទៅកាន់ផ្ទះសាច់ញាតិ។

រដ្ឋាភិបាលបានប៉ាន់ប្រមាណថា បឹងដែល​បង្ក​ការ​ជន់​លិច​យ៉ាង​ខ្លាំង​នេះ មានផ្ទុកទឹកចំនួន ៩១​លានតោន ហើយ​ទឹក​ដែលហៀរ​ចេញ​ពី​បឹង​​​ព្រោះ​ព្យុះ​លើក​នេះ​មាន​ប្រមាណ ៦០​លាន​តោន។

ព្យុះទីហ្វុង Ragasa បានវាយលុកកោះតៃវ៉ាន់ចាប់តាំងពីថ្ងៃចន្ទ ជាមួយនឹងខ្យល់បក់ខ្លាំង និងភ្លៀងធ្លាក់ខ្លាំង ដោយ​មាន​​បរិមាណទឹកភ្លៀងប្រហែល ៧០​សង់ទីម៉ែត្រ នៅភាគខាងកើតរបស់កោះ មុនពេលធ្វើដំណើរឆ្ពោះទៅឆ្នេរសមុទ្រភាគខាងត្បូងរបស់ប្រទេសចិន និងហុងកុង។

តៃវ៉ាន់​បាន​ប្រឈម​នឹង​ព្យុះ​ដ៏​សាហាវ​នាពេល​កន្លង​មក។ ក្នុងឆ្នាំ២០០៩ ព្យុះទីហ្វុង Morakot បានសម្លាប់មនុស្សប្រហែល ៧០០​នាក់ និងបង្កការខូចខាតដល់ទៅ ៣ពាន់លានដុល្លារ ដែលជាគ្រោះមហន្តរាយធម្មជាតិដ៏អាក្រក់បំផុតមិនធ្លាប់មានរបស់កោះតៃវ៉ាន់៕

ដោយ៖ ឈាង