រុស្ស៊ី ថា ការកាន់កាប់អាវុធនុយក្លេអ៊ែររបស់កូរ៉េខាងជើង គឺមិនបានលាក់បាំងទេ

បេសកជនកំពូលរបស់រុស្ស៊ីប្រចាំអង្គការសហប្រជាជាតិ លោក Vassily Nebenzia បាននិយាយកាលពីថ្ងៃពុធ​ ទី​ ០១ ខែតុលា ថា ការកាន់កាប់អាវុធនុយក្លេអ៊ែររបស់កូរ៉េខាងជើងគឺជា «ការសម្ងាត់និងបើកចំហ ព្រមទាំងបង្ហាញការពិត» ទោះបីជាទីក្រុងសេអ៊ូល វ៉ាស៊ីនតោន និងតូក្យូ បានគូសបញ្ជាក់ការប្តេជ្ញាចិត្តរបស់ពួកគេ ចំពោះការរំសាយអាវុធនុយក្លេអ៊ែររបស់កូរ៉េខាងជើងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកអគ្គរដ្ឋទូតរូបនេះ បានធ្វើការកត់សម្គាល់ក្នុងសន្និសីទសារព័ត៌មានមួយ ខណៈដែលរុស្ស៊ីបានធ្វើជាប្រធានប្តូរវេននៃក្រុមប្រឹក្សាសន្តិសុខអង្គការសហប្រជាជាតិក្នុងខែនេះ។

លោកបាននិយាយថា ពួកយើងមិនចាំបាច់ទទួលស្គាល់វាទេ ព្រោះវាជាការសម្ងាត់និងបើកចំហ គាត់បាននិយាយដោយឆ្លើយតបទៅនឹងសំណួរអំពីថា តើទីក្រុងម៉ូស្គូទទួលស្គាល់ប្រទេសកូរ៉េខាងជើងដែលមានអាវុធនុយក្លេអ៊ែរដែរឬទេ។ លោកបានតបវិញថា «ខ្ញុំ​មាន​ន័យ​ថា ​ពួក​គេ​មិន​បាន​លាក់​បាំងនឹងពួកយើងនោះ​ទេ»។

ការប្រកាសបែបនេះ ស្របពេលដែលឯកអគ្គរដ្ឋទូតរុស្ស៊ីបានដកស្រង់សុន្ទរកថារបស់អង្គការសហប្រជាជាតិនាពេលថ្មីៗនេះ ដោយអនុរដ្ឋមន្ត្រីការបរទេសកូរ៉េខាងជើង លោក Kim Son-gyong ដែលបានបញ្ជាក់សារជាថ្មីថា ទីក្រុងព្យុងយ៉ាងនឹងមិនបោះបង់កម្មវិធីនុយក្លេអ៊ែររបស់ខ្លួន ទោះស្ថិតនៅក្នុងកាលៈទេសៈណាក៏ដោយ។

មិនតែប៉ុណ្ណោះ អ្នកការទូតកូរ៉េខាងជើងបានសង្កត់ធ្ងន់ថា ទីក្រុងព្យុងយ៉ាងបានកំណត់ឃ្លាំងអាវុធនុយក្លេអ៊ែររបស់ខ្លួននៅក្នុងច្បាប់របស់ខ្លួនថា ជាទ្រព្យសម្បត្តិពិសិដ្ឋនិងដាច់ខាតដែលមិនអាចរំខាន។ លោកក៏បានអះអាងដែរថា ការដាក់ទណ្ឌកម្មលើកូរ៉េខាងជើង គឺស្មើនឹងការទាមទារឲ្យក្រុងព្យុងយ៉ាងចុះចាញ់អធិបតេយ្យភាព និងសិទ្ធិរស់រានមានជីវិត និងបំពានរដ្ឋធម្មនុញ្ញរបស់ខ្លួន។

ដោយយល់ឃើញយ៉ាងនេះ លោក Vassily Nebenzia បាននិយាយថា អ្វីដែលអនុរដ្ឋមន្ត្រីការបរទេសកូរ៉េខាងជើងបាននិយាយ គឺថា នោះគឺជាការពិតដែលយើងរស់នៅ ហើយវាមាននៅក្នុងរដ្ឋធម្មនុញ្ញកូរ៉េខាងជើងរួចហើយ។ ថ្វីដ្បិតតែមនុស្សជាច្រើនចូលចិត្ត ឬមិនចូលចិត្ត ប៉ុន្តែគ្រប់យ៉ាងសុទ្ធតែជាការពិត។ ការពិតត្រូវបានរាប់ជាសុចរិតដោយការគំរាមកំហែងដែលកូរ៉េខាងជើងជួបប្រទះនាពេលបច្ចប្បន្ននេះ ។

ជាក់ស្ដែង ចំពោះការគំរាមកំហែងដែលប្រឈមមុខនឹងកូរ៉េខាងជើង លោក Nebenzia បានចង្អុលទៅអ្វីដែលគាត់ហៅថា បង្កហេតុសកម្មភាពយោធាដោយ troika ដែលមានដូចជា កូរ៉េខាងត្បូង សហរដ្ឋអាមេរិក និងជប៉ុនជាដើម៕

អត្ថបទ៖ សាង ស្រីល័ក្ខ

ចុចអាន៖រុស្ស៊ី​ជំទាស់​ការដាក់​ទណ្ឌកម្ម​ឡើងវិញ​របស់​អង្គការសហប្រជាជាតិ​លើ​អ៊ីរ៉ង់