KPT+

ការបៀតបៀនផ្លូវភេទ បន្សល់ទុកផលប៉ះពាល់ ធ្ងន់ធ្ងរដល់ជនរងគ្រោះ

បានផុស

៤ years មុន

នៅ

ថ្ងៃសៅរ៍ ២៦ កុម្ភៈ ២០២២

ដោយ

ការបៀតបៀនផ្លូវភេទជាឥរិយាបថមិនសមរម្យ និងមិនគួរគប្បីក្នុងការប្រព្រឹត្តទៅលើអ្នកណាម្នាក់ឡើយ ទោះជានៅក្នុងស្ថានភាពណាក៏ដោយ។ ការបៀតបៀនផ្លូវភេទកើតឡើងនៅពេលដែលមានការបៀតបៀនក្នុងទម្រង់ផ្លូវភេទ ឬទាក់ទងនឹងភេទ ឬរឿងភេទរបស់បុគ្គលម្នាក់ ហើយវាមានរូបភាពខុសៗគ្នា ដែលអាចតាមរាងកាយ ពាក្យសំដី ឬកាយវិការ នេះបើតាមអង្គការ CARE Cambodia។ តើការបៀតបៀនផ្លូវភេទ ប៉ះពាល់អ្វីខ្លះដល់ជនរងគ្រោះ?

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបៀតបៀនផ្លូវភេទដោយពាក្យសំដី

ការប្រើប្រាស់ភាសាមិនសមរម្យ ឬអាសអាភាស និងនិយាយលេងសើចបែបអាសអាភាស
ការលួងលោមដដែលៗ ដើម្បីបំពេញចំណង់ផ្លូវភេទ ឬការណាត់ជួបក្នុងគោលបំណងផ្លូវភេទ
ការនិយាយស្ដីដែលមានលក្ខណៈផ្លូវភេទ
ការវាយប្រហារឯកជនភាព ទាំងក្នុង និងក្រៅសាលារៀន ឬកន្លែងធ្វើការ
ការស្នើដាក់លក្ខខណ្ឌដោះដូរ ដើម្បីបំពេញចំណង់ផ្លូវភេទផ្ទាល់ខ្លួន ដូចជាការផ្ទេរ ការដំឡើងឋានៈ ប្រាក់ខែ។
គំរាមកំហែងវាយធ្វើបាប ឬបង្ខិតបង្ខំ ឬរំលោភផ្លូវភេទ។

ការបៀតបៀនផ្លូវភេទដោយកាយវិការ

ការតាំងបង្ហាញវត្ថុដែលធ្វើឲ្យនឹកឃើញដល់ផ្លូវភេទ មិនថារូបភាព ទស្សនាវដ្ដី ផ្ទាំងរូបភាព
ការសម្លក់សម្លឹង ឬសញ្ញាកាយវិការដែលទាក់ទងនឹងផ្លូវភេទ
ការប៉ះ ថើប ឱបក្រសោប ការធ្វើសរសៃ ឬអង្អែលលើរាងកាយដោយមិនមានការយល់ព្រម
ការវាយធ្វើបាប ឬបង្ខិតបង្ខំ និងរំលោភផ្លូវភេទ។

ការបៀតបៀនផ្លូវភេទផ្ដល់ផលប៉ះពាល់អ្វីខ្លះដល់ជនរងគ្រោះ?

ទោះជាការបៀតបៀនផ្លូវភេទមិនបន្សល់ទុករបួស ឬស្នាមជាំក៏ដោយ ក៏អាចធ្វើឲ្យជនរងគ្រោះឈឺចាប់ និងអាចផ្លាស់ប្ដូរបែបផែនជីវិតរបស់ជនរងគ្រោះបានផងដែរ។ នៅពេលដែលការបៀតបៀនផ្លូវភេទធ្វើឲ្យស្ត្រីមានភាពភ័យខ្លាច អាម៉ាស់ ឬអាក់អន់ចិត្ត វាអាចបង្កឲ្យមានផលវិបាកដូចជា៖

បាត់បង់ទំនុកចិត្តលើខ្លួនឯងក្នុងទីសាធារណៈ ហើយសម្ងំនៅតែក្នុងផ្ទះ
ឈឺចាប់ និងខ្មាសអៀន
មិនឃ្លានអាហារ និងគេងមិនលក់
ខ្លាចមនុស្សប្រុស ជាពិសេសមនុស្សប្លែកមុខ
ខ្វះការជឿជាក់ បាត់បង់ទំនុកចិត្តលើខ្លួនឯង បាក់ទឹកចិត្ត មានកំហឹង និងឆេវឆាវជាងមុន
បង្កគ្រោះថ្នាក់ បញ្ហាសុខភាពរ៉ាំរ៉ៃ និងមិនចង់ទៅធ្វើការ ឬទៅរៀន
ធ្វើឲ្យមានបញ្ហាផ្លូវកាយ និងផ្លូវចិត្ត ឬអាចឈានដល់ការប្រើប្រាស់ថ្នាំញៀនផ្សេងៗ ឬសេពគ្រឿងស្រវឹង
បាត់បង់ចំណូលដោយសារការបាត់បង់ការងារ។

មនុស្សគ្រប់រូបសុទ្ធតែមានសិទ្ធិចៀសផុតពីការបៀតបៀនផ្លូវភេទ។ ដូច្នេះហើយ ក្នុងនាមជាបុរស គួរពិចារណាលើចំណុចអវិជ្ជមាន នៃទង្វើបៀតបៀនផ្លូវភេទនេះ និងមិនគួរធ្វើ ឬត្រូវបញ្ឈប់ទង្វើបែបនេះ ទៅលើស្ត្រីតទៅទៀត៕

អត្ថបទផ្ដល់ដោយ៖ Hello Krupet

ចុចអាន៖បុគ្គលិកក្នុងអូហ្វីស ចូលចិត្តធ្វើសកម្មភាព ៦ នេះ ប្រយ័ត្នពិបាកខ្លួនទៅថ្ងៃមុខ

ចុចអាន៖គន្លឹះ ៥ យ៉ាង យកឈ្នះជំងឺបាក់ស្បាត យ៉ាងមានប្រសិទ្ធភាព

Related Topics:សុខភាពផ្លូវចិត្ត