មូលហេតុដែលបណ្តាលឱ្យកើតជំងឺ​ Stroke ឬគ្រោះថ្នាក់សរសៃឈាមខួរក្បាល

ជំងឺ Stroke ឬគ្រោះថ្នាក់សរសៃឈាមខួរក្បាល អាចបណ្ដាលឱ្យយើងស្លាប់ ឬធ្លាក់ខ្លួនពិការបាន។ រោគសញ្ញាដែលបង្ហាញថាកើតជំងឺ​ Stroke គឺធ្វើឱ្យរាងកាយគ្មានលំនឹង ឈឺក្បាលខ្លាំង ពិបាកនិយាយភ្លាមៗ ឬនិយាយមិនបាន ឬនិយាយស្តីមិនសូវច្បាស់ ជាដើម។

លោកសាស្ត្រាចារ្យវេជ្ជបណ្ឌិត ជុំ ណាវុធ ឯកទេសប្រព័ន្ធប្រសាទខួរក្បាល នៅក្នុងកិច្ចសម្ភាសជាមួយ «កម្ពុជាថ្មី» បានបញ្ជាក់ថា មូលហេតុដែលបណ្តាលឱ្យកើតជំងឺ Stroke ត្រូវបានចែកចេញជា២ ធំៗ គឺបណ្តាលមកពីបញ្ហាស្ទះសរសៃឈាមខួរក្បាល និងដាច់សរសៃឈាមខួរក្បាល។

លោកវេជ្ជបណ្ឌិតថា បញ្ហាស្ទះសរសៃឈាមខួរក្បាល មានមូលហេតុធំចំនួន៣ ទី១.ទាក់ទងទៅនឹងអាយុ មានន័យថា​ ភាគច្រើនកើតទៅលើមនុស្សដែលមានអាយុច្រើន ឬមនុស្សចាស់ ព្រោះមនុស្សដែលមានអាយុកាន់តែច្រើនធ្វើឱ្យសរសៃឈាមរួមតូច ដែលងាយនឹងស្ទះដោយមូលហេតុផ្សេងៗ។ ទី២.អ្នកធ្លាប់មានប្រវត្តិជំងឺបេះដូង កាលណាមានជំងឺបេះដូង ធ្វើឱ្យមានដុំកំណកឈាមនៅក្នុងបេះដូង ហើយវាអណ្តែតទៅតាមសរសៃឈាមទៅកាន់ខួរក្បាលកន្លែងណាដែលមានកន្លែតតូចចង្អៀតជាងគេ ធ្វើឱ្យស្ទះសរសៃឈាមខួរក្បាល។ ទី៣.កីឡាករ ឬក៏មនុស្សវ័យក្មេងដែលកំពុងធ្វើការ ជាពិសេសអ្នកប្រដាល់អាចនឹងមានគ្រោះ ស្ទះសរសៃឈាមខួរក្បាល ដោយសារតែការប៉ះទង្គិចទៅលើសរសៃក និងបែកសរសៃឈាម។

ដោយឡែក នៅក្នុងផ្នែកដាច់សរសៃឈាមខួរក្បាល គឺបង្កឡើងដោយសារសម្ពាធឈាមភាគច្រើនជាងគេ។ ជាក់ស្តែងការសិក្សាក្នុងស្រុក បានបង្ហាញថា ក្នុងចំណោមអ្នកដាច់សរសៃឈាមខួរក្បាលភាគច្រើនគឺ ៦០ ៧០% មូលហេតុ គឺបណ្តាលមកពីសម្ពាធឈាម ដោយសារគ្រប់គ្រងសម្ពាធឈាមមិនបានបានគ្រប់គ្រាន់ សម្ពាធឈាមឡើងខ្ពស់ ឬក៏ការព្យាបាលជំងឺលើសឈាមមិនបានត្រឹមត្រូវ និងទៀងទាត់ ធ្វើឱ្យសម្ពាធឈាមមានការកើនឡើង។ មានន័យថា អ្នកជំងឺលើសឈាមមានការប្រឈមខ្ពស់ជាងគេ។

គួរជម្រាបដែរថា នៅកម្ពុជា ជំងឺ Stroke ឬគ្រោះថ្នាក់សរសៃឈាមខួរក្បាល គឺជាមូលហេតុទី២ នៃការស្លាប់ ដែលមានអត្រាមរណភាព ១៥៣.៩នាក់ ក្នុងចំណោមប្រជាជន ១០ម៉ឺននាក់ ដែលលើសពីការស្លាប់ដោយគ្រោះថ្នាក់ចរាចរណ៍ ខណៈនៅលើពិភពលោកជំងឺ Stroke គឺជាបុព្វហេតុឈានមុខគេ នៃការស្លាប់ និងពិការភាព៕