សមត្ថកិច្ចឃាត់បុរសម្នាក់ជិះម៉ូតូទម្លុះបារ៉ាស់ខណៈកំពុងអនុវត្តបម្រាមគោចរ

ភ្នំពេញ៖ បុរសម្នាក់ជិះម៉ូតូបុកទម្លុះបារ៉ាស់សមត្ថកិច្ចខណៈកំពុងអនុវត្តបិទខ្ទប់ពីភូមិសាស្ត្រខណ្ឌមួយទៅខណ្ឌមួយ  ហើយព្យាយាមជិះគេចខ្លួនត្រូវសមត្ថកិច្ចឃាត់ខ្លួន។

ហេតុការណ៍ នេះបានកើតឡើងកាលពីវេលាម៉ោង៧យប់ ថ្ងៃទី១៥ ខែមេសា ឆ្នាំ២០២១ នៅគោលដៅចំណុចស្ពានដែក ផ្លូវ២១៧ ស្ថិតក្នុងភូមិម័ល សង្កាត់ដង្កោ ខណ្ឌដង្កោ។

តាមសមត្ថកិច្ចបានឱ្យដឹងថា មុនពេលកើតហេតុ កម្លាំងចម្រុះនៃអធិការដ្ឋាននគរបាលខណ្ឌដង្កោ  បានចុះបិទខ្ទប់ក្នុងភូមិសាស្ត្រខ្លួននៅចំណុចកើតហេតុខាងលើ ខណៈកំពុងអនុវត្តស្រាប់តែមានបុរសម្នាក់ជិះម៉ូតូម៉ាកឌ្រីមសង់ស៊េរីឆ្នាំ២០១៣ ពណ៌ខ្មៅ ពាក់ស្លាកលេខភ្នំពេញ 1BQ 8575 ធ្វើដំណើរក្នុងទិសដៅពីជើងទៅត្បូង លុះមកដល់ចំណុចគោលដៅសមត្ថកិច្ចកំពុងអនុវត្ត ក៏ត្រូវបានសមត្ថកិច្ចហៅឈប់ដើម្បីសួរនាំ និងរកឯកលិខិតបេសកម្មរួមទាំងកាតសំគាល់ខ្លួន។

ភ្លាមនោះបុរសខាងលើក៏បានជិះទម្លុះ និងព្យាយាមគេចខ្លួន តែត្រូវសមត្ថកិច្ចប្រដេញបានចំងាយប្រហែល២០០ម៉ែត្រទើបបុរសនោះជិះបុកម៉ូតូសមត្ថកិច្ចពីក្រោយបណ្តាលឱ្យដួលទើបឃាត់ខ្លួនបានតែម្តង។

ក្រោយពេលកើតហេតុបុរសខាងលើត្រូវបានសមត្ថកិច្ចនាំទៅធ្វើការសាកសួរបន្ត និងចាត់ការតាមនិតិវិធី៕

ដោយ៖ សុខា