ប្រញាប់ដកខ្លួនថយ ប្រសិន​គូស្នេហ៍​ប្រព្រឹត្តទង្វើ​បែប​នេះដាក់យើង

ស្នេហាពិត ពិតជាមាននៅលើលោកនេះ ប៉ុន្តែមិនមែនគ្រប់គ្នាសុទ្ធតែមានសំណាងក្នុងការទទួលបានស្នេហាពិតនោះទេ។ អ្នកខ្លះជួបស្នេហ៍សមប្រកប ជីវិតក៏ភព្វប្រសព្វតែនឹងសុមង្គល។ ឯអ្នកខ្លះជួបស្នេហាចាប់ឆាយ ជីវិតគូក៏ប្រែជាល្អក់កករ មិនស្គាល់អ្វីជាក្ដីសុខនឹងគេឡើយ។

តាមពិតទៅ ប្រសិនជួបប្រភេទស្នេហាដែលមិនសមប្រកប យើងមិនចាំបាច់ទ្រាំ នាំគ្រាំគ្រាធ្វើអី គួរណាស់តែដកខ្លួនថយ ហើយរើសអ្នកថ្មីទៀត​ ព្រោះយើងមិនមែនអស់ជម្រើសឯណា។ ​ជីវិតត្រូវការសុមង្គល បើគេមិនអាចផ្ដល់សុភមង្គលឱ្យយើង យើងគួរដើរចេញ។ ជាពិសេស ប្រសិនដៃគូប្រព្រឹត្តទង្វើ​ ៤យ៉ាងដូចខាងក្រោមដាក់យើង យើងគួរដកខ្លួនឱ្យឆាប់។

១. មិនផ្ដល់ការលើកទឹកចិត្ត

ក្នុងសម្ព័ន្ធភាពស្នេហា ទោះបីគ្រប់គ្នាមិនមានអ្នកល្អឥតខ្ចោះ យ៉ាងហោចណាស់ ម្នាក់ដែលយើងជ្រើសរើស គួរតែជាមនុស្សម្នាក់ដែលល្អដាក់យើងជាងគេ ហើយតែងតែចាំលើកទឹកចិត្ត គ្រប់រឿងរ៉ាវ ដែលយើងប្រឈមប្រចាំថ្ងៃ។ ផ្ទុយទៅវិញ មួយថ្ងៃៗគិតតែពីត្អូញត្អែររឿងអវិជ្ជមានរបស់យើង​ ហើយរិះគន់យើងមិនសូវសំចៃមាត់ តើនរណានឹងមានកម្លាំងចិត្តទៅ។ បើបែបនេះ គួរតែលើកដៃលាគ្នា ទាន់យើងនៅអាចទ្រាំបាន។

២. ប្រមាថមាក់ងាយ

ខ្វះការលើកទឹក និងទម្លាប់រិះគន់យូរៗទៅ នឹងក្លាយទៅជាការប្រមាថមាក់ងាយ។ ជួនកាលគេមិនទុកមុខឱ្យយើង ដោយហ៊ាន​បង្អាប់​យើង​នៅ​ចំពោះ​មុខ​អ្នក​ដទៃថែមទៀតផង។ សួរថា នរណាចិត្តព្រះ អាចទ្រាំទង្វើបែបនេះបាន? ក្រៅពីអាម៉ាស់ យើងក៏ក្លាយជា មនុស្សអន់ខ្សោយ គ្មានតម្លៃ គ្មានភាពថ្លៃថ្នូរ ឬអសមត្ថភាពចំពោះអ្នកដទៃ ​ដោយសារតែគេ។

​ចូរចាំថា ស្នេហាជាការជ្រោមជ្រែង បើបណ្តុះបង្អាប់ បន្ទាបបន្ថោក វាលែងជាស្នេហាហើយ។

៣. យើងចាំតែផ្ដល់ឱ្យ គេចាំតែទទួល

និយាយដល់ចំណងស្នេហា មិនមាននរណាជាមាន​ឬជាអ្នកក្រទេ។ គ្រប់គ្នា​ជួយជ្រោមជ្រែងគ្នា និងបំពេញឱ្យគ្នាទៅវិញទៅមក។ ​ប្រសិនស្នេហាយើង មានតែការផ្ដល់ឱ្យតែម្ខាង វាអយុត្តិធម៌ណាស់​សម្រាប់យើង។ គ្រប់យ៉ាងយើងលះបង់ដើម្បីគេ មិនថាពេលវេលា ក្ដីស្រឡាញ់ និងតម្រូវផ្សេងទៀតដែលគេត្រូវការ ប៉ុន្តែចំណែកយើង អ្វីក៏ទទេ។ ​

ប្រសិនកំពុងស្ថិតក្នុងទំនាក់ទំនងបែបនេះ គួរដកខ្លួនថយ មកពិចារណាសារជាថ្មី  ព្រោះយើងមានតម្លៃតែពេលគេត្រូវការមួយពេលៗប៉ុណ្ណោះ តើបន្តនៅធ្វើអីទៀត?

៤. ព្រងើយកន្តើយ

ភាពព្រងើយកន្តើយនឹងគូស្នេហ៍ ជាឬសគល់នៃបញ្ហា បង្កឱ្យស្នេហាជួបឧបសគ្គ ហើយមិនអាចដើរទៅមុខបាន។  សាកគិតមើល៍ មានគេជាដៃគូពិតមែន តែគ្រប់យ៉ាងយើងរ៉ាប់រងខ្លួនឯងទាំងអស់ តើមានគេបានប្រយោជន៍អី? ទោះបីគ្មានលុយកាក់ មាសប្រាក់ សម្ភារថ្លៃៗ​ វាមិនថ្វីទេ​ ប៉ុន្តែបើគ្មានចិត្តឈឺឆ្អាលគ្នា ទោះមានរបស់ទាំងនោះ ​ក៏អត់ន័យដែរ។ នៅក្នុងសម្ព័ន្ធភាពស្នេហា ការខ្វល់ខ្វាយ យកចិត្តទុកដាក់ចំពោះគ្នា ជារឿងសំខាន់ណាស់ រាប់តាំងពីនៅជាសង្សារ រហូតបានគ្នាជាប្ដីប្រពន្ធ។ ផ្ទុយទៅវិញ បើដៃគូយើង មិនដែលខ្វល់ពីយើងអីសូម្បីបន្តិច តើនេះហៅថា ស្រឡាញ់គ្នាទៀតទេ? ប្រាកដជាអត់ហើយ! អ៊ីចឹង គួរឈប់ទ្រាំទៀតទៅ៕

ប្រែសម្រួល៖ សន្យា

ចុចអាន៖ ឥរិយាបថ ៥ របស់បុរស បញ្ជាក់ថា គេស្រលាញ់នាងពិត មិនមែនលេងសើច

ចុចអាន៖ ការបៀតបៀនផ្លូវភេទ​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​​ បន្សល់ទុកផលប៉ះពាល់ ធ្ងន់ធ្ងរដល់ជនរងគ្រោះ