ព័ត៌មានជាតិ

ប្រធានសភានឹងបំពេញទស្សនកិច្ចផ្លូវការនៅប្រទេសហុងគ្រីនៅចុងសប្ដាហ៍នេះ

បានផុស

៨ ខែ មុន

នៅ

ថ្ងៃពុធ ២២ តុលា ២០២៥

ដោយ

ប្រធានរដ្ឋសភា សម្ដេចសភាធិបតី ឃួន សុដារី នឹងដឹកនាំប្រតិភូកម្ពុជាទៅទស្សនកិច្ចនៅប្រទេសហុងគ្រីចាប់ពី២៤ ដល់ថ្ងៃទី២៨ ខែតុលា ចុងសប្ដាហ៍នេះ។ ដំណើរទស្សនកិច្ចនៅពេលនេះគឺបន្ទាប់ពីសម្ដេចបានលើកពេលធ្វើដំណើរទៅប្រទេសនេះកាលពីខែមិថុនាកន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្ដីជូនដំណឹងថ្ងៃទី២២ ខែតុលា ឆ្នាំ២០២៥នេះ អគ្គលេខាធិការដ្ឋានរដ្ឋសភាបានឱ្យដឹងថាក្នុងអំឡុងពេលដែលសម្ដេចអញ្ជើញទៅប្រទេសហុងគ្រី សម្ដេចនឹងមានជំនួបជាមួយប្រធានសភាហុងគ្រីលោក ឡាស្លូ កូវឺរ ព្រមទាំងចុះអនុស្សរណៈនៃការយោគយល់រវាងរដ្ឋសភាកម្ពុជា-ហុងគ្រីផងដែរ។

បើតាមការបញ្ជាក់ពីអគ្គលេខាធិការដ្ឋានសភា អនុស្សរណៈនោះធ្វើឡើងដើម្បីពង្រឹងទំនាក់ទំនងកិច្ចសហប្រតិបត្តិការរដ្ឋសភាប្រទេសទាំងពីរឱ្យកាន់តែរឹងមាំ និងគ្រប់ជ្រុងជ្រោយឡើងបន្ថែមទៀត នៅគ្រប់កម្រិត ក្នុងនោះមានទាំងកម្រិតរដ្ឋសភា និងកម្រិតអគ្គលេខាធិការដ្ឋានសភា។

ក្រៅពីនោះសម្ដេចប្រធានសភាក៏នឹងមានជំនួបសំណេះសំណាលជាមួយសិស្សនិស្សិតកម្ពុជា ដែលកំពុងសិក្សានៅប្រទេសហុងគ្រី និងទស្សនានៅតាមតំបន់ឧស្សាហកម្ម ទេសចរណ៍ វប្បធម៌ហុងគ្រីមួយចំនួនទៀត។

បើតាមអគ្គលេខាធិការដ្ឋានរដ្ឋសភាបន្ទាប់ពីដំណើរទស្សនកិច្ចនៅប្រទេសហុងគ្រី សម្ដេចប្រធានសភានឹងដឹកនាំប្រតិភូកម្ពុជាទៅចូលរួមវេទិកាសន្តិភាពប៉ារីស លើកទី៨ ពីថ្ងៃទី២៨ ដល់ថ្ងៃទី៣០ ខែតុលាផងដែរ ដែលនៅទីនោះសម្ដេចនឹងឡើងថ្លែងសុន្ទរកថាដាច់ដោយឡែកចំនួន៣ទាក់ទងនឹងបញ្ហាសន្តិសុខ និងសណ្ដាប់ធ្នាប់ពិភពលោក៕

អត្ថបទដោយ ហ៊ុន សិរីវឌ្ឍន៍